ኢስያሳ 34

ጾሳይ ባረ ሞርከቱዋ ሙራና

1 ህንተኖ፥ ካዉተቶ፥ ሺቂደ ስስተ! ህንተኖ አሳቶ ስስተ! ቢታይነ ጋድያን ደእያባይ ኡባይ፥ ሳአይነ ሳኣን ደእያባይ ኡባይ ስሶ! 2 አያዉ ጎፐ፥ መና ጎዳይ ካዉተ ኡባ ሀንቀቴዳ፤ አ ይሉካ ኡንቱንቱ ቶራንቻቱዋ ኡባ ቦላና። እ ኡንቱንቱ ኡባና ይሳና፤ ኡንቱንታ ሲፍያዋንቶ አደ እማና። 3 ኡንቱንቱፐ ዎዳዋንቱ ኦለታና፤ ኡንቱንቱ አሃይ ጽንቃና። ዎጋ ደረቱ ኡንቱንቱ ሱን ካመታና። 4 ሳሉዋ ጾልንተቱ ኡባይ ሲላና፤ ሳሎቱ ዋራቃታዳን ጻጸታና። ኡንቱንቱ ጾልንተቱ ኡባይ ዎይንያፐ ሀይይ ቆቆፈትያዋዳን፥ ባላስያፐ አይፊ ቆቆፈትያዋዳን ቆቆፈታና።✝34:4 ማቶሳ 24:29፤ ማር. 13:25፤ ሉቃሳ 21:26፤ ሳፃ 6:13-14

5 ታ ማሻይ ሳሎቱዋ ግዶን አላና ጋካናዉ ኡሼዳ። በእተ፥ እ ኤዶማ ቦላ፥ ታን ሸቄዳ አሳ ቦላ ፕርዳናዉ ዎ።✝34:5-17 ኢሳ. 63:1-6፤ ኤር. 49:7-22፤ ህዝ. 25:12-14፤ 35:1-15፤ አሞጻ 1:11-12፤ አብድ. 1-14፤ ሚልክ. 1:2-5 6 መና ጎዳዉ ቦጽራ ግያ ካታማን ያርሹ፥ ኤዶማ ጋድያን ዎልቃማ ሹካይ ደእያ ድራዉ፥ መና ጎዳ ማሻይ ሱን ሜጨቲደ፥ ሞዋን ጻጸቴዳ። ዶርሳቱዋነ ዴሻቱዋ ሱን ሜጨቲደ፥ ዶርሳቱዋ ክላሆቱዋ ሞዋን ጻጸቴዳ። 7 ቃይ መንቱ፥ ማራቱነ ኮሩማ ቦራቱ ኡንቱንቱና ኩንዳና። ኡንቱንቱ ቢታይ ሱ ጻላላ ግዳና፤ ኡንቱንቱ ቢታይካ ሞዋን ሙናቀታና። 8 አያዉ ጎፐ፥ መና ጎዳይ ሀሉዋ ከስያ ጋላሳ፤ ጽዮነ ኦሌዳ ሞርከቶ ኩሽያ ዛርያ ላይ።

9 ጎግያ ኤዶማ ሃቱ ሽድያዉ፥ አ ቢታይካ ዲንያዉ ላመታናዋ፤ አ ቢታይ ኤጽያ ሽድያ ግዳናዋ። 10 ታማይካ ቃማን ጋላሳን ቶኤና፤ አ ጩዋይካ መናዉ ጩዋታና። ኤዶማ ቢታይ የለታፐ የለታ ጋካናዉ፥ መላ ግዳናዋ፤ ኦንነ መናዉ ሄዋና አና።✝34:10 ሳፃ 14:11፤ 19:3 11 ሽን ጽንግሊነ ቁጻርሳይ አ ላታና፤ ጉቶቱነ ቁሩ አን ደአና። ጾሳይ ኤዶማ ቦላ ኮለ ልክያ ዎዶሩዋነ መላተ ልክያ ቱምቢያ ፕድ ኦደ የዳና። 12 ሄ ጋድያን ካተትያዌ ያና፤ ካፓቱካ ሄዋፐ ክቻና። 13 አ ጎለቱዋን አጉንይ፥ አ ሚጻቱዋን ኦካይ ኦዶሩ ሞካና። እ ዎራካናቱ አላጽያሳነ ሶጎኒ ደኢያሳ ግዳናዋ። 14 ዎራ ዶአቱ ጎዳረቱዋና ጋከታና፤ ቱና አያናቱ እቱ እቱዋና ጼሰታና፤ ቃማ ጻላሄቱ ዎደ፥ ያን ደአና። 15 ጉታታ ያን ጎልያ ኬጻና፤ ቁቁሌዳ ቁቁለቱዋ ሀጳደ ቆጻና። ባረ ማራቱዋካ ባረ ቀፈቱዋ ጋርሳን ሀጳና፤ ቃይ ጋጨቱ ባረንቱ ላግያና ላግያና ሄ ሳኣ ሺቃና።

16 መና ጎዳ ማጻፋፐ ኮዪደ ናባብተ። ጾሳ ዶናይ አዛዜዳ ድራዉነ አ አያናይ ሺሼዳ ድራዉ፥ ሀዋንቱፐ እቱነ ፓጨና፤ ቃይ እቱነ ባረ ላጊ ባይናን ደኤና። 17 እ ኡንቱንቶ ሳማ ከሴዳ፤ አ ኩሺ ኡንቱንቶ ጋድያ ዎርዱዋን ሻኬዳ፤ ኡንቱንቱ አ መናዉ ሞዳና፤ የለታፐ የለታ ጋካናዉ፥ ኡንቱንቱ አን ደአና።