1 Pedro 4

Wambwalu Ɔzhizɔsi Lo Wo Iyi Bɔkɔ I She La Ukpo

1 Kyamate bɔkɔ Okrasi a ma inyashi awu, lunyi tete la lu ka ɛnwu yi ma mu ɔgwuzɛ uwu bɔkɔ a zɛ awu, kwuwongu onzu uwunawuna uwu bɔkɔ a ma inyashi, e kyo mbala ingbomo fo. 2 Kwuwongwu ɔlɛ, i na mɔnɛ i she keyi, luzɛ ŋɔ mu kwudu kwɔlɛ lakwu undu bɔkɔ ɛnwu i gyi mo, lakwu undu bɔkɔ Ukpo e to ŋɔ keyi le. 3 Mekyi lu wo apula iyi bɔkɔ enzu umba bɔkɔ o yi Ukpo mo o wo. Lu tutu kwuye yi mo mu kaya itomo, ɔnyɛ uwu apula iyira iwomo, lu to ɛnwu yi lu shi atɛ iwomo mbala eshi ibyima. 4 Akwa mba kiya ingyi kenzu iyama te lunyi lu kyo mbala mba mu apula iyi ingbomo iwomo fo, kwuwo ngwɔlɛ o kpa yi ari. 5 Umba ba mega o so kiya ingyi bɔkɔ o wo laa Ukpo, uwu bɔkɔ a zɔ ombu uwu enzu umba bɔkɔ o kpomo-o mbala enzu umba bɔkɔ o degbo la reyi.