1 Wiels wie weeten, daut, wan ons irdischet Hus, dit Zelt, doljebroaken woat, hab wie eenen Bu von Gott, een Hus, nich met Henj jemoakt, een eewjet, en de Himmels. 2Pe 1:14 2 Wiels en dit stän wie un velangen, met onse Woninj, waut vom Himmel es, äwakjleet to woaren; 3 aulsoo wan wie aunjetrocken sent, woa wie nich noaktich jefungen woaren. 4 Wiels wie, dee wie en dit Zelt sent, stänen un sent belot; wiels wie wellen nich aufjekjleet, oba äwajekjleet woaren, soo daut daut Stoafliche veschlukt woat von daut Läwen. 1Kor 15:51-53 5 Dee ons oba hiatoo reedjemoakt haft, es Gott, dee uk ons de Auntolinj, dän Jeist, jejäft haft. Ree 8:16,23; 2Kor 1:22; Efs 1:13-14 6 Doawäajen sent wie emma toovetruent un weeten, daut, wäarent wie em Kjarpa wonen, sent wie aufwäsent vom Harn. Heb 11:13 7 Wiels wie waundlen nom Gloowen un nich nom Seenen. Ree 8:24; 1Pe 1:8 8 Oba wie sent mootich un wellen leewa aufwäsent vom Kjarpa un aunwäsent biem Harn sennen. Flp 1:23 9 Doawäajen eew wie ons uk, auf aunwäsent ooda aufwäsent, Am jefalich to sennen. 10 Wiels wie motten aula ver Christus sien Rechtastool openboa woaren, om daut een jiedra kjricht, doano waut hee em Kjarpa jedonen haft, auf Goodet ooda Beeset. Joh 5:29; Apj 17:31; Ree 2:16; 14:10; Efs 6:8

11 Wiels wie nu daut Schrakjen vom Harn kjanen, äwaräd wie de Menschen; oba wie sent Gott openboa jeworden; ekj hop oba, uk en june Jewessen jeopenboat. 12 Wie doonen ons nich wada junt väalowen, oba jäwen junt Uasoak, toom Riemen om ons-haulwen, soo daut jie waut haben jäajen dee, dee sikj met daut Aunseenen riemen, oba nich vom Hoaten. 2Kor 3:1; 10:12 13 Wiels wan wie buta onse Venunft wieren, wia daut fa Gott; sent wie oba veninftich, dan es daut fa junt. 14 Wiels Christus siene Leew drenjt ons, wiels wie be-uadeelen, daut, wan Eena fa aule jestorwen es, dan sent see aula jestorwen. 15 Un Hee es fa aule jestorwen, om daut dee, waut läwen, nich mea fa sikj selfst läwen, oba fa Dän, dee fa äant jestorwen un oppjestonen es. Ree 14:7-8 16 Doawäajen kjan wie von nu aun kjeenen nom Fleesch; wan wie uk Christus nom Fleesch jekjant haben, kjan wie Am nu nich mea soo. 17 Doawäajen, wan irjentwäa en Christus es, es hee eene niee Kjreatua; daut Oole es vegonen, kjikj, aules es nie jeworden. Ree 8:10; Gal 2:20; 6:15; Opb 21:5 18 Un aules es von Gott, dee ons met sikj selfst veseent haft derch Jesus Christus un haft ons dän Deenst von de Veseenunk jejäft. Ree 5:10 19 Aulsoo wia Gott en Christus un veseend de Welt met sikj selfst un räakjend äant äare Sinden nich too un haft ons daut Wuat von de Veseenunk oppjelajcht. Ree 3:24-25; Kol 1:19-20 20 Soo sent wie nu Bootschofta fa Christus, soo aus wan Gott derch ons ermont; wie bedden junt en Christus siene Städ: Lot junt veseenen met Gott. Luk 10:16 21 Wiels Hee haft dän, dee von kjeene Sind wist, fa ons to Sind jemoakt, om daut wie wudden Gott siene Jerajchtichkjeit woaren en Am. Jes 53:4-6; Joh 8:46; Ree 1:17; 1Kor 1:30; Gal 3:13