1 ጾሳይ ሀዋዳን ያጌ፤ "ነ ቃላ ቁ ኦደ ዋሳ፤ ጉየ ጎፓ። ነ ኮሻ ማላካታዋዳን ቂሳ። ታ አሳዉ ኡንቱንቱ ማካላ፥ ያቆባ ጎልያ አሳዉካ ኡንቱንቱ ናጋራ ኦዳ። 2 ሽን ኡንቱንቱ ታና ሀች ሀች ኮዪኖ፤ ታ ኦግያካ ካላናዉ ዶስያዋ ማላቲኖ። ጽሎባ ኦዳ ካተተዳንነ ጾሳ አዛዙዋ ኦልቤና አሳዳን፥ ኡንቱንቱ ታና ሱረ ፕርዳ ኦቺኖ፤ ታኮ ጾሳኮ ሺቃናዉካ ዶሲኖ" ያጌ።

3 ኡንቱንቱ ሺቂደ ጾሳ፥ "ኑን ጾሜዶ፤ ሽን ኔን አያዉ ኑና ጼላበይኪ? ኑን ኑናተ ካዉሼዶ፤ ሽን ኔን ኑና አያዉ ኤራበይኪ?" ያጊኖ።

ጾሳይ ዛሪደ፥ ኡንቱንታ ሀዋዳን ያጌ፤ "በእተ፥ ህንተ ጾምያ ጋላስ ህንተና ናሸችያባ ኦታ፤ ህንተ ኦሳንቻ ኡባ ኡቁኒታ። 4 በእተ፥ ህንተ ዋላሳዉነ ዋታዉ ጾሚታ፤ ቃይ መቀ ባይና ደሸ ደቻናዉ ጾሚታ። ሀቼ ህንተ ጾምያ ሀዋ ማላ ጾማይ፥ ህንተ ቃላይ ቦላን ስሰታናዳን ኦና። 5 ታን ዶርያ ጾማይ ሀዋ ማሌየ? እት አሳይ ባረናተ ካዉሽያዌ ሀዋ ማላ ጋላሳኔየ? ቃይ ታን ኮይያ ጾማይ አሳይ ባረ ሁጲያ ጬጫዳን ዱገ ሆክስያዌየ? ብድን ቆሊደ፥ ማቃ ሂጺደ ግስያዌየ? ያትና፥ ሄዋ ጾማ ጊደ ጼጊቴየ? ቃይ ሄ ጾምያ ጋላሳይካ መና ጎዳይ ናሸትያ ጋላሳ ጌተቲየ?

6 "ታን ዶሬዳ ጾማ ሀዋ በእተ፦ ፕርዳን ናቂደ ቃቼዳዋንቱ ሳንሳላታ ለፕያዋ፥ ሞርገ ም ጎንያ ብልያዋ፥ ኡቁነቴዳዋንታ ኡቁኑዋፐ ከስያዋነ ሞርገ ም ኡባ መንያዋ። 7 ቃይ ታን ዶሬዳ ጾማይ ኮሻቴዳዎ ህንተ ቁማ ሻክያዋ፥ ጎሊ ባይና ህዬሳቱዋ ጎልያ አክያዋ፥ ካሎቴዳዋንታ በእያ ዎደ፥ ማይዝያዋ፥ ማዱዋ ኮይያ ህንተ ዳቡዋፐ ህንተ ዴሙዋ ገንናን አግያዋ።✝

8 "ያቶፐ፥ ህንተ ፖኡ ዎንታ ጻልቂያዳን ፖአና፤ ህንተ ፓጻተይካ ኤለካ ያና። ህንተ ጽሎተይ ህንተፐ ስንና ባና፤ መና ጎዳ ቦንቹካ ህንተፐ ጉየና ግዲደ፥ ህንተና ናጋና። 9 ሄ ዎደ ህንተ ጼሳና፤ መና ጎዳይ ህንተንቶ ኮያና። ህንተ ማዱዋ አካናዉ ዋሳና፤ እካ፥ ‘ሄኮ፥ ታን ሀዋን ደአይ!’ ያጋና።

"ህንተ ግዶፐ ህንተ ኡቁንያ ሞርገ ም ድጎፐ፥ ቃይ ብራያን ማላትያዋነ ኢታባ ሃሳይያዋ አጎፐ፥ 10 ኮሻቴዳዋ ቁማ ሙዚደ ካልሶፐ፥ ናቀቴዳዋ እ ኮይያዋ ካልሶፐ፥ ሄ ዎደ ህንተ ፖኡ ማን ፖአና፤ ህንተ ቃማይካ ሴታ ጋላሳ ግዳናዋ። 11 መና ጎዳይ ህንተና ኡባ ገደ ካለና፤ ህንተና መላ ባዙዋን ኮሽያዋካ እ ህንተዉ ኩንና። ህንተ ቦላ ጻጱዋካ ምንሳና። ቃይ ህንተ ሃ ኡሽያ ገነትያ ማላነ አ ሃይ ሙለካ ቶኤና ፑልቱዋ ማላ ግዳናዋ። 12 በን ኮለቴዳዋንታ ህንተ ዛረደ ኬጻና፤ ዳሮ ዎድያፐ ካሰ ባሰቴዳ ባሶቱካ ኬጸቲደ ቁ ጋና። ህንተካ ኮለቴዳ ግምበቱዋ ዛረደ ግምቢያዋንታነ አሳይ ደእያ ሳአቱዋን ኦግያ ከስያዋንታ ጌተት ጼሰታና" ያጌ።

13 ቃይካ ጾሳይ ሀዋዳን ያጌ፤ "ሳምባታ መና ጎዳዉ ዱማ ጋላሳዳን ጼሎፐ፥ ሄ ታ ጌሻ ጋላስ ህንተ ጎኣ የደርስያዋንታ ግዳና ዮፐ፥ ሳምባታ ናሸችያነ ቦንቼቴዳ ጾሳ ጋላሳ ቦንቹዋ ጊደ ጼሶፐ፥ ቃይካ ህንተ ህንተ ኦግያ ቤናን አጊደ፥ ቦንችያዋ ግዶፐ፥ ዎይ ህንተና ናሸችያባ ኦናንነ ሀዳባ ሃሳየናን አጎፐ፥ 14 ሄ ዎደ ህንተ መና ጎዳን ናሸታና። ቃይ ታን ህንተና ዳሮ ቦንቼቴዳዋንታ ኦና፤ ህንተ አዉዋ ያቆባ ጋድያፐ ላተቴዳዋ ህንተ ማናዳን፥ ታን ህንተና ኦና። ታን መና ጎዳይ ሀዋ ሃሳያድ" ያጌ።