1 ካቲ ኦዝያነ ሀይቄዳ ላይ ጎዳይ ቦላንነ ቃ አራታን ኡቴዳዋ በኣድ፤ አ ማዩ ጌሻ ጎልያ ኩሜዳ።✝ 2 ሱራፌላ ጌተትያ ኪታንቻቱ አፐ ቦላና ደኢኖ፤ እት እት ሱራፌልያዉ ኡሱፑን ቀፈቱ ደኢኖ፤ ላኡ ቀፈቱዋን ባረ ሶምኡዋ ካሜ፤ ላኡ ቀፈቱዋን ባረ ገድያ ካሜ፤ ላኡ ቀፈቱዋን ፓሌ። 3 እቱ እቱዋና፥ "ጌሻይ፥ ጌሻይ፥ ጌሻይ ኡባፐ ዎልቃማ መና ጎዳ! ሳኣ ኡባይ አ ቦንቹዋን ኩሜዳ" ያጊደ ጼሰቴድኖ።✝ 4 ኡንቱንቱ ጼሳ ኮሻን ጌሻ ጎልያ ባሱ ቃጼዳ፤ ቃይ ጌሻ ጎሊ ጩዋን ኩሜዳ።✝

5 ያትና፥ ታን፥ "ታዉ አየ አና! ታን ባያድ፤ አያዉ ጎፐ፥ ታን ዶናይ ቱኔዳ አሳ፤ ቃይ ዶናይ ቱኔዳ አሳቱዋ ግዶን ደአይ፤ ታን ካትያ፥ ኡባፐ ዎልቃማ መና ጎዳ ታ አይፍያን በኣድ" ያጋድ።

6 ሱራፌላቱዋፐ እቱ ያርሽያ ሳኣፐ ቃጴዳ ታማ ቦንቁዋ አኪደ ፓሊደ፥ ታኮ ዬዳ። 7 ታማ ቦንቁዋን ታ ዶና ቦቺደ፥ "በአ፤ ሀ ታማ ቦንቁ ነ ዶና ቦቼዳ፤ ነ ባይዙ ኔፐ ክቼዳ፤ ነ ናጋራይካ አቶ ጌተቴዳ" ያጌዳ።

8 ሄዋፐ ጉይያን ጎዳይ፥ "ኦና ኪቶ? ኑዉ ኦኔ ባናዌ?" ያግሽን ስሳድ። ሄዌካ፥ "ሄኮ፥ ታና ኪታ" ያጋድ።

9 ጎዳይ ሀዋዳን ያጌዳ፤ "ባ፤ ሀ አሳዉ፥ ‘ህንተ ስሳ ስሲታ፤ ሽን ህንተንቶ ገለና፤ ጼሉዋካ ጼሊታ፤ ሽን በእክታ’ ያጋደ ኦዳ።✝ 10 ሀ አሳ ዎዛና ዶንጭልሳ፤ ኡንቱንቱ ሀይካ ቱልሳ፤ ኡንቱንቱ አይፍያካ ቆቅሳ፤ ሄዌ ዮፐ፥ ኡንቱንቱ ባረንቱ አይፍያን በአና፤ ባረንቱ ሀይን ስሳና፤ ባረንቱ ዎዛናንካ አኬካና፤ ያቲደ ኡንቱንቱ ታኮ ስማናነ ፓጻና" ያጌዳ።

11 ያትና፥ ታን፥ "አቤት ጎዳዉ! ሀዌ አይደ ጋካናሴ?" ያጋድ።

እ ዛረደ፥ "ካታማቱ ደእያ አሳ ዪደ፥ ኮለታና ጋካናሳ፥ ጎለቱካ ኦናና ጋካናዉነ ቢታይካ ኡባና መላ ግዳና ጋካናሳ። 12 ታን መና ጎዳይ አሳ ሃሳና፤ ቢታካ መላ ከሳና። 13 ታሙ አሳፐ እት አሳይ ጋድያ ቦላ አቶፐ፥ እካ ያና፤ ቃንጽ ድግና አቴዳ ዎላ ዱሩማ ማላ ግዳናዋ፤ ሄ ዱሩማይ ጌሻ ዘረ ግዳናዋ" ያጌዳ።