28 Wie weeten oba, daut fa deejanje, dee Gott leewen, aules toom Basten wirkjt, dee no daut Väanämen beroopen sent. 29 Wiels woone Hee verhäa-kjand, dee haft Hee uk verhäa-bestemt, daut Bilt von sien Sän jlikj to woaren, soo daut Hee de Ieeschtjebuarna es mank väle Breeda. 30 Woone Hee oba verhäa-bestemt haft, dee haft Hee uk beroopen; un woone Hee beroopen haft, dee haft Hee uk jerajchtfoadicht; woone Hee oba jerajchtfoadicht haft, dee haft Hee uk veharlicht.
Gott siene eewje Leew
31 Waut sull wie dan hiatoo sajen? Wan Gott fa ons es, wäa kaun jäajen ons sennen? 32 Hee, dee sienen ieejnen Sän nich veschoont haft, oba Am fa ons aula hanjeef, woo sull Hee ons nich uk met Am aules schenkjen? 33 Wäa woat jäajen Gott siene Uterwälde eene Aunkloag brinjen? Gott es daut, dee rajchtfoadicht. 34 Wäa es, dee doa vedaumt? Christus es, dee jestorwen es un väl mea, dee uk opperwakjt es, dee uk aun Gott siene rajchte Haunt es, dee ons uk veträt. 35 Wäa woat ons scheeden von Christus siene Leew? Triebsaul ooda Angst ooda Vefoljunk ooda Hungaschnoot ooda Bloozichkjeit ooda Jefoa ooda Schwieet? 36 Soo aus jeschräwen steit: "Om dient-haulwen woa wie dän gaunzen Dach dootjemoakt; wie sent jetalt aus Schlacht-Schop!" 37 Oba en aul dit sent wie mea aus Jewenna derch dän, dee ons jeleeft haft. 38 Wiels ekj sie äwazeicht, daut nich Doot, nich Läwen, nich Enjel, nich Ferschtentiema, nich Machten, nich Jäajenwuatjet, nich Tookjinftjet, 39 nich Huaget, nich Deepet, un kjeene aundre Kjreatua kaun ons scheeden von Gott siene Leew, dee en Christus Jesus es, onsem Harn.