ኢስያሳ 37

ካቲ ህዝቂያስ ኢስያሳ ዞርያ ኦቼዳ

1 ካቲ ህዝቂያስ ሄዋ ስሴዳ ዎደ፥ ባረ ማዩዋ ፔዳ፤ ማቃ ማዪደ፥ መና ጎዳ ጌሻ ጎልያ ገሌዳ። 2 ካትያ ጎልያን አዎትያ ኤልያቂመ፥ ዋና ጻፊ ሼብንነ ጭማ ቄሳቱ ማቃ ማዪደ፥ አሞጻ ናኣ ትምቢትያ ኦድያ ኢስያሳ ኮ ባና ማላ ኪቴዳ። 3 ኡንቱንቱ ኢስያሳ ኮ ቢደ፥ "ህዝቂያስ ሀዋዳን ያጌ፤ ‘ሀቼ ጋላሳይ መቶ ጋላሳ፥ ሴራ ጋላሳነ ዬላ ጋላሳ። ሄዌካ ናእ የለታናዉ ዎዲ ጋክና፥ ባናደ የላናዉ ምሽራትዉ ዎልቃይ ይያዋ ማላ። 4 ደኡዋ ጾሳ ሸቃናዳን፥ አ ጎዳይ፥ አሶረ ካቲ፥ ኪቴዳ ጋዳዋ ቃላ መና ጎዳይ ነ ጾሳይ ስሰናን አገና። ቃይ መና ጎዳይ ነ ጾሳይ ሄ ስሴዳ ቃላ ሀዳን አ ሙረናን አገና። ሄዋ ድራዉ፥ ኑ አሳ ግዶን ፓላህ አታናዋንቶ ዎሳ!’ ያጌ" ያጌድኖ።

5 ካትያ ህዝቂያሳ ቆማቱ ኢስያሳ ኮ ዬዳ ዎደ፥ 6 እስያስ ኡንቱንታ ሀዋዳን ያጌዳ፤ "ህንተ ጎዳዉ ሀዋዳን ያጊደ ኦድተ፤ መና ጎዳይ ኔና፥ ‘አሶረ ካትያ ቆማቱ ታና ሸቅሽን፥ ኔን ስሴዳ ቦርያ ቃላዉ ያዮፓ። 7 በአ፥ ኦዱዋ ስሲደ፥ እ ባረ ቢታ ስማና ማላ፥ ታን አ ግዶን እት አያና ዎና። ያታደ እ ባረ ቢታ ቢደ፥ ያን ማሻን ሀይቃናዳን፥ ታን አ ኦና ያጌ’ " ያግተ ያጌዳ።

አሶረቱ ሀራቱዋካ ናሴድኖ

8 አሶረ ካቲ ላክሻ ካታማፐ ደንዲደ ብ ክቼዳዋ አሶረቱዋ ጋዳዋይ ስሲደ፥ ጉየ ስሜዳ። ካቲ ሊብና ካታማን ኦለትያዋ ደሜዳ።

9 ካቲ ሳናክሬብ፥ "ቶጵያ ካቲ ትርሃቅ ኔና ኦላናዉ ዬዳ" ያግያ ኦዱዋ ስሴዳ። ህዝቂያሳዉ ሀዋዳን ያግ ኪቴዳ፤ 10 "ይሁዳ ካትያ ህዝቂያሳ፥ ኔን አማነትያ ጾሳይ ኔና፥ ‘የሩሳላመ አሶረ ካትያ ኩሽያን ገለና’ ያግ ጭሞፖ። 11 በአ፥ አሶረ ካተቱ ቢታቱዋ ኡባ ኡባና ይሲደ፥ ኡንቱንቱ ኦዳዋ ኔን ስሳዳ። ያትና፥ ኔን አታኒ? 12 በን ታ ማይዛ አዎቱ ባይዜዳ ቢታቱዋ ጾሳቱ፥ ሄዋንቱነ ጎዛና፥ ካራነነ ረጼፋ ቢታቱዋ ጾሳቱነ ታላሳራን ደእያ ኤደነ አሳ ጾሳቱ ሄ ቢታቱዋ ባሻፐ አሼድኖ? 13 ሀማታ ካቲ፥ አርፋዳ ካቲ፥ ሳፋርዋይማ ካቲ፥ ሄናአ ካቲነ ኢዋ ካቲ ሀቃን ደኢኖ?" ያግ ኪቴዳ።

14 ህዝቂያስ ዳብዳቢያ ኪተቴዳ አሳቱዋፐ አኪደ ናባቤዳ። ዳብዳቢያ መና ጎዳ ጌሻ ጎልያ አክ አፊደ፥ መና ጎዳ ስንን ምጬዳ። 15 ያቲደ መና ጎዳ ሀዋዳን ያግ ዎሴዳ፤ 16 "አቤት ኡባፐ ዎልቃማ መና ጎዳዉ፥ ክሩበቱዋፐ ግዱዋን ኡትያ እስራኤልያ ጾሳዉ፥ ሳኣ ካዉተቱዋ ኡባ ቦላ ነ ጻላላይ ጾሳ። ሳሉዋነ ሳኣ ኔን መዳ።✝37:16 ከሳ 25:22 17 አቤት መና ጎዳዉ፥ ነ ሀይ ሃ የጋደ ስሳ። አቤት መና ጎዳዉ፥ ነ አይፍያ ፖጋደ ጼላ። ኔና፥ ደኡዋ ጾሳ ቦራናዉ ሳናክሬብ ኪቴዳ ቃላ ስሳ።

18 "አቤት መና ጎዳዉ፥ አሶረ ቢታ ካተቱ ካዉተ ኡባነ ኡንቱንቱ ጋድያ ባይዜዳዌ ኤ ቱማ። 19 ኡንቱንቱ ጾሳቱዋ ታማን ጹግ ይሴድኖ፤ አያዉ ጎፐ፥ ኡንቱንቱ ጾሳቱ ዎንካ አሳ ኩሺ ማሲደ ከሴዳ ምነ ሹቻ ግድያ ድራዉ፥ ቱሙ ጾሳቱዋ ግድክኖ፤ ሄዋ ድራዉ፥ ኡንቱንቱ ኡንቱንታ ይሴድኖ። 20 ሀእ ስም አቤት መና ጎዳዉ፥ ኑ ጾሳዉ፥ ነ ጻላላይ ጾሳ ግድያዋ ሳኣ ካዉተቱ ኡባይ ኤራና ማላ፥ ኔን ኑና አ ኩሽያፐ ዎ አካ!" ያግ ዎሴዳ።

እስያስ ካትያዉ የዴዳ ኪታ

21 ሄዋፐ ጉይያን፥ አሞጻ ናአይ እስያስ ህዝቂያሳዉ ሀዋዳን ያግ ኪቴዳ፤ "መና ጎዳይ እስራኤልያ ጾሳይ ሀዋዳን ያጌ፤ ‘ኔን አሶረ ካትያ ሳናክሬባ ጋሱዋን ታና ዎሴዳ ዎሳ ስሳድ’ ያጌ። 22 መና ጎዳይ ሳናክሬባዋ ሀዋዳን ያግ ሃሳየ፦

"ጽዮነን ደእያ አሳይ ኔና ካ፤

የሩሳላመ አሳይ ባረ ሁጲያ ቃደ፥ ኔና ቅሊጬ።

23 ኔን ሸቄዳዌነ ቶቼዳዌ ኦኔ?

ኔን ኦ ቦላን ነ ቃላ

ቁ ኦደ ሃሳያዲ?

ቃይ ኦቶሩዋን ኦና

ቁ ጋደ ጼላዲ?

ሄዋ ኔን ኦዳዌ ታ ቦላና፥

እስራኤልያ ጌሻ ቦላና ግደኔ!

24 ኔን ኪቴዳ አሳቱዋ ባጋና ጎዳ ሸቃዳ።

ቃይ ሀዋዳን ያጋዳ፤

‘ታን ታዉ ደእያ ጮራ ፓራ ጋረቱዋን

ቃ ደረቱዋ ሁጲያ፥ ሊባኖሳ ደርያ ኪክያ ከሳድ።

ከሳደ ኡባፐ አዱቂያ ዝጋቱዋነ፥

ኡባፐ ሎእያ ጺዳቱዋ ቃንጻድ።

ታን ቃዉ ዉርሰ ጋጻነ፥

ጪልሞ ዎራ ጋካድ።

25 ታን አላጋ ቢታቱዋን

ሃ ኦላቱዋ ቦካደ፥

ሃ ኡንቱንቱፐ ኡሻድ።

ግብጼ ጋድያን ጎግያ ሃ ኡባ

ታን ታ ገድያ ጎምፓን የደ መልሳድ’

ያጋዳ።

26 "ዳሮ ዎድያፐ ካሰ፥

ኔን ግምበቴዳ ካታማቱዋ ቆቆፋደ፥

ሹቻ ኬላ ከሳና ማላ፥

ታን ቆፋ ቃቻ ዎዳዋ ኔን ኤራበይኪ?

ታን ሀእ ፖልያ ሀልቾቱዋ፥

በን ሀልቻ ዎድ።

27 ሄዋ ድራዉ፥ ኡንቱንቱ አሳዉ ዎልቃይ እጽና፥

ኡንቱንቱ ካዉሼድኖነ ዬላቴድኖ።

ኡንቱንቱ ጋደ ማታ ማላ፤

ጎሻን ሞኬዳ ጫርሻ ማላ።

ኡንቱንቱ ጎልያ ሁጲያን

ሞክያ ሻራፋዳንነ ካኤናን ደእሽን፥

ትሻን ዋግ ሜዳ ካዳን ሀኔድኖ።

28 "ሽን ኔን ኡትያሳ፥

ከስያሳ፥ ገልያሳነ፥

ታ ቦላ ኔን ሀንቀቴዳ ሀንቁዋ ታን ኤራይ።

29 ኔን ታ ቦላ ሀንቀቴዳ ድራዉነ፥

ነ ኦቶሩዋካ ታን ስሴዳ ድራዉ፥

ታን ነ ሲያን ታ ማጋ አና፤

ነ ዶናንካ ታ ብጻላ ባርሳና።

ያታደ ኔን ዬዳ ኦግያና፥

ታን ኔና ጉየ ዛራና ያጌ"

ያጌዳ።

30 ሄዋፐ ጉይያን፥ እስያስ ካትያ ህዝቂያሳ ሀዋዳን ያጌዳ፤ "ሀዎ ነዉ ማላታይ ሀዋ: ሀ ላይ ህንተ አዛባ ሞኬዳ ካ ማና፤ ላይ ቃይ ሀ ላይ ሞኬዳዋ አዛባ ማና። ሽን ካላ ላይ ህንተ ህንተ ሁጲያን ዘርተነ ጫክተ፤ ዎይንያ ቱራካ ቶክተነ አ ቴራ ሚተ። 31 ይሁዳ አሳፐ አትያዋንቱ ጻጱዋ ዱገ የዲደ፥ ቦላን አይፍያ አይፍያ ም ማላ ግዳናዋ። 32 አያዉ ጎፐ፥ ዉሪደ አቴዳዋንቱ የሩሳላመፐ፥ ፓላሄዳዋንቱካ ጽዮነፐ ከሳና። ኡባፐ ዎልቃማ መና ጎዳ ምሹ ሄዋ ኦደ ፖላና።

33 "ሄዋ ድራዉ፥ አሶረ ካትያባ መና ጎዳይ ሀዋዳን ያጌ፤ ‘አሶረ ካቲ ሀ ካታማ ገለና፤ ዎይ ሀዋን ባረ ዎንዳፍያ ዱከና፤ ዎይ ባረ ጎንዳልያ ኦይቂደ፥ ሀ ካታማ ስን አና፤ ዎይ ቃይ ካታማ ዩሹዋ ቢታ ዶርያን ዶደና። 34 አሶረ ካቲ ባረ ዬዳ ኦግያና ጉየ ስማና፤ እ ሀ ካታማ ገለና። ታን መና ጎዳይ ሀዋ ኦዳይ። 35 ታን ታ ቦንቹዋ ድራዉነ ታ ቆማ ዳዊታ ድራዉ፥ ሀ ካታማ ቦሽሰናን አሻ አካና’ ያጌ" ያጌዳ።

36 ሄ ጋላስ ቃማ መና ጎዳ ኪታንቻይ ከሲደ፥ አሶረ አሳይ ዱንካኔዳሳን፥ እት ጼታነ ሆስፑን ታማነ እቼሹ ሻአ አቱማ አሳ ዎዳ። ያትና፥ አሳይ ዎንታ ሱሪደ በእያ ዎደ፥ ሀይቄዳ አሳ አሃይ ሄዋን ኩሜዳ። 37 ሄዋ ድራዉ፥ አሶረ ካቲ ሳናክሬብ ደንዲደ፥ ጉየ ስም ቢደ፥ ናናዌ ካታማን ኡቴዳ።

38 እት ጋላስ ሳናክሬብ ባረ ጾሳ ንስሮካ ጎልያን ጎይኒድ ደእሽን፥ አ ናናይ አድራመሌክነ ሳርኤጸር ማሻን አ ዎድኖ። አራራተ ግያ ቢታ ባቃቴድኖ። አ ናአይ አስራዶን አ ሳኣን ካተቴዳ። 37:38 አስራዶን: እ እብራዌ ቃላን "ኤሳር-ሀዶን" ጌተቴ።