1 To riemen nuzt mie werkjlich nuscht; oba ekj well opp de Visionen un Openboarungen von däm Harn komen. 2 Ekj kjand eenen Mensch en Christus, ver vieetieen Joa, (auf em Kjarpa, weet ekj nich, ooda buta däm Kjarpa, weet ekj nich; Gott weet daut) wort dee oppjenomen bat en dän dredden Himmel. 3 Un ekj kjand soonen Mensch, (auf em Kjarpa ooda buta däm Kjarpa, weet ekj nich; Gott weet daut) 4 daut dee em Paradies oppjenomen wort un hieed onutspräakjelje Wieed, woone däm Mensch nich erlaupt sent to sajen. 5 Äwa dän well ekj mie riemen, oba äwa mie selfst woa ekj mie nich riemen, buta en miene Schwakheiten. 2Kor 11:30 6 Wiels wan ekj mie riemen wull, wudd ekj nich noarisch sennen; wiels ekj wudd de Woarheit sajen. Oba ekj hool mie trigj von daut, soo daut kjeena mea von mie denkjt, aus hee aun mie sitt ooda von mie hieet. 2Kor 10:8 7 Un om daut ekj mie nich Äwamoten erhäw wäajens de groosoatje Openboarungen, wort mie een Stachel em Fleesch jejäft, een Enjel vom Soton, mie met Fusten to schlonen, om daut ekj mie nich Äwamoten erhäw. 8 Fa dit prachad ekj dän Harn dreemol, om daut dee mie veloten wudd. 9 Un Hee haft to mie jesajcht: Miene Jnod es jenuach fa die; wiels miene Krauft woat en de Schwakheit vollkomen. Doawäajen well ekj mie aum leefsten väl mea met miene Schwakheit riemen, om daut Christus siene Krauft en mie wonen wudd. 10 Doawäajen sie ekj mootich en Schwakheiten, en Schoden-Lieden, en Nooten, en Vefoljungen, en Enjsten, fa Christus; wiels wan ekj schwak sie, dan sie ekj stoakj. Flp 4:13

11 Ekj sie noarisch jeworden em Riemen; jie haben mie doatoo jedwungen. Wiels ekj haud von junt sult väajeloft woaren, wiels ekj sie en nuscht hinja de utjetieekjende Apostel, wan ekj uk nuscht sie. 2Kor 11:5 12 Woarhauftich sent een Apostel siene Tieekjens mank junt jewirkjt worden en aule Jedult, en Tieekjens un Wunda un majchtje Doten. Ree 15:19; Heb 2:4 13 Wiels waut es daut, wuarenn jie weinja wieren aus de aundre Jemeenten, buta daut ekj selfst junt nich eene Laust wia? Vejäft mie dit Orrajcht. 2Kor 11:7-9

14 Seet, daut dreddemol sie ekj reed, no junt to komen, un woa junt nich eene Laust sennen; wiels ekj sieekj nich daut Junje, oba junt. Wiels de Kjinja sellen nich fa de Elren Schaza saumlen, oba de Elren fa de Kjinja. 15 Ekj oba well jieren hanjäwen un hanjejäft woaren fa june Seelen, uk wan ekj junt je mea leew, doch weinja jeleeft woa. Flp 2:17 16 Oba lot et nu soo sennen, ekj hab junt nich belausticht; oba wiels ekj schlau sie, hab ekj junt met Lest jefangen. 17 Hab ekj oba irjentwäm utjenuzt derch deejanje, dee ekj no junt jeschekjt hab? 18 Ekj ermond Titus un schekjt noch eenen Brooda met am; haft Titus junt utjenuzt? Hab wie nich en dämselwjen Jeist jewaundelt? nich en deeselwje Footstaupen? 2Kor 8:6,16-18

19 Noch eenmol, meen jie, daut wie ons selfst ver junt veteidjen? Wie räden ver Gott en Christus; oba Jeleewde, daut aula fa june Oppbuunk. 20 Wiels ekj fercht, wan ekj kom, ekj junt nich soo finj, aus ekj well, un daut ekj mank junt soo befungen woa, aus jie nich wellen, daut veleicht Striedarieen, Aufgonst, Oaja, Zenkjarieen, Raufräden, Fuschlen, Oppblosen un Opprua doa sent; 2Kor 10:2 21 daut, wan ekj wadakom, mien Gott mie mank junt deemooticht un ekj äwa väle truaren mott, dee verhäa jesindicht un nich Busse jedonen haben von de Onreinichkjeit un Huararie un Fleescheslost, dee see jedräwen haben. 2Kor 13:2