ኢስያሳ 2

መና ሳሮተ

1 ይሁዳ ቢታባነ የሩሳላመ ካታማባ አሞጻ ናአይ እስያስ በኤዳዌ ሀዋ።

2 ዉርሰ ጋላሳቱዋን መና ጎዳ ጌሻ ጎሊ ኬጸቴዳ ደሪ ደረቱዋ ኡባፐ ቂደ ቤታና፤ ዞዘቱዋ ኡባቱዋፐካ ቦላና ቁ ቁ ጋና። ካዉተቱዋን ደእያ አሳይ ኡባይ አኮ ዛታና። 3 ዳሮ አሳይ ዪደ፥ "ሃይተ! መና ጎዳ ደርያ፥ ያቆባ መና ጎዳ ጌሻ ጎልያ አነ ፑደ ከሶይተ። እ ኮይያዋዳን ኑን ባና ማላ፥ እ ኑና ባረ ኦግያ ታማርሳና" ያጋና። አያዉ ጎፐ፥ ህጊ ጽዮነፐ፥ ጾሳ ቃላይካ የሩሳላመፐ ከሳና። 4 ካዉተቱዋፐነ ካዉተቱዋፐ ግዱዋን እ ፕርዳናነ ዳሮ አሳቱዋ ፓሉምያ ሻካና።✝2:4 ኢዩ. 3:10 ኡንቱንቱ ባረንቱ ማሻ ማራሻ፥ ባረንቱ ቶራካ ባጫ ከሳናዉ ቆጻና። ካዉተይ ካዉተ ቦላ ማሻ ደንና። ሄዋፐ ጉይያን ኡንቱንቱ ሙለካ ኦላ ትምርትያ ታማርክኖ።

5 ህንተኖ፥ ያቆባ ዛረቶ፥ ሃይተ! አነ መና ጎዳ ፖኡዋን ሀመቶይተ።

መና ጎዳ ጋላሳ

6 ጾሳዉ፥ ነ አሳ፥ ያቆባ ዛራቱዋ አጋዳ። ኡንቱንቱ አዋይ ዶልያ ባጋ ጋድያ አሳቱዋ ቢታን ኩሜድኖ፤ ፕልስጼማ አሳቱዋዳን ካዪኖ። ኡንቱንቱ አላጋ አሳቱዋና እትፐ ዙፐቲኖ። 7 ኡንቱንቱ ጋዲ ብራይነ ዎርቃይ ኩሜዳዋ፤ ኡንቱንቱ ሻሎ ዛዋይ ባዋ። ኡንቱንቱ ጋዲ ፓራይ ኩሜዳዋ፤ ኡንቱንቱ ፓራ ጋረቶ ዛዋይ ባዋ። 8 ኡንቱንቱ ጋዲ ኤቃቱዋን ኩሜዳዋ፤ ኡንቱንቱ ባረንቱ ኩሺ ኦዳ ኦሶ ሆኪደ ጎይኒኖ።

9 ሄዋ ድራዉ፥ አሳይ ኡባይ ቶሸታናነ ካዉሻና። ኡንቱንቶ አቶ ጎፓ።

10 መና ጎዳ ዳጋማፐነ አ አንጋ ቦንቹዋፐ አታናዉ ዛላኮ ቢተ፤ ቢታ ግዶን ቆሰትተ!✝2:10 ሳፃ 6:15፤ 2 ተስ. 1:9 11 አሳ ኦቶሩ ጊያና፤ አ ክላሁካ ሲላና፤ ሄ ጋላስ መና ጎዳ ጻላላይ ቁ ቁ ጋና። 12 ኡባፐ ዎልቃማ መና ጎዳይ እት ጋላሳ ኬሬዳ። ሄ ጋላስ ኦቶረትያዋንታ፥ አይያዋንታነ ቁ ቁ ጌዳዋንታ ካዉሻና፤ 13 አዱሳነ ቃ ግድያ ሊባኖሳ ዝጋቱዋነ ባሳነ ዎላ ኡባ ይሳና፤ 14 ቃ ደረቱዋካ ዞዘቱዋካ ደምባያና፤ 15 ካታማ ናግያ አዱሳ ሚጻቱዋ ኡባነ ካታማ ዩሹዋን ደእያ ምኖ ግምበቱዋ ዝቂሳና፤ 16 ጾሳይ ግታነ ሎእያ ማርካባቱዋካ ሃን ምትሳና። 17 አሳ ኦቶሩ ዝቂ ጋና፤ አ አዩካ ያና። ሄ ጋላስ መና ጎዳ ጻላላይ ቁ ቁ ጋና፤ 18 ኤቃ ኡባይካ ኡባና ያና።

19 መና ጎዳይ ሀ ጋድያ ቃናዉ ደንድያ ዎደ፥ አ ዳጋማፐነ አ አንጋ ቦንቹዋፐ አታናዉ አሳይ ሹቻ ጎንጎሎነ ቢታ ኦላዉ ባቃታና። 20 ሄ ጋላስ አሳይ ጎይናናዉ መዳ ባረንቱ ብራ ምስለቱዋነ ባረንቱ ዎርቃ ምስለቱዋ ኦጮቶነ ሀራ ካፎቶ ኦላና። 21 መና ጎዳይ ሀ ጋድያ ቃናዉ ደንድያ ዎደ፥ አ ዳጋማፐነ አ አንጋ ቦንቹዋፐ አታናዉ ኡንቱንቱ ጎንጎሎ ግዶነ ሹቻ ኮፖ ግዶ ባቃታና።

22 ስም ሀይቂያ አሳን አማነትያዋ አግተ! አሳይ አይ ማዳኔ?