1 Oba wie loten junt weeten, Breeda, von Gott siene Jnod, dee en de Jemeenten von Mazedonien jejäft worden es, Ree 15:26 2 daut en eene groote Proow von Triebsaul, de Äwafluss von äare Freid un deepe Oamoot, doch äwaschäld em Rikjtum von äare Friejäwrichkjeit. 3 Wiels no äa Vemieejen, jäw ekj Zeichnis, un äwa äa Vemieejen, wieren see von selfst wellich, 4 un bedden ons met väl Ermonen, de Jnodengow un de Jemeenschoft von däm Deenst fa de Heilje opp to nämen. Apj 11:29 5 Un nich bloos, soo aus wie hopten, oba see jeewen sikj selfst, ieeschtens no däm Harn un dan no ons, derch Gott sien Wellen, 6 soo daut wie Titus ermonden, daut hee, doano aus hee ea aul aunjefongen haud, aulsoo uk bie junt dise Jnodendot verechten sull. 7 Oba soo aus jie en aules äwaflissich sent, em Gloowen un Wuat un Erkjantnis un en aulem Fliet un en june Leew to ons, seet, daut uk jie en dise Jnod äwaschälen. 1Kor 1:5; 16:1-2

8 Ekj saj dit nich aus een Jeboot, oba wäajens dän Fliet, waut aundre haben, un om june ajchte Leew to proowen. 9 Wiels jie kjanen de Jnod von ons Har Jesus Christus, daut Hee, wan Hee uk rikj wia, om junt-haulwen oam wort, om daut jie derch siene Oamoot rikj worden. Mat 8:20; Flp 2:7 10 Un ekj jäw miene Meeninj hiarenn; wiels dit es junt nutzboa, dee jie von väajet Joa aul aunjefongen haben, nich bloos daut Doonen, oba uk daut Wellen. 11 Nu oba vollbrinjt uk daut Doonen, om daut, jrod soo aus daut Reedsennen toom Wellen doa wia, soo uk daut Vollbrinjen doa es, doano aus waut jie haben. 12 Wiels wan daut Reedsennen doa es, dan es eena aunjenäm, doano aus eena haft, un nich doano, aus eena nich haft. Spr 3:27-28; Mrk 12:43 13 Ekj saj dit nich, om daut aundre daut leichta haben, jie oba Bedrenjnis, oba om eenen Utjlikj, 14 daut nu en dise Tiet jun Äwafluss fa jane äa Bederfnis deent; daut uk jane äa Äwafluss fa jun Bederfnis mucht deenen, om daut doa een Utjlikj es, 15 soo aus jeschräwen steit: "Wäa väl saumeld, haud nich Äwafluss, un wäa weinich saumeld, haud nich Mangel." 2Mo 16:18

16 Oba to Gott een Dank, Dee dänselwjen Iewa fa junt en Titus sien Hoat jejäft haft; 17 wiels hee neem de Ermonunk werkjlich aun, oba wiels hee iewaja wia, es hee friewellich no junt jereist. 2Kor 8:6; 7:7,15 18 Un wie haben dän Brooda met am jeschekjt, däm sien Low aum Evangelium derch aule Jemeenten jeit. 2Kor 12:18 19 Un nich bloos daut, oba hee es uk von de Jemeenten jewält worden aus ons Reispoatna met dise Jnodengow, dee von ons utjerecht woat fa de Harlichkjeit von däm Harn selfst un junen gooden Wellen to bewiesen; Gal 2:10 20 endäm wie dit väabieejen, daut ons nich irjentwäa Schlajchtet norät wäajens dise rikje Gow haulwen, dee von ons utjerecht woat; 21 wiels wie vesorjen goode Dinja, nich bloos ver däm Harn, oba uk ver de Menschen. 22 Un wie haben onsen Brooda met äant jeschekjt, dän wie foaken en väle Stekjen jeprooft haben, daut hee iewrich es un nu oba noch väl iewaja es em grooten Toovetruen to junt. 23 Waut oba Titus aunbelangt, hee es mien Poatna un mien Metoabeida fa junt; waut onse Breeda aunbelangt, see sent Jeschekjte von de Jemeenten un Christus siene Iea. 2Kor 7:13; 12:18 24 Soo bewiest nu to äant un ver de Jemeenten, dän Bewiess von june Leew un von ons Riemen äwa junt. 2Kor 7:14