Daut Läwen em Jeist
1 Doa es dan nu kjeene Vedaumnis fa dee, dee en Christus Jesus sent, dee nich no daut Fleesch waundlen, oba no däm Jeist. 2 Wiels daut Jesaz von däm Jeist von daut Läwen en Christus Jesus, haft mie friejemoakt von daut Jesaz von de Sind un von däm Doot. 3 Wiels waut fa daut Jesaz onmäajlich wia wuarenn daut derch daut Fleesch schwak wia, schekjt Gott sienen ieejnen Sän en de Jestault von sintlichet Fleesch un fa de Sind un vedaumd de Sind em Fleesch, 4 om daut de Jerajchtichkjeit vom Jesaz en ons mucht erfelt woaren, dee wie nich no daut Fleesch, oba no däm Jeist waundlen. 5 Wiels dee, waut no daut Fleesch sent, denkjen aun daut, waut vom Fleesch es, oba dee, waut no däm Jeist sent, no daut, waut vom Jeist es. 6 Wiels de Jesennunk8:6 Ooda: Neijunk. vom Fleesch es de Doot, oba de Jesennunk vom Jeist es Läwen un Fräd. 7 Wiels de fleeschliche Jesennunk es Fientschoft jäajen Gott, wiels dee es Gott sien Jesaz nich unjadon, un dee kaun uk nich. 8 Dee oba em Fleesch sent, kjennen Gott nich jefaulen. 9 Jie oba sent nich em Fleesch, oba em Jeist, wan sest Gott sien Jeist en junt wont. Wan oba wäa Christus sien Jeist nich haft, dee es nich sient. 10 Wan oba Christus en junt es, dan es de Kjarpa werkjlich doot wäajens de Sind, oba de Jeist es Läwen wäajens de Jerajchtichkjeit. 11 Un wan de Jeist von däm, dee Jesus vom Doot opperwakjt haft, en junt wont, dan woat dee, dee Christus von de Doodje opperwakjt haft, uk june stoafliche Kjarpasch läwendich moaken derch sienen Jeist, dee en junt wont.