ኢስያሳ 11

ሳሮተይ ኩሜዳ ካዉተ

1 እሰይ ዱሩማፐ አጫይ ከሳና፤ አ ጻጱዋፐ አይፍያ ታሺ ከሳና።✝11:1 ሳፃ 5:5፤ 22:16 2 መና ጎዳ አያናይ፥ አዳ ኤራተነ አኬካ አያናይ፥ ዞርያነ ዎልቃ አያናይ፥ ኤራተነ መና ጎዳዉ ያይያ አያናይ አ ቦላ ሸምፓና። 3 መና ጎዳዉ ያይያዋን እ ናሸቴ፤ ባረ አይፊ በኤዳዋን ጮ ፕርደና፤ ዎይ ባረ ሀይይ ስሴዳዋን ጮ ፕርደና። 4 ሽን ህዬሳቶ እ ጽሉዋን ፕርዳና፤✝11:4 2 ተስ. 2:8 ሳኣን ደእያ መቶታንቻቱ የዉዋካ እ ሱረተን ፕርዳና። እ ባረ እንጻርሳ ጋትማን ሳኣ ሾጫና፤ ባረ ዶና ሸምፑዋን ኢታቱዋ ዎና። 5 ጽሎተይ አ ጼሳዉ ዳንጮ ግዳናዋ፤ አማነትያዌካ አ ምይያዉ ሳቂያ ግዳናዋ።✝11:5 ኤፈ. 6:14

6 ጄሪ ዶርሳ ማራና እትፐ ደአና፤✝11:6-9 ኢሳ. 65:25 ማሂካ ዴሻ ማራና እትፐ ግሳና፤ ሚዛ ማራና፥ ጋሙዋ ማራናነ እትፐ ሄመታና፤ ጉ ናእ ኡንቱንታ ሄማና። 7 ሚዛታነ ባባን ጌተትያ ዶአይ እትፐ ማና፤ ኡንቱንቱ ማራቱካ እትፐ ግሳና፤ ጋሙ ቦራዳን ኡቱላ ማና። 8 ን ምያ ናአይ ሾሻ ኦላን ካአና፤ ን ዱዳ ናአይ ዎያ ሾሻ ኦላን ባረ ኩሽያ የዳና። 9 ታ ጌሻ ደርያን ኦንነ ቆሄተና፥✝11:9 እምባ. 2:14 ዎይ ባየና፤ አያዉ ጎፐ፥ አባይ ሃን ኩምያዋዳን፥ ሳአይ መና ጎዳ ኤርያዋን ኩማና።

በቴዳ አሳይ ስምያ ስሙዋ

10 ሄ ጋላስ እሰይ ጻጱ አሳዉ ማላታ ግዲደ ኤቃና፤ ካዉተ ኡባይ አ ኮያና፤ እ ደእያ ሳአይካ ቦንቼታና።✝11:10 ሮመ 15:12 11 ሄ ጋላስ ጎዳይ ባረ አሳ አቶተ አሶረፐ፥ ግብጼፐ፥ ፓትሮሳፐ፥ ቶጵያፐ፥ ኤላማፐ፥ ባብሎነፐ፥ ሀማታፐነ አባ ዶናን ደእያ ቢታቱዋፐ ላኤንዋ ዛር አካናዉ ባረ ኩሽያ የዳና። 12 ካዉተቶ ማላታ እ ቁ ኦደ ደንና፤ እስራኤልያፐ ላለቴዳዋንታ እትፐ ጋና፤ ይሁዳፐ ፕስክ ጌዳዋንታካ ሳኣ ኦይዱ ሚዛናፐ እ ሺሻና።

13 ሄዋፐ ጉይያን፥ ኤፍሬማ ቃናቲ አፐ ሻከታና፤ ቃይ ይሁዳ ዋይስያዋንቱካ ቆለት ያና። ኤፍሬመ ይሁዳ ቃናተና፤ ይሁዳይካ ኤፍሬማ ዋይሰና። 14 ኡንቱንቱ አዋይ ዉልያ ባጋን ደእያ ፕልስጼማ ጋድያ ቦላ ፓሊደ ዎና፤ አዋይ ዶልያ ባጋን ደእያ አሳካ ኡንቱንቱ እትፐ ቦንቃና። ኡንቱንቱ ኤዶማ ቦላነ ሞኣባ ቦላ ባረንቱ ኩሽያ ዎና፤ አሞናቱካ ኡንቱንቶ አዛዘታና። 15 መና ጎዳይ ግብጼ ምይያን ደእያ ዞኦ አባ ኡባና መልሳና፤ ባረ ላጽያ ጫርኩዋና ባረ ኩሽያ ኤፍራጺሳ ሻፋ ቦላ ደንና። ያቲደ አሳይ መላ ኤለካ ፕናና ማላ፥ ላፑን ቄር ሻፋ ከሲደ ሾጫና።✝11:15 ሳፃ 16:12 16 እስራኤልያ አሳይ ግብጼ ጋድያፐ ከስያ ዎደ ኦጊ ደኤዳዋዳን፥ አ አሳፐ አቴዳዋንቶ አሶረ ጋድያፐ ከስያ ኦጊ ደአናዋ።