ኢስያሳ 42

መና ጎዳ ቆማ

1 ታን ዘምፕሳደ ኦይኬዳ ታ ቆማይ፥ ታ ሸምፑ አን ናሸትያዌ፥ ታን ዶሬዳዌ ሀዎኮ። ታን ታ አያና አ ቦላ ዎድ፤ እ ካዉተቶ ሱረ ፕርዳ አሀና።✝42:1 ማቶሳ 3:17፤ 17:5፤ ማር. 1:11፤ ሉቃሳ 3:22፤ 9:35✝42:1-4 ማቶሳ 12:18-21 2 እ ዋሰና፤ ዎይ ባረ ቃላ ቂሰና፤ ዎይ ቃይ ባረ ቃላ ኦግያን ስሰና። 3 ትንጨቴዳ ሾምቦቁዋ እ መንና፤ ቃይ ሊአካቲደ ኤጽያ ሙቃዳካ እ ቶይሰና። እ አማነቲደ፥ ሱረ ፕርዳ አሀና። 4 እ ቢታን ሱረ ፕርዳ ኤሰናን ደኢደ አገና፤ ዎይ ጉየ ጌና። አባ ዶና ቢታቱዋን ደእያ አሳይ ኡባይ አ ህግያ ስሳናዉ ናጌ።

5 ጾሳይ መና ጎዳይ፥ ሳሎቱዋ መደ ምጬዳዌ፥✝42:5 ኪታ 17:24-25 ሳኣነ ሳኣፐ ከስያዋ ኡባ ኦዳዌ፥ ሳኣን ደእያ አሳዉ ሸምፑዋ እምያዌ፥ አን ሀመትያ ኡባዉ ደኡዋ እምያዌ ሀዋዳን ያጌ፤ 6 "ታን መና ጎዳ፤ ታን ኔና ጽሎተን ጼሳድ፤ ታን ነ ኩሽያ ኦይቃደ፥✝42:6 ኢሳ. 49:6፤ ሉቃሳ 2:32፤ ኪታ 13:47፤ 26:23 ኔና ናጋና። ታን ኔና ካዉተቶ ፖኦ ኦደ፥ ቃይ አሳዉካ ጫቁዋ ኦደ እማና። 7 ኔን ቆቅያ አይፍያ ዶያና ማላ፥ ኦሞደቴዳዋንታ ኦሞዱዋ ጎልያፐ ከሳና ማላ፥ ማን ደእያዋንታካ ቃሾ ጎልያፐ ከሳና ማላ፥ 8 ታን መና ጎዳ፤ ሄዌ ታ ሱን። ታ ቦንቹዋ ታን ሀራዉ እምከ፤ ታ ጋላታካ ማሰቲደ ጊጌዳ ምስለቶ እምከ። 9 በእተ፥ ካሰ ታን ኦዴዳዋንቱ ኡባይ ፖለቴድኖ። ሀእ ቃይ ታን ኦራባ አዋያይ፤ ኡንቱንቱ ሀናናፐ ካሰታደ ታን ህንተንቶ ኦዳይ" ያጌ።

ጋላታ የ

10 መና ጎዳዉ ኦራ ማዝሙርያ የጽተ፤

ቢታ ጋጻፐ ዶሚደ፥ አ ጋላታ ኦድተ።

አባ ቦላን ብያዋንቱነ፥

አን ኩሜዳ ኡባይካ አነ ዋስኖ።

አባ ዶና ቢታቱነ ኡንቱንቱን ደእያ ኡባይካ የጽኖ።

11 መላ ቢታይነ ባዙዋን ደእያ ካታማቱ፥

ቃይ ቄዳረ አሳይ ደእያ ሞቱካ፥

ባረንቱ ቃላ ቁ ኦኖ።

ሰላአ ግያ ካታማን ደእያዋንቱካ፥

ደርያ ሁጲያፐ ባረንቱ እልልሳ ስስኖ።

12 ኡንቱንቱ ቦንቹዋ መና ጎዳዉ እምኖ፤

አ ጋላታካ ጋጻ ቢታቱዋን አዋይኖ።

13 መና ጎዳይ ምኖ አሳዳን ከሳና፤

ኦላንቻ አሳዳን፥ እ ባረ ሀንቁዋ ደንና።

እ ዋሳና፤ ባረ ቃላካ ቁ ኦደ አዋያና።

እ ምኖ ግድያዋ ባረ ሞርከቱዋ በሳና።

ጾሳይ ባረ አሳ ማዳናዉ ቃላ ገሌዳ

14 ጾሳይ ሀዋዳን ያጌ፤

"አዱሳ ዎድያፐ ታን ሳሩዋን ታካድ፤

ጮኡ ጋደ ዳንዳያድ።

ሀእ የሉ ኦይኬዳ ምሽራቲዳን፥

ታን ዋሳና፤

ቶካ ቶካደ ሸምፓናነ ፔኑቃና።

15 ታን ደረቱዋነ ዞዘቱዋ ላላና፤

ኡንቱንቱን ሞኬዳዋ ኡባ መልሳና።

ሻፋቱዋ መላ ከሳና፤

ደልኤቱዋካ መልሳና።

16 "ታን ቆቀቱዋ ኡንቱንቱ ኤረና ኦግያና አሀና፤

ኡንቱንቱ ኤረና ሎሱዋናካ ካለና።

ኡንቱንቱ ስንን ደእያ ማ ፖኦ ላማና፤

ኮርጱኮርጳ ሳኣካ ሳላልሳና።

ሄዋንታ ታን ኡንቱንቶ ኦና፤

ታን ጌዳ ሀ የዎቱዋ ኦናን አግከ።

17 ሽን ማሲደ ጊግሴዳ ምስለቱዋን አማነትያዋንቱ፥

ቃይ ሲልሲደ ጊግሴዳ ምስለቱዋ፥

‘ህንተ ኑ ጾሳቱዋ’ ያግያዋንቱ፥

ጉየ ስማና።

ኡንቱንቱ ሙለ ዬላታና"

ያጌ።

እስራኤልያ አሳይ ታማረናን እጼዳ እጹዋ

18 ጾሳይ ሀዋዳን ያጌ፤ "ህንተኖ ቱለቶ፥ ስስተ፤ ህንተኖ ቆቀቶ፥ ህንተ በአና ማላ ጼልተ። 19 ታ ቆማፐ ሀራ ቆቂ ኦኔ? ታን ኪትያ ኡራፐ ሀራ ቱሊ ኦኔ? ጾሳዉ ዱማቴዳ ኡራዳን፥ ዎይ መና ጎዳ ቆማዳን ቆቃይ ኦኔ? 20 ዳሮባ ጼሊታ፤ ሽን አኬክክታ። ህንተንቱ ሀይቱካ ዶያ፤ ሽን ስስክኖ" ያጌ።

21 መና ጎዳይ ባረ ጽሎተ ድራዉ፥ ባረ ህግያ ግታያናዉነ ቦንቻናዉ ዶሴዳ። 22 ሽን ሀዌ አሳይ ቦንቀቴዳነ ዎ አከቴዳ። ኡንቱንቱ ኡባይካ ዲዛን ኦይቀቲደ፥ ቃሾ ጎልያን ቆሰቴድኖ። ኡንቱንቱ ቦንቀቴድኖ፤ ሽን ኡንቱንታ አሽያዌ ባዋ። ቃይ ኦሞደቴድኖ፤ ሽን ኦንነ፥ "ዛርተ" ያግያዌ ባዋ።

23 ህንተ ግዶፐ ሀዋ ስሳናዌ ኦኔ? ቃይ ስንፐ ያና ዎድያባ ሀይዛናዌ ኦኔ? 24 ያቆባ ኦሞድያዎ፥ እስራኤልያ ቦንቂያዎ አደ እሜዳዌ ኦኔ? አ ቦላን ኑን ናጋራ ኦዳ፥ አ ኦግያን ኡንቱንቱ ቤናን እጼዳነ አ ህግያዉካ ኡንቱንቱ አዛዘተናን እጼዳ መና ጎዳ ግደኔየ? 25 ሄዋ ድራዉ፥ እ ኡንቱንቱ ቦላ ባረ ሀንቁዋ ሱሉዋነ ያሽያ ኦላ ጉሴዳ፤ እ ኡንቱንቱ ዩሹዋን ታማ ኤዳ፥ ሽን ኡንቱንታ ኤርበይክኖ፤ እ ኡንቱንቱ ጹጌዳ፤ ሽን ኡንቱንቱ አኬክበይክኖ።