ኢስያሳ 16

ሞኣባዉ ህዶታይ ባዋ

1 ሞኣባ አሳይ ባዙዋ ብያ ኦግያን ደእያ ሰላአ ካታማፐ ያላጋ ዶርሳ ኦርገቱዋ የሩሳላመን ደእያ ቢታ ሞድያዎ የድተ። 2 ሞኣባ ማጫ አሳይ ባረንቱ ደእያ ጎልያፐ ጋጻን ላለቴዳ ካፎቱዋዳን፥ አርኖና ሻፋ ፕንያ ሳኣን ላለታና።

3 ሞኣባ አሳይ ይሁዳ አሳ ሀዋዳን ያጋና፤ "ኑና ዞርተ፤ ሱረ ፕርድተ፤ ሴታ ጋላሳን ህንተ ኩዋ ቃማዳን ኩዋይተ። የደርሰትያዋንታ ቆስተ፤ ባቃት ዬዳዋንታካ አ እሞፕተ። 4 ሞኣባፐ የደርሴቴዳዋንቱ ህንተ ግዶን ደእኖ፤ ኡንቱንታ ይስያዋንቱፐ ኡንቱንቱ ቆሰት አትያሳ ግድተ። ኡንቱንታ ኡቁንያዋንቱ ዉሬድኖ፤ ባሻይ አቴዳ፤ ኡንቱንቱ ቱጋይያዋንቱካ ጋድያፐ ዬድኖ። 5 ሄዋፐ ጉይያን፥ እት ካተቱዋ አራታይ አገና ሲቁዋን ኤቃና፤ ሄ አራታን፥ ዳዊታ ዱንካንያን እት አማነትያ ዳናይ ኡታና። እ ሱረተ ኮያና፤ ጽሎተ ኦናዉካ ኤሌላና" ያጋና።

6 ይሁዳ አሳይ ሀዋዳን ያጋና፤ "ሞኣባ ጋድያ አሳይ አይ ኬና ኦቶረትንቶ፥ ኑ ኡንቱንቱ ኦቶሩዋባ ስሴዶ፤ ኡንቱንቱ አዩዋነ ኡንቱንቱ ሸቃካ ስሴዶ፤ ሽን ኡንቱንቱ ኦቶሩ ሀዳ" ያጋና።

7 ሄዋ ድራዉ፥ ሞኣበ ዬኮ፤ አሳይ ኡባይካ ሞኣባዉ ዬኮ፤ ቂርሄሬሳ ካታማን ህንተ ደእያ ዎደ ሜዳ ሎኦ ቁማ ሀሳዪደ ዬክተ። 8 ሀሰቦና ሾይቃቱነ ሲብማ ዎይንያ ቶክያ ሳአቱ ዬድኖ፤ ኡንቱንቶ ታሺ ያእዜራ ጋኪደ፥ ባዞ ዛኤዳ ዶረቴዳ ዎይነቱዋ ካዉተቱዋ ካፓቱ የደርሲደ ይሴድኖ፤ ኡንቱንቱ አጫይካ ዛኢደ፥ አባ ፕኔዳ። 9 ታን ያእዜራ ካታማዉ ዬክያዋዳን፥ ሲብማ ካታማ ዎይነቶካ ዬካይ። ሀሰቦናነ ኤልኣለ ካታማቶ፥ ታን ታ አፎን ህንተና ሆልሳያይ። አያዉ ጎፐ፥ ህንተ ም አይፍያነ ህንተ ቦቴዳ ካ ቦላን ኦላ ዋሱ ደንዴዳ። 10 ካ አይፍያን ኩሜዳ ሾይቃፐ ናሸቻይነ ሀሹ ጉሳይ አከቴዳ። ዎይንያ ቶክያ ሳንካ ማዝሙሪ የጸተና። ናሸቻን ዎይንያ ቴራ ጉምእያ ሳኣን ጉምእያባይ ባዋ። ታን ጉምእያዋንቱ እልልያ እልልሳካ ይሳድ። 11 ሄዋ ድራዉ፥ ታ ዎዛናይ ሞኣባዉ፥ ታ ጋርሳ አሳተይካ ቂርሄሬሳዉ ዲዳን ዋሴ። 12 ሞኣበ ባረ ቃ ሳኣ ቦፐነ፥ ጮ ባረና ዳቡርሴ፤ ቃይ እ ባረ ኤቃ ጎልያ ዎሳናዉ ቦፐካ፥ ሄዌ አ አይነ ማደና።

13 መና ጎዳይ ካሰቲደ፥ ሞኣበዋ ኦዴዳ ቃላይ ሄዋ። 14 ሽን ሀእ መና ጎዳይ ሀዋዳን ያጌ፤ "ኮንትራትያ ኦሳንቻ ላይ ፓይዱዋዳን፥ ሞኣባ ቦንቹነ አ ጮራተይ ሄዙ ላይቱዋ ግዶን ዉራና፤ አን አትያ አሳቱካ አማሬዳዋንታነ ዎልቃይ ባይናዋንታ ግዳናዋንታ" ያጌ።