1 Butu a pari kelima e ma, kelima ni e ma nja Mirikisi, kelima ni ma Mirikisi. 2 Kelima ni e ma nja Mirikisi tun mpari. 3 Te anya kelima ni Mirikisi yi mbo guru; ba mbodaa su yi a siki durinya mu de ma nshina ni Yesu ba. 4 Kelima mu nama kutiri leyi, leyi de ma asikye ni ntani, 5 Asikye e mayi asikye a siki dopuwa, sede dopuwa yi yaa shakiya asikye ba. 6 Mirikisi saka yamanki yi daa; seni yi ma Yaaya. 7 E zo de e beyi sheeda a kiya ni asikye, sobon de te anya e yi guru ntani su zi nabari asikye sua kwa yeda nshi. 8 Yaaya e shiya ma asikye ni ba; E zo de e beyi sheeda a kiya ni asikye ni la. 9 Asikye ni gaskye de yaa ba guru ntani asikye zo a siki durinya.

10 Kelima e ma a siki durinya, kode nkye Mirikisi yi durinya te anya e yi la, nzun yomu ntani durinya shina e yi ba. 11 E zo anya ntani e yi, sede ntani e yi de keleba yi ba. 12 Sede du nsude keleba yi, de su beigaskye ni seni yi, e ba su dama de su ma yaya Mirikisi, 13 ba yaya de su yapu te anya zini nja nki ba, ko te anya nupi nsebeki ba, sede Mirikisi nkiya yi ema Adaa su.

14 Kelima mu ma nki nsebeki, e zunwa yi a siki amu. Mu geni yiri dereja de e manshi, dereja ni Yaa ndandaa de zo dege anya Adaa, e sika ni aniyeri nja gaskye. 15 Yaaya beyi sheeda a kiya yi. E yi kuruwa nsori nkye, <<Da mu nama nseminji de ni yi beta a kiya yi nkye, <Nsude yaa zo a beyi na e pi ni sobon e rigye ni zo.> >> 16 Sobon yowa aniyeri yi ni Yesu na guru amu muma keleba anabirika daa a beyi daa. 17 Mirikisi beyi doka te anya Musa; sede aniyeri nja gaskye zo dege anya Yesu Kiristi. 18 Nseda taba geni Mirikisi ba, sede Yaa ni Mirikisi ndandaa yi de ma yiri daa Adaa yi nja e zunwa mala nja Adaa, e sa mu shina yi.

19 Kuzukam sheeda ni Yaaya naka kwanki de Yawudawa ni Wurishelima saka pirisi nja nsu Lawi de su minya yi, <<Waa ma e shi?>> 20 Yaaya yi musu ba, sede e pala a pili, <<Eni na ni ma Kiristi ba.>> 21 Se su minya yi nkye, <<kuzukam waa ma eke? Eke na ki ma Iliya?>>

Yaaya keleba nkye, <<Yi eni na ba.>>

<<Su sakye Eke na ki ma Anebi mu?>>

E keleba nkye, <<ayi.>> 22 A karishe su minya yi nkye, <<Waa ma e ke? Gye mu de mu te gye worede saka mu. Mina ka pala game nkiya ake?>> 23 Yaaya keleba te anya kelima ni Anebi Ishaya nkye, <<Eni na ni ma murinya nsude yaa sukwa a siki denka nkye, ku gyala Obagizi turiki de biya.>>> 24 Se worosu su de Parisiyawa saka su, 25 su minya Yaaya nkye, <<Mina sa ka yi tunkwasa nde eke na ki ma Kiristi ba, ko Iliya, ko Anebi mu ba?>>

26 Yaaya keleba nkye, <<Mma yi tunkwasa nja riki,>> <<Sede nseda sakisi a siki aku de ku shina yi ba. 27 E shiya yaa zo a beyi na, nsude Ni deta de na kunshe angwe takalami yi ba.>>

28 Guru mbo mu e paru a keteri totolo riki ni Betani, anya de Yaaya meyi tunkwasa.

29 De geri shekeri Yaaya geni Yesu ma zo anya yi e pala nkye, <<Ku kone, Timshiya ni Mirikisi, nsude la lepi ni ntani durinya! 30 Da mu e shiya ma nsude Ni nkye, <Nsude yaa zo a beyi na e pi ni sobon ema kapi eni.> 31 Eni nkiya na ni shina yi ba, sede ni zo mma yi tunkwasa ni riki sobon de su pelesa yi ba ntani Izireyila.>>

32 Se Yaaya beyi sheeda nkye: <<Ni geni Aworo ni Mirikisi ma sonka a kiya Yesu dege bisi kankye nkurisha. 33 Ari kuzukam Ni shina yi ba, sede Mirikisi de saka ni de ni yi tunkwasa ni riki pala gyeni nkye, <Nsude ki geni Aworo ma sonka zunwa a kiya yi e shiya yaa yi tunkwasa ni Aworo Nsuseki.> 34 Ni geni Ni kwa beyi sheeda nkye ema Yaa ni Mirikisi.>>

35 De geri shekeri Yaaya nja Yayagizi yi bi zo anya ni jaja. 36 De Yaaya geni Yesu yaa bise, nkye, <<Ku kone Timshiya ni Mirikisi!>>

37 De yayagizi Yaaya bi zi mbode Yaaya pala, se su biya Yesu. 38 De Yesu juyi e geni su ma biya yi, e minya su nkye, <<Mina kwa bila?>>

Su nkye, <<Rabbi>> Maana e yi ma Male, <<angana ka zunwa?>>

39 Yesu keleba nkye, <<Zo de ku geni.>>

Se su te geni anya de yaa zunwa, se su zunwa anya ni nja shi. Su la kwanki nyowa nja shi.

40 Anduru, yayiwa ni Sima Biturusu, e ma daa a siki worede zi mbode Yaaya e ma pala a kiya Yesu se su biya yi. 41 Mbo ni pari de Anduru yi e shiya e bila yayiwa yi Sima e gye yi nkye, <<Mu geni Alimasipu ni>> woto, Kiristi. 42 Se Anduru keyi Sima te nshi anya Yesu,

De Yesu kone yi nkye, <<Ki ma Sima yaa ni Yaaya. Sua sukwa ke Kepasi>> ko Biturusu de Maana yi ma <<dunsi>>

43 De geri shekeri Yesu yaa bila de e ta Galili. E geni Pilibu, e gye yi nkye, <<Biya ni.>> 44 Pilibu, ema dege Beseda geri de Anduru nja Biturusu sua zunwa. 45 Pilibu geni Nantaniyel e gye yi nkye, <<Mu geni nsude Musa rubuta doka a kiya yi, nja nsude nsu anebi su rubuta. Yesu ni Nazere, Yaa ni Yusupu.>>

46 Nantaniyel minya nkye, <<Mbodaa kyakyawu yaa butu a siki Nazere?

Pilibu nkye, <<Zo de ku geni,>>

47 De Yesu geni Nantaniyel ma zo anya yi, nkye, <<Da mu e shiya ma Izireyila ni gaskye, a siki yi mbodaa ma yaruwa ba.>>

48 Nantaniyel minya Yesu nkye. <<ki nkye kona ki shina ni?>>

Yesu keleba nkye, <<Ni geni ke tunde ki ma akutiri ntasi bori kapi de Pilibu e sukwa ke.>>

49 Se Nantaniyel pala nkye, <<Male, Ki ma Yaa ni Mirikisi la; Eke na ki ma Seleki ni Izireyila.>>

50 Yesu nkye, <<Ki beigaskye sobon Ni gye ke nkye Ni geni ke akutiri ntasi bori la. Kwa geni totore mbode pi da mu.>> 51 Yesu gye su nkye, <<Na gye ku gaskye, kwa geni bisi bure, meleku Mirikisi sua nyunwa sua sonka a kiya ni Yaa Nsebeki.>>