1 Paulus, Jesus Christus sien Apostel, derch Gott sien Wellen, un Timotäus, de Brooda, aun Gott siene Jemeent, dee en Korint es, met aul de Heilje, dee en gaunz Achaja sent: 1Kor 1:1 2 Jnod met junt un Fräd von Gott, onsem Voda, un däm Harn Jesus Christus!

3 Jeloft es de Gott un Voda von ons Har Jesus Christus, de Voda von Erboarmungen un Gott von aulem Troost, Ree 15:5 4 dee ons treest en aul onse Triebsaul, daut wie uk dee treesten kjennen, dee en irjent Triebsaul sent, met däm Troost, met däm wie selfst jetreest woaren von Gott. 5 Wiels soo aus Christus siene Lieden en ons rikjlich sent, soo es uk derch Christus ons Troost rikjlich. Ps 34:20; 94:19; Ree 8:17 6 Oba wan wie bedrenjt woaren, es daut fa junen Troost un Radunk, dee bewirkjt* woat em Derchhoolen en deeselwje Lieden, dee uk wie lieden. Ooda wan wie jetreest woaren, es et fa junen Troost un Radunk. 2Kor 4:8-11,15 7 Un onse Hopninj to junt steit faust un weeten, daut jrod soo aus jie Deelnäma sent aun de Lieden, soo uk aun däm Troost. 8 Wiels wie wellen nich, Breeda, daut jie onweetent sent äwa onse Triebsaul, dee ons en Asien passieet es, daut wie Äwamoten bedrekjt wieren, äwa daut Vemieejen, soo daut wie selfst aum Läwen vezoagden; Apj 19:23-40; 1Kor 15:32 9 oba wie hauden daut Uadeel toom Doot en ons selfst, soo daut wie nich sullen opp ons selfst vetruen, oba opp Gott, Dee de Doodje opperwakjt, 10 Dee ons von soonem grooten Doot jerat haft un noch rat, en wäm wie hopen, daut Hee ons noch raden woat. 11 Jie halpen uk doamet derch Jebäd fa ons, om daut fa de Jnodengow, von väle Persoonen aun ons jejäft, derch väle fa ons mucht Dank jejäft woaren. Flp 1:19

12 Wiels ons Rum es dit: Daut Zeichnis von ons Jewessen, daut wie en Eenfachheit un jettliche Reinheit, nich en fleeschliche Weisheit, oba derch Gott siene Jnod, hab wie en de Welt jewaundelt, aum mieeschten oba bie junt. 1Kor 1:17; 2Kor 2:17; Heb 13:18 13 Wiels wie schriewen junt nuscht aundret, aus waut jie läsen ooda uk aunerkjanen; oba ekj hop, daut jie daut bat aum Enj aunerkjanen woaren; 14 jrod soo aus uk jie ons toom Deel aunerkjant haben, daut wie jun Riemen sent, soo aus uk jie ons sent aun däm Harn Jesus sien Dach. 2Kor 5:12; Flp 2:16 15 Un en dit Vetruen wull ekj aul ea no junt komen, soo daut jie muchten eenen tweeden Jenotten haben, 16 un derch junt no Mazedonien reisen un wada von Mazedonien no junt komen un von junt no Judäa opp dän Wajch jeholpen woaren. 1Kor 16:5-6 17 Aus ekj dit aulsoo plond, haundeld ekj jlikjeltich? Ooda waut ekj plond, plond ekj daut nom Fleesch, soo daut mien Jo Jo un Nä Nä wia? 18 Oba, soo aus Gott tru es, wia ons Wuat aun junt nich Jo un Nä. 19 Wiels Gott sien Sän, Jesus Christus, dee mank junt derch ons jeprädicht worden es, derch mie un Silvanus un Timotäus, wia nich Jo un Nä, oba daut wia Jo en Am. Apj 18:5 20 Wiels aul de Vespräakjungen von Gott en Am sent Jo un en Am Amen, to Gott siene Harlichkjeit derch ons. Opb 3:14 21 Un nu, dee, waut ons met junt en Christus faust-moakt, un ons jesaulft haft, es Gott, 1Joh 2:27 22 dee ons uk vesäajelt haft un jeef de Auntolinj, dän Jeist, en onse Hoaten. Ree 8:16; 2Kor 5:5; Efs 1:13 23 Ekj oba roop Gott aun aus Zeij opp miene Seel, daut ekj, om junt to schoonen, noch nich no Korint jekomen sie. 24 Nich, daut wie äwa junen Gloowen harschen, oba daut wie Methelpa sent aun june Freid; wiels jie stonen derch dän Gloowen. 2Kor 4:5; 1Pe 5:3