ኢስያሳ 27

1 ሄ ጋላስ መና ጎዳይ ባረ ምኖ፥ ግታነ ዎልቃማ ማሻን ሌዋታና ግያ ኮልጽያነ ጻጸትያ ሾሻ ሙራና፤ አባን ደእያ ዳዊያካ ዎና።✝27:1 ኢዮባ 41:1፤ ማዝ. 74:14፤ 104:26 2 ሄ ጋላስ ሀዋዳን ጌተታና፤ "ሀዌ ዶሰቴዳ ዎይንያ ቱራ ሳ፤ አባ የጽተ! 3 ታን፥ መና ጎዳይ አ ናግያዋ፤ ታን አ ሀእ ሀእ ሃ ኡሻይ፤ ኦንነ አ ቆሄናዳን፥ ታን ቃማነ ጋላስ አ ናጋይ። 4 ታን ሀንቀትከ፤ ታናና ኦለታናዉ፥ አጉንይነ ጎምኦሪ ደኤርክኖሻ! ታን ኡንቱንቱ ቦላ ከሳ ኤቃደ፥ ኡንቱንታ ጹጋ ዉርሳና። 5 ዎይ ባቃት ቆሰት አታናዉ ታኮ ዪኖ፤ ታናና ጊግኖ፤ ኤ፥ ታናና ጊግኖ" ያገታና።

6 ያና ጋላሳቱዋን ያቆብ ጻጱዋ የዳና፤ እስራኤሊ አጫናነ ጪሻና፤ ያቲደ አይፌዳ አይፊ ሳኣ ኡባ ኩማና።

7 ኡንቱንታ ሾጬዳዋንታ ሾጬዳዋዳን፥ መና ጎዳይ እስራኤልያ አሳ ሾጬደየ? ዎይ ኡንቱንታ ዎዳዋንቱ ሀይቄዳዋዳን፥ ኡንቱንቱ ሀይቄድኖየ? 8 ጾሳይ ባረ አሳ ኦሞዶ የድያዋን ሙሬዳ፤ አዋይ ዶልያ ባጋ ጫርኩዋ ጋላስ ኡንቱንታ ባረ ያሽያ ጎትያን ላግ ከሴዳ። 9 ሄዋ ድራዉ፥ ያቆባ ባይዙ አቶ ጌተታናዌነ አ ናጋራይ ፖሎ ቁጨታናዌ ሀዋና: ሄዌካ ያርሽያ ሳኣ ሹቻ ኡባ እ መኤረቴዳ ቦቅን ሹቻዳን ኦያ ዎደነ፥ አሼሮ ግያ ማጫ ጾሳት ምስሊ፥ ዎይ እጻና ጩዋዪደ፥ ያርሽያ ሳአይካ ኤቁዋን አተናዳን ኦያ ዎደ።

10 ምኑዋ ድረቴዳ ካታማይ ኦኔዳ፤ ካሰ አሳይ ደእያ ሳአይ ሀእ ባዙዋዳን፥ መላ አቴዳነ ዶገቴዳ፤ እ መሂ ሄመትያ ሳኣ ግዴዳ ድራዉ፥ ም ቦንጭያ ሚደ፥ ማራቱ ሄዋን አላጺኖ። 11 ም ታሸቱ መልያ ዎደ መኤረቲኖ፤ ማጫ አሳይካ ዪደ፥ ኡንቱንታ ኤናዉ አፌ። ሀ አሳይ አኬክ ባይና አሳ ግድያ ድራዉ፥ ኡንቱንታ መዳዌ ኡንቱንቶ ቃረተናነ ማረና።

12 ሄ ጋላስ ኤፍራጺሳ ሻፋፐ ግብጼ ሻፋ ጋካናዉ፥ መና ጎዳይ ካ ቡካና፤ ህንተኖ፥ እስራኤልያ አሳቶ፥ ህንተካ ህንተ ታራን ታራን ሺቃና።

13 ሄ ጋላስ ዎልቃማ ማላካታይ ፑነታና፤ አሶረ ጋድያን ይያዋንቱነ ግብጼ ቢታዉ የደርሴዳዋንቱ ያና፤ የሩሳላመን ጌሻ ደርያን መና ጎዳዉ ጎይናና።