1 Doawäajen, wiels wie disen Deenst haben, doano aus wie Boarmherzichkjeit jekjräajen haben, woa wie nich meed, 1Kor 7:25; 2Kor 3:6 2 oba sajen aul de heemliche Schaund auf, gonen uk nich met Lest om, vefaulschen uk nich Gott sien Wuat, oba derch de Openboarunk von de Woarheit, stal wie ons selfst väa aun eenem jiedren Mensch sien Jewessen ver Gott. 2Kor 2:17; 1Tess 2:5 3 Oba wan ons Evangelium bedakjt es, es et bie dee bedakjt, waut doa veloaren gonen; 1Kor 1:18 4 en woone de Gott von dise Welt dän Senn von de Onjleewje veblent haft, soo daut daut Licht von daut harliche Evangelium von Christus nich äant bedacht, woona Gott sien Bilt es. Heb 1:3 5 Wiels wie prädjen nich ons selfst, oba Christus Jesus, dän Harn; wie selfst oba june Kjnajchts om Jesus sient-haulwen. 2Kor 1:24 6 Wiels Gott, dee daut Licht befool ut de Diestanis to dachen, haft daut en onse Hoaten dachen loten, to een Licht von de Erkjantnis von Gott siene Harlichkjeit en Jesus Christus sien Aunjesecht. 1Mo 1:3; 2Kor 3:18

7 Oba wie haben disen Schauz en ieedne Jefässa, om daut de äwamotje* Krauft mucht von Gott sennen un nich von ons. 1Kor 4:11-13; 2Kor 11:23-27 8 Wie woaren aulawäajen bedrenjt, oba nich be-enjt; rotloos, oba nich vezoacht; 9 vefolcht, oba nich veloten; doljeschmäten, oba nich omjebrocht. 10 Wie droagen auletiet aum Kjarpa däm Harn Jesus sien Stoawen, om daut uk Jesus sien Läwen mucht aun onsem Kjarpa openboa woaren. 1Kor 15:31; Gal 6:17 11 Wiels wie, dee wie läwen, woaren emma däm Doot äwajäft, om Jesus sient-haulwen, om daut uk Jesus sien Läwen en ons stoaflichet Fleesch openboa woat. Ree 8:36; Flp 3:21 12 Soo wirkjt dan de Doot en ons, oba daut Läwen en junt. 13 Wiels wie haben dänselwjen Jeist vom Gloowen, no daut, waut jeschräwen steit: "Ekj jleewd, doawäajen hab ekj jerät", soo jleew wie uk, un doawäajen räd wie uk, Ps 116:10 14 un wie weeten, daut Dee, dee dän Harn Jesus opperwakjt haft, uk ons derch Jesus opperwakjen un met junt toop väastalen woat. 1Kor 6:14 15 Wiels aules es om junt-haulwen, om daut de toonämende Jnod mucht derch dän Dank von väle, fa Gott siene Harlichkjeit äwastreemen. 2Kor 1:6,11

16 Doawäajen woa wie nich vezoagen; oba wan ons butalicha Mensch vejeit, soo woat doch dee ennalicha von Dach to Dach ernieet. Efs 3:16 17 Wiels onse schwind-äwagonende, leichte Triebsaul, schauft een eewjet un äwatrafendet Jewicht von Harlichkjeit Ree 8:17-18; 1Pe 1:6 18 fa ons, dee wie nich opp de Dinja kjikjen, waut to seenen sent, oba opp dee, waut nich to seenen sent; wiels dee, waut to seenen sent, sent tietlich; waut oba nich to seenen sent, sent eewich. Heb 11:1