ኢስያሳ 52

ጾሳይ የሩሳላመ አሻና

1 ኔኖ ጽዮነ ካታማዉ፥ ቤጎታ፤ ምኖተ አፍላዳን ማያ።✝52:1 ሳፃ 21:2፣ 27 ኔኖ፥ ጌሻ ካታማዉ፥ የሩሳላመ፥ ነ ቦንቹዋ ማዩዋ ማያ፤ አያዉ ጎፐ፥ ሀዋፐ ስንናዉ ቃጻረትቤናዌነ ቱናይ ነ ግዶ ገለና። 2 ኔኖ፥ ኦሞደቴዳ የሩሳላመ፥ ነ ባና ቆቆፋ። ደንዳዴ ነ ካተቱዋ አራታን ኡታ። ህንተኖ፥ ኦሞዱዋን ደእያ ጽዮነ አሳቶ፥ ህንተ ቆያን ቃሸቴዳ ሳንሳላታ ብርሽተ።

3 አያዉ ጎፐ፥ ኡባ ሞድያ ጾሳይ ሀዋዳን ያጌ፤ "ህንተ ካሰካ ጋትያ አከናን ዛልኤቴድታ፤ ቃይ ሀእካ ሚሻ እመናን ጮ ዎዘታና። 4 ታ አሳይ ኮይሮ በተ ግዲደ፥ ግብጼ ቢታ ቤዳ፤ ሽን አሶረቱ ታ አሳ ጮ ኡቁኔድኖ። 5 መና ጎዳይ፥ ታ አሳይ ጋትያ ጭገናን ጮ ኦሞዱዋን ብ ክችና፥ ታዉ ሀዋን አዬ ደእያዌ? ኡንቱንታ ሞድያዋንቱ ዋሲኖ፤ ታ ሱንይካ ኡባ ገደ ጋላሳ ኩመን ቦረቴ ያጌ መና ጎዳይ።✝52:5 ሮመ 2:24 6 ሄዋ ድራዉ፥ ታ አሳይ ታ ሱን ኤራና፤ ሄ ጋላስ ሃሳይያዌ ታና ግድያዋ ኡንቱንቱ ኤራና። ኤ ሄዌ ታና። ታን ጾሳይ ሀዋ ኦዳይ" ያጌ።

7 ሎኦ ምሽራቹዋ አህያ፥ ሳሮተ ኦድያ፥ ናሸችያ ምሽራቹዋ ኦድያ፥ አቶተ ኦድያነ፥ ጽዮኖካ፥ "ነ ጾሳይ ካተቴ" ጊደ ደረቱዋ ቦላና ይያ ብታንያ ገደቱ ዎት ሎእኖ!✝52:7 ናሆማ 1:15፤ ሮመ 10:15፤ ኤፈ. 6:15 8 ስስተ፥ ህንተ ካታማ ናግያዋንቱ ባረንቱ ቃላ ቁ ኦደ፥ ናሸቻዉ እትፐ የጺኖ፤ መና ጎዳይ ጽዮነ ስምያ ዎደ፥ እ ስሞዋ ኡንቱንቱ ባረንቱ አይፍያን በአና። 9 ህንተኖ የሩሳላመን ኮለቴዳ ሳቶ፥ እትፐ ናሸቻዉ የጽተ፤ አያዉ ጎፐ፥ መና ጎዳይ ባረ አሳ ምንዳ፤ የሩሳላመ ካታማካ ዎዜዳ። 10 መና ጎዳይ ባረ ጌሻ ቀስያ ካዉተቱዋ ኡባ ስንን ቆንጭሴዳ፤ ቃይ ቢታ ጋጻይ ኡባይካ ኑ ጾሳ አቶተ በአና።

11 ህንተኖ መና ጎዳ ጎልያ ሚሻቱዋ ቶክያዋንቶ፥ ክችተ፥ ክችተ፤ ያፐ ከስተ። ቱናባ ቦቾፕተ፤ አ ግዶፐ ከስ ክችተ። ህንተ ሁጲያዉካ ጌይተ።✝52:11 2 ቆሮ. 6:17 12 ሽን ከሲደ፥ ኤለካ ከስክታ፤ ዎይ በቲደ ቢክታ፤ አያዉ ጎፐ፥ መና ጎዳይ ህንተፐ ስንዉ አደ ካለና፤ እስራኤልያ ጾሳይካ ጉየና ግዲደ፥ ህንተና ናጋና።

መቱ ጋክያ ቆማ

13 ጾሳይ ሀዋዳን ያጌ፤ "በእተ፥ ታ ቆማይ አኬካን ኦና፤ እ ቦንቼቲደ፥ ቁ ቁ ጋና፤ እ ሎይ ግታታና። 14 አ ሶምኢ አሳ ኡባዋፐ፥ አ ማላይካ አሳ ናና ኡባፐ ቆሄቴዳ፤ አ በኢደ፥ ዳሮ አሳይ ዳጋሜዳ። 15 ሽን ሀእ ዳሮ ካዉተቱ ኡባይ አባን ማላለታና፤✝52:15 ሮመ 15:21 አፐ ደንዴዳዋን፥ ካተቱ ባረንቱ ዶና ኦይቃና፤ አያዉ ጎፐ፥ ኡንቱንቱ ባረዉ ኦደትቤናዋ በአና፤ ስስቤናዋካ አኬካና" ያጌ።