1 Dit dreddemol kom ekj no junt. Derch twee ooda dree Zeijen äa Mul woat jieda Sach bestädicht woaren. 5Mo 19:15; Mat 18:16 2 Ekj hab verhäa jesajcht un saj junt uk verhäa, soo aus daut tweedemol aunwäsent un nu aufwäsent, schriew ekj deejanje, dee verhäa jesindicht haben un to de äwaje aula, daut, wan ekj wada kom, woa ekj nich schoonen. 3 Wiels jie eenen Bewiess sieekjen, daut Christus en mie rät, dee nich schwak es junt jäajenäwa, oba majchtich mank junt. 4 Wiels wan Hee uk en Schwakheit jekjriezicht worden es, soo läft Hee doch derch Gott siene Krauft; wiels uk wie sent schwak en Am, oba woaren met Am läwen derch Gott siene Krauft, junt jäajenäwa. 5 Unjasieekjt junt selfst, auf jie em Gloowen sent; prieft junt selfst! Ooda erkjan jie junt selfst nich, daut Jesus Christus en junt es? Buta jie sent Veschmätne. 6 Oba ekj hop, daut jie weeten, daut wie nich Veschmätne sent.

7 Oba ekj bäd to Gott, daut jie nuscht Schlajchtet doonen; nich, daut wie aunjenomen schienen, oba daut jie daut Goode doonen, wan wie oba soo aus Veschmätne sent. 8 Wiels wie kjennen nuscht jäajen de Woarheit, oba fa de Woarheit. 9 Wiels wie freien ons, wan wie schwak sent, oba jie stoakj sent; un daut es, waut wie junt wenschen, june Vollkomenheit. 10 Doawäajen schriew ekj dit aufwäsent, om daut ekj aunwäsent nich doaf schoap sennen no de Macht no, woone de Har mie jejäft haft to de Oppbuunk un nich to de Vestierunk. 2Kor 10:8,12

11 Äwajens, Breeda, freit junt! Siet vollkomen, siet jetreest, habt eenen Senn, hoolt Fräd; un de Gott von Leew un Fräd woat met junt sennen. Ree 15:33; Flp 4:4 12 Jreest junt unjarenaunda met eenem heiljen Kuss. 13 Aul de Heilje jreessen junt. 14 De Jnod von däm Harn Jesus Christus un de Leew von Gott un de Jemeenschoft von däm Heiljen Jeist sie met junt aula! Amen. No de Korinta jeschräwen von Filippi, eene Staut en Mazedonien, derch Titus un Lukas.