ኢስያሳ 50

1 መና ጎዳይ ሀዋዳን ያጌ፤ "ታን ህንተ ዳዮ የዴዳ ፕርማይ ሀቃን ደኢ? ዎይ ኦስ ህንተና ታን ዛልኣድታ? በእተ፥ ህንተ ናጋራ ድራዉ፥ ህንተ ዛልኤቴድታ፤ ህንተ ባይዙዋ ድራዉ፥ ህንተ ዳያ ብለታዱ። 2 ታን ዬዳ ዎደ፥ አያዉ ሄዋን አሳይ ዬዴ? ታን ጼሴዳ ዎደ፥ ‘ዬ!’ ጋናዉ አያዉ አሳይ ሄዋን ደእቤኔ? ታን ህንተና ዎዛናዉ ታ ኩሺ ቃንየ? ዎይ ህንተና አሻናዉ ታዉ ዎልቃይ ባዌየ? በእተ፥ ታን ሴራደ አባ መልሳይ። ሻፋቱዋካ መላ ቢታ ኦይ። ኡንቱንቱን ደእያ ሞለቱ ሃይ ይና ዎቂኖ፤ ሳሙ ዎና ሀይቂኖ። 3 ታን ሳሎቱዋ ካረባ ማይዛይ፤ ዋሩዋካ ኡንቱንቱ ካመትያባ ኦይ" ያጌ።

ጾሳ ቆማይ አዛዘትያዋ

4 ዳቡሬዳዋ ታን ቃላን ዋታደ ምንነንቶ ኤራና ማላ፥ ኡባ ሞድያ መና ጎዳይ ታዉ ታማሬዳ እንጻርሳ እሜዳ። እ ታና ዎንታ ዎንታ ቤጎደ፥ ታን ታማርያ አሳዳን ስሳናዳን፥ ታ ሀይ ዶዬ። 5 ኡባ ሞድያ መና ጎዳይ ታ ሀይ ዶዬዳ፤ ታንካ ማካላንቻ ግዳበይከ፤ ጉየካ ስማበይከ። 6 ታን ታ ዞክያ ሾጭያዋንቶ፥✝50:6 ማቶሳ 26:67፤ ማር. 14:65 ታ ጋጩዋ ቡቻ ሾድያዋንቶ አደ እማድ። ታ ሶምኡዋ ካዉሻፐነ ጩቻ ጩሸትያሳፐ ገንበይከ። 7 ኡባ ሞድያ መና ጎዳይ ታና ማድያ ድራዉ፥ ታን ዬላታበይከ፤ ሄዋ ድራዉ፥ ታን ታ ሶምኡዋ ሳልያ ግያ ሹቻዳን ኡዳድ። ታን ዬላተናን አታናዋካ ኤራይ። 8 ታና ሻትንያዌ ማታን ደኤ፤✝50:8-9 ሮመ 8:33-34 ያትና፥ ታና ሞትያዌ ኦኔ? አነ እትፐ ታናና ኤቆ! ታ ሞርኪ ኦኔ? አነ ታናና ጋከቶ! 9 በእተ፥ ኡባ ሞድያ መና ጎዳይ ታና ማዴ፤ ያትና፥ ታና ባይዛንቻ ጋናዌ ኦኔ? በእተ፥ ኡንቱንቱ ኡባይካ ማዩዋዳን ኤጭ ዉራና፤ ብልአይ ኡንቱንታ ማና።

10 ህንተ ግዶፐ መና ጎዳዉ ያይያዌነ አ ቆማ ቃላዉ አዛዘትያዌ ኦኔ? ማን ሀመትያዌነ ፖኡ ባይናዌ እ ኦኔ? ሄ ኡራይ መና ጎዳ ሱንን አማነቶ፤ ባረ ጾሳንካ ዘምፖ። 11 በእተ፥ ህንተኖ ታማ ኤያ ኡባ ገደ፥ ዪቻ ጾምፕያ ላጩዋ ህንተንቶ ሺሽያዋንቶ፥ ህንተ ኤዳ ታማ ፖኡዋን ሄመትተ! ህንተ ዪጬዳ ጾምፕያ ላጩዋ ፖኡዋን ስመረትተ! ህንተ ታ ኩሽያፐ አካናዉ ደእያባይ ሀዋ: ህንተ ዎልቃማ ሴላን ግሳና።