12 Kwuwo kwɔlɛ ingbomo li rɛsu mu ɛnwu yi iyi lukwu ɛlɛ fo, kaa la lu nyama la iyi bɔkɔ ɛnwu yi i gyi mo. 13 La lu to ɛnwu yi kaa lu shi ingbomo, kaa lakwu kiya ingyi ɛduma iyira iwomo mo. La lu ra la ɛnwu yi lu shi Ukpo, mate umba bɔkɔ o wa mba ma mu lukwu o bomo mu kwunyɔ tayi; la lu rala ɛnwu yi ngyɔ la lu shi Ukpo kaa lakwu kiya ingyi ɛduma iyi ototo. 14 Ingbomo li rɛsu yi mo, moo lu yi mu ɛrama mo, lunyi ba lu yi mu esheshi iyi Ukpo ŋa.

15 Ki wo te fo? Ki le mu ingbomo kwuwongu bɔkɔ ki ŋɔ la ɛrama mo ba ki ŋɔ la esheshi ŋa le? Ayi mo! 16 Lu yitu te gba lu rala ɛwu yi lu shi onzu akwɛyi lu lo wu mo ta enye te, lu kwu enye umba onzu uwu bɔkɔ lu lo wu mo awu - luu kwu enye umba ingbomo iyi bɔkɔ i re la onzu mu lukwu, naa ilomo iyi bɔkɔ ii shi yi luu yi ototo mbaa Ukpo ŋa? 17 Ukpo ba le yi ɛnyi! Lunyi umba bɔkɔ lu kwu enye umba ingbomo dɛ-ɛ le, lu na ɛzɔ iyi ongbulolo iyi bɔkɔ o shi yi kekelele mu egbo ikpɛnyi. 18 O wa yi ma mu ingbomo akwɛyi lu vindɔ enye umba kiya ingyi Ukpo a gyi.