1 Oba ekj hab dit bie mie selfst beschloten, nich wada en Truarichkjeit no junt to komen. 1Kor 4:21; 2Kor 12:21 2 Wiels wan ekj junt truarich moak, wäa es doa, dee mie froo moakt, wan nich dee, dee von mie truarich jemoakt woat? 3 Un ekj hab junt dit jeschräwen, daut ekj nich, wan ekj kjeem, Truarichkjeit haben must, äwa woone ekj mie doch freien sull; wiels ekj hab to junt aula daut Vetruen, daut miene Freid es dee von junt aula. 4 Wiels ekj schreef junt met väl Triebsaul un Angst em Hoat, met väl Tronen, nich junt to betrieben, oba daut jie muchten de Leew erkjanen, dee ekj besonda rikjlich fa junt hab.

5 Wan oba irjentwäa Truarichkjeit ve-uasoakt haft, haft hee nich mie truarich jemoakt, oba toom Deel (om daut nich to äwadriewen), junt aula. 6 Dise Strof es jenuach fa soonen, dee am von väle jedonen es, 7 soo daut jie am em Jäajendeel väl mea vejäwen un treesten, soo daut soona nich en toone groote Truarichkjeit vesinkjt. 8 Wuawäajen ekj junt bedd, daut jie de Leew aun am bestädjen. 9 Wiels doawäajen hab ekj junt jeschräwen, daut ekj de Proow von junt mucht weeten, auf jie en aules jehuarsom sent. 10 Wäm jie irjentwaut vejäwen, däm vejäw ekj uk; wiels uk ekj, wan ekj waut vejeef, vejeef ekj daut om junt-haulwen, en Christus siene Städ, Joh 20:23 11 om daut wie nich vom de Soton utjenuzt woaren; wiels siene Jedanken sent ons nich onbekaunt. Luk 22:31; 1Pe 5:8

12 Wieda, aus ekj no Troas kjeem fa Christus sien Evangelium un mie de Däa opjedonen wort en däm Harn, Apj 14:27; 1Kor 16:9 13 haud ekj kjeene Ru en mienem Jeist, wiels ekj Titus, mienen Brooda, nich funk; oba ekj neem Aufscheet von äant un reisd wieda no Mazedonien. Apj 20:1; 2Kor 7:6 14 Oba to Gott een Dank, dee ons emma triumfierent leit en Christus un daut Jeroch von siene Erkjantnis derch ons opp jieda Städ openboat. 15 Wiels wie sent fa Gott Christus sien Scheenjeroch en dee, dee jerat woaren un en dee, dee veloaren gonen; 1Kor 1:18 16 to dee eene een Jeroch vom Doot toom Doot, to dee aundre een Jeroch vom Läwen toom Läwen. Un wäa es fa dit fäich? Luk 2:34; 2Kor 3:5 17 Wiels wie sent nich soo aus väle, dee Gott sien Wuat vefaulschen, oba soo aus ut Reinheit, soo aus ut Gott, räd wie ver Gott en Christus. 2Kor 1:12; 4:2; 1Pe 4:11