ኢስያሳ 10

1 ኢታ ህግያ ከስያዋንቶነ ኡቁንያ ጹፍያ ጻፍያዋንቶ አየ አና! 2 ሄዋን ኡንቱንቱ ማንቆቱዋ ፕርዳ ጌላዪኖ፤ ህዬሳቱዋ ማታካ ሱጊኖ። ያቲደ አምኤቱዋ አቁዋነ አታ አዉ ባይና ናናቱዋካ ቦንቂኖ። 3 ሃኮ ጋድያፐ ይያ መቱዋን እ ህንተና ሙሪያ ዎደ፥ ዋኒቴ? ማዱዋ ደማናዉ ኦኮ ባቃቲቴ? ህንተ ዱረተ ሀቃን ቆሲቴ? 4 ህንተ ኦላን ሀይቃና፤ ቃቺደ ጎችና፥ ህንተ ባና። ሄዌ ኡባይ ሀንናካ፥ ጾሳ ሀንቁ ዉርቤና፤ ሙራናዉ እ ባረ ኩሽያ የድ ዎዳ።

አሶረ ካቲ ፕርደታና

5 ጎዳይ ሀዋዳን ያጌ፤ "ታ ይሎ ጋትማ ግዴዳነ ታ ኤጽያ ሀንቆ ጻምኣ ግዴዳ አሶረ ጋድያ አሳዉ አየ አና!✝10:5-34 ኢሳ. 14:24-27፤ ናሆማ 1:1—3:19፤ ሶፎ. 2:13-15 6 ታን አሶረቱዋ ጾሳ ኤረና ካዉተ ቦላ ኪታና፤ ኡንቱንቱ ዱረታ ኡባ ኦሞዳናዳንነ ቦንቃናዳን፥ ቃይ ኦግያን ደእያ ኡርቃዳን፥ ኡንቱንታ የናዳን፥ ታና ሀንቀዳ አሳ ቦላ ታን አሶረቱዋ አዛዛና" ያጌዳ።

7 ሽን አሶረ ካቲ ሀዋ ሀልችቤና፤ አ ዎዛናይካ ሀዋዳን ቆፕቤና። እ ሀልቼዳዌ ካዉተቱዋ ኡባና ይሳናሳ። 8 እ ጬቀቲደ፥ ሀዋዳን ያጌዳ፤ "ታ ጋዳዋቱ ኡባቱ ካትያ ግድክኖየ? 9 ካልኖ ካታማይ ካርካሚሻ ካታማ ማላ ግደኔየ? ሀማታ ካታማይ አርፋዳ ካታማ ማላ ግደኔየ? ሳማርያ ካታማይካ ዳማስቆ ካታማ ማላ ግደኔየ? 10 የሩሳላመንነ ሳማርያን ደእያ ማሰቴዳ ኤቃ ምስለቱዋፐ ዳርያ ምስለቶ ጎይንያ ካዉተቱዋ ሙራናዉ፥ ታን ታ ኩሽያ የዳድ። 11 ታን ሳማርያ ካታማ ቦላነ አን ደእያ ኤቃ ምስለቱዋ ቦላ ኦዳዋዳን፥ የሩሳላመ ካታማ ቦላነ አ ኤቃቱዋ ቦላ ኦክታየ?" ያጌዳ።

12 ጎዳይ ጽዮነ ደርያ ቦላነ የሩሳላመ ቦላ ባረ ኦያ ኦሱዋ ኡባ ፖሌዳዋፐ ጉይያን፥ አሶረ ጋድያ ካትያ አ አዩዋነ አ ኦቶሩዋ ሙራና። 13 አያዉ ጎፐ፥ አሶረ ካቲ ሀዋዳን ያጌ፤ "ታ ኩሽያ ምኖተን፥ ታ አዳ ኤራተንነ ታዉ ደእያ አኬካን ታን ሀዋ ኡዳድ። ታን ካዉተቱዋ ግዶን ደእያ ዛዋቱዋ ሾዳድ፤ ኡንቱንቱ ቢታቱዋን ደእያ አሳ አቁዋ ቦንቃድ፤ ታ ምኖ ቀስያን፥ ካተቱዋ አራታቱዋን ኡቴዳዋንታ ኡባ ዱገ ዎድ። 14 አሳይ ካፉዋ ጎልያን ኩሽያ የድያዋዳን፥ ታን ካዉተ ዱረተ ቦላ ታ ኩሽያ የዳድ። ቃይ ዶገቲደ አቴዳ ቁቁለቱዋ ሺሽያዋዳን፥ ታን ቢታ ኡባ ሺሻድ። ፓላናዉ ባረ ቀፍያ ባቂያባይ፥ ዎይ ሃሳያናዉ ባረ ዶና ፖግያባይ፥ ዎይ ቃይ ዋስያዌ እቱነ ባዋ" ያጌዳ።

15 ቱሙ ካልታይ ባረናን ቃንጽያ ብታንያፐ፥ "ታን አይ" ጋናዉ ዳንዳዪየ? ዎይ ማጋዚ ባረና ጎችያ ብታንያፐ፥ "ታን ዳራይ" ጊየ? ጻምአይ ባረና ኦይቂያ አሳ ደን? ጉፊ ኦይቂያ አሳይ ባይናን ሀመቲ? 16 ሄዋ ድራዉ፥ ጎዳይ፥ ኡባፐ ዎልቃማ መና ጎዳይ፥ አ ምኖ ቶራንቻቱዋ ቦላ ላፈያ ሀርግያ የዳና፤ አ ቦንቹዋፐ ጋርሳና ምሹ ኤጽያ ታማዳን ኤጽ ከሳና። 17 እስራኤልያ ፖኡ ታማ ግዳናዋ፤ እስራኤልያ ጌሻይካ ላጩዋ ግዳናዋ፤ ያቲደ አ አጉንነ አ ክንድቹዋ እት ጋላስ ጹጋናነ ማና። 18 ጾሳይ ባረ ዎራ ም ቦንቹዋነ ባረ አራዳ ጋድያ ቦንቹዋ ይሳና፤ ስም ሄዌ ሀርግያ አሳይ ስልያዋዳን ስላና። 19 አ ዎራን አታና ምቱ ሎይ ጉ ግድያ ድራዉ፥ እት ጉ ናአይካ ፓይድ ዉርሳናዋ።

አማሬዳዋንቱ ስሙዋ

20 ሄ ጋላሳን እስራኤልያፐ አቴዳዋንቱ ባረና ሾጬዳዋንቱን ዘምፕክኖ፤ ሽን ኡንቱንቱ ቱሙዋፐ መና ጎዳን፥ እስራኤልያ ጌሻን ዘምፓና። 21 አተይ፥ ይሁዳ አሳ አተይ ዎልቃማ ጾሳኮ ስማና። 22 ኔኖ እስራኤልያዉ፥ ነ አሳይ አባ ማታን ደእያ ሻፍያ ኬሻ ግዶፐካ፥ ኡንቱንቱፐ አማሬዳዋንቱ ጻላላይ ስማና። ጽሎተይ ኩም ፓላሄዳ ባሻይ አዋየቴዳ።✝10:22-23 ሮመ 9:27 23 ኤ፥ ጎዳይ፥ ኡባፐ ዎልቃማ መና ጎዳይ ሳኣ ኡባ ቦላን አሀናዉ ቃቼዳ ባሻ አሀና።

ጾሳይ አሶራ ሙራና

24 ሄዋ ድራዉ፥ ጎዳይ፥ ኡባፐ ዎልቃማ መና ጎዳይ ሀዋዳን ያጌ፤ "ጽዮነን ደእያ ታ አሳቶ፥ ግብጼቱ ኦዳዋዳን፥ አሶረቱ ህንተና ጻምአን ሾጭያ ዎደነ ባረንቱ ጋትማ ህንተ ቦላ ደንያ ዎደ ያዮፕተ። 25 ጺ ጉ ዎድያፐ ጉይያን፥ ታን ህንተና ሀንቀትያዋ አጋና፤ ሄዋፐ ጉይያን፥ ታ ሀንቁ ኡንቱንታ ይሳናዉ ባና" ያጌ።

26 ኡባፐ ዎልቃማ መና ጎዳይ ኦሬባ ግያ ሹቻ ማታን ሚድያማቱዋ ሾጬዳዋዳን፥ ኡንቱንቱ ቦላ ልሱዋ ደንና። እ ግብጼን ኦዳዋዳን፥ ባረ ጋትማ አባ ቦላ ደንና። 27 ሄ ጋላስ፥ አ ቶኩ ህንተ ሀሽያፐ ዎና፤ አ ሞርገ ምይካ ህንተ ሞርግያፐ ክቻና። ህንተ ኦርዴዳ ድራዉ፥ ሞርገ ምይ መአና።

ዎራጅያዋንቱ ኦሌዳ ኦላ

28 ሞርክያ ዎታዳራቱ አታ ካታማ ገሌድኖ፤ ምግሮናን አድኖ፤ ባረንቱ ኦላ ሚሻካ ምክማሳ ካታማን ዎድኖ። 29 ኡንቱንቱ ጋድያ አያሳና ፕኒደ፥ ገባአ ካታማን አቄድኖ። ራማ ካታማን ደእያ አሳይ ኡባይ ኮኮሬዳ፤ ካትያ ሳኦላ ካታማን ግብአን ደእያ አሳይካ ባቃቴዳ። 30 ጋሊማ አሳዉ፥ ዋሱዋ ጹልስተ! ላይሻ አሳዉ፥ ስስተ! አናቶታ ካታማን ደእያ አሳዉ፥ ኦችያዋ ኦድተ! 31 ማድሜና ግያ ካታማ አሳይ ባቃቴዳ፤ ገቢማ አሳይካ ባረ ሸምፖ ቆሰቴዳ። 32 ሀቼ ሞርክያ ዎታዳራቱ ኖባ ካታማን ደኢኖ፤ ያን ኡንቱንቱ ባረንቱ ኩሽያ ቃደ፥ ጽዮነ ደርያ፥ የሩሳላመ ካታማ ባብሲኖ።

33 በእተ፥ ጎዳይ፥ ኡባፐ ዎልቃማ መና ጎዳይ ቃንካቱዋ ዎልቃማ ዎልቃን ቃንጻና፤ አዱቄዳ ምቱካ ቃንጸታና፤ ቃይ ቦንቼቴዳዋንቱካ ካዉሻና። 34 ጾሳይ ስኬዳ ዎራ ካልታን ቃንጻና፤ ሊባኖስካ ዎልቃማ ስንን ኩንዳና።