1 Wull Gott, daut jie een bät Domheit von mie vedruagen! Oba jo, vedroacht mie. 2 Wiels ekj iewa om junt met jettlichem Iewa, wiels ekj hab junt eenem Maun aunvetrut, om junt aus eene reine Junkfru Christus väa to stalen. Efs 5:26-27 3 Oba ekj fercht, daut, soo aus de Schlang Eva vefieed derch äare Lest, uk june Jesennungen vedorwen woaren, wajch von de Eenfachheit en Christus. 1Mo 3:4,13 4 Wiels wan dee, dee no junt kjemt, eenen aundren Jesus prädicht, dän wie nich jeprädicht haben, ooda jie eenen aundren Jeist kjrieen, dän jie nich jekjräajen haben, ooda een aundret Evangelium, daut jie nich aunjenomen haben, vedruag jie daut goot. Gal 1:8-9 5 Wiels ekj denkj, ekj sie nuscht hinja de jratste Apostel. 2Kor 12:11 6 Wan ekj oba uk een Onjelieeda sie en de Räd, soo oba nich en de Erkjantnis; oba wie sent gaunz mank junt en aules openboa jeworden. 1Kor 2:1-2,13; Efs 3:4

7 Hab ekj Sind jedonen, endäm ekj mie selfst raufleet, om daut jie kunnen erhowen woaren, wiels ekj junt daut Evangelium von Gott emsonst vekjindicht hab? Mat 10:8; 1Kor 9:12-18; 2Kor 12:13 8 Aundre Jemeenten hab ekj bestolen, endäm ekj Loon neem, om junt to bedeenen. Flp 4:10,15 9 Un aus ekj bie junt aunwäsent wia un Bederfnis haud, deed ekj kjeenem belaustjen (wiels mien Bederfnis stalden de Breeda, dee ut Mazedonien kjeemen); un en aules hab ekj mie trigj-jehoolen von junt belaustjen un woa mie wieda soo hoolen. 10 Soo aus Christus siene Woarheit en mie es, saul mie dit Riemen nich jewäat woaren en de Jäajenden von Achaja. 11 Wuarom? Wäajens ekj junt nich leew? Gott weet. 12 Oba waut ekj doo, woa ekj doonen, om dee de Uasoak auf to schnieden, dee eene Uasoak wellen, om daut see, wuarenn see sikj riemen, muchten soo aus wie befungen woaren. 13 Wiels soone sent faulsche Apostel, veleidende Oabeida un vestalen sikj aus Christus siene Apostel. 2Kor 2:17 14 Un kjeen Wunda, wiels de Soton selfst vestalt sikj soo aus een Enjel vom Licht. 15 Doawäajen es daut nuscht Grootet, wan uk siene Deena sikj aus Deena von de Jerajchtichkjeit vestalen, woone äa Enj no äare Woakjen no sennen woat.

16 Ekj saj wada: Hoolt mie kjeena fa noarisch; wan aundasch, nämt mie doch opp aus een Noa, soo daut ekj mie uk een bät riemen mucht. 2Kor 12:6 17 Waut ekj räd, räd ekj nich no däm Harn no, oba aus Domheit, en dit Vetruen toom Riemen. 18 Wäajens doa väle sikj nom Fleesch riemen, well ekj mie uk riemen. 19 Wiels jie vedroagen Noaren jieren, wäajens jie Weise sent. 1Kor 4:10 20 Wiels jie vedroagen daut, wan irjentwäa junt en Sklowarie brinjt, wan irjentwäa junt vemachelt*, wan irjentwäa junt waut wajchnemt, wan irjentwäa sikj erhäft, wan irjentwäa junt em Jesecht schleit. 21 To ne Schaund saj ekj dit, aus wan wie sent schwak jewast. Wuarenn oba irjentwäa driest es (ekj räd en Domheit), doarenn sie ekj uk driest. 22 Sent see Hebräa? Ekj uk. Sent see Israeliten? Ekj uk. Sent see Abraham sien Nokomen? Ekj uk. Flp 3:5 23 Sent see Christus siene Deena? (Ekj räd aus een Domma). Ekj sie daut noch mea; väl mea enne Oabeit, Äwamoten en Schläaj, foakna en Jefenkjnissen, foaken en Doodes-Jefoa. 1Kor 15:10; 2Kor 6:4-5 24 Von de Juden hab ekj fiefmol vieetich Sträakja, weinja eenen, jekjräajen. 5Mo 25:3 25 Dreemol es mie met Stangen jeschloagen worden, eenmol jesteenicht worden, dreemol hab ekj Scheppbruch jeläden, een Dach un eene Nacht hab ekj en daut deepe Mäa toojebrocht; Apj 16:22; 14:19 26 foaken opp Reisen, en Jefoaren en Riefasch, en Jefoaren von Reibasch, en Jefoaren von mien ieejnet Volkj, en Jefoaren von de Heiden, en Jefoaren en de Staut, en Jefoaren en de Wiltnis, en Jefoaren opp daut Mäa, en Jefoaren mank faulsche Breeda; 27 en Oabeit un Mieej un foaken en Woaken, en Hunga un Darscht, foaken en Fausten, em Kolden un noaktich; 2Kor 6:5 28 biesied daut von buten, waut noch däachlich opp mie kjemt, de Sorj fa aule Jemeenten. Apj 20:18-21,31 29 Wäa es schwak, un ekj sie nich schwak? Wäa woat beleidicht, un ekj brenn nich?

30 Wan ekj riemen mott, well ekj mie met de Dinja von miene Schwakheit riemen. 2Kor 12:5 31 De Gott un Voda von ons Har Jesus Christus, Dee jeloft es en Eewichkjeit, weet, daut ekj nich lieej. 32 En Damaskus bewoakt de Gowernia vom Kjennich Aretas de Staut von de Damaskauna, om mie to jriepen; 33 un ekj wort derch een Fensta en eenem Korf derch de Mia raufjeloten un kleiwd ut von ut siene Henj. Apj 9:24-25