1 Mbaki sasape ni nana pari ni asibi, de anya tuku shekeri woba, Meremu dege Magadaliya te a kumsha e geni dunsi de ripe baki kumsha su la bila baki kumsha. 2 Se e kuma ngudu te anya Sima Biturusu nja worosu su yayagizi Yesu e ma so su nkye, <<Su la nki ni Obagizi butu bila kumsha mu shina anya de su leyi sa ba!>> 3 Se Biturusu nja yayagizi Yesu mu su yi gudu te a kumsha. 4 Se guru su su yi gudu, sede yaagizi Yesu mu yi gudu bise Biturusu te a kumsha. 5 E dure kone siki kumsha e geni woriki peri de su lende Yesu nshi na nya anya de e kwana sede e yuru a siki yi ba. 6 De Sima Biturusu zo a beyi, e yuru te a siki kumsha, Biturusu geni woriki peri nya anya ni 7 e geni woriki peri de su lende Yesu nshi a kiya nya anya ni. E ma nja woriki de su lende Yesu a nki naba 8 Se a karishe yaagizi de para keyi kumsha, e shi ma e yuru a siki kumsha du, de su geni se su beigaskye. 9 Nzun yomu su shina mbode takada Mirikisi pala ba de nkye e ma dole na de Yesu e sakye man leyi.

10 Se yayagizi Yesu kuma te a gizi.

11 Sede Meremu sakisi a woze kumsha e meyi kuka, de e ma a kiya kuka, e dunkye yaa kone siki kumsha 12 se e geni meleku bi sa keikei peri, zunwa anya de nki Yesu ma, daa ma a kiya e yi nja daa anya seni yi.

13 Meleku minya Meremu nkye, <<Mase, mina sa de ki meyi kuka?>>

Meremu keleba nkye, <<Su la Obagizi na te nshi, ni shina anya de su leyi sa ba.>> 14 De Meremu gama yi beta mu e juyi se e geni Yesu sakisi anya ni, sede e shina nkye e man Yesu naba.

15 Yesu minya yi nkye, <<Mase,>> <<Mina sa de ka yi kuka? waa ka bila?>>

Meremu geni kankye e ma nsu kone bikiya ni la, se Meremu gye yi nkye, <<Tolense, nde e ke na ki leyi, gye ni anya de ki leyi sa de ni te la yi.>>

16 Yesu gye yi nkye, <<Meremu.>>

Meremu juyi kone yi sukwa yi ni sori ni arishiya Yawudawa nkye, <<Rabboni!>> Mane yi ni arishiya Yawudawa, e ma <<Male.>>

17 Yesu gye yi nkye, <<Kede ki kpa ni wo ba, sobon ni kuma te anya ni Adaa na wo ba, sede ki te anya yayuwa na de ki gye su nkye, Na kuma mbayi te anya Adaa na de ma Adaa ku, Mirikisi na de ma Mirikisi ku.>>

18 Se Meremu Magadaliya kuma te ba yayagizi Yesu nabari: <<Ni geni Obagizi!>>Meremu gye su guru mbode Yesu pala gye yi.

19 Nnyema nnana pari ni ladi yayagizi Yesu tala anya daakaka, su ripe kopa sobon womba Yawudawa, se Yesu zo sakisi a sisika su nkye, <<Selema e ma nja ku!>> 20 A beyi de Yesu pala yomu, Yesu nana su nani yi nja ganga siki yi. Se yayagizi yi yi peri siki soseyi de su geni Obagizi.

21 Se Yesu kwa gye su nkye, <<Selema e ma nja ku! Yiride Adaa na saka ni E ni ma mma saka ku.>> 22 De Yesu pala yomu se e wula su amushi nkye, <<Ku keleba Aworo Nsuseki. 23 Nde ku yape ntani lepi su, su yape su nshi naka; sede nde ku yape su lepi su ba, su yape su nshi ba naka.>>

24 Tomasi de sua sukwa yi Togoyi, daa a siki gom sha bi, ema a kwanki de Yesu zo anya yayagizi yi ba. 25 Ririgye yayagizi gye Toma nkye, <<Mu geni Obagizi!>>

Sede Tomasi gye su nkye, <<Se Ni geni romu de su sukwa yi kusa a nani nja ni bwasa nani na a romu ni kusa ni, nkwa sa nani a keteri ni kekeri yi ba, na taba beigaskye ni mbode ku pala ba.>>

26 A beyi nana bokwe bise yayagizi Yesu su ma a siki gizi yere nja Tomasi. Kode nkye kopa ma a ripe, se Yesu zo sakisi a sisika su nkye, <<Selema ma nja ku!>> 27 Yesu gye Tomasi nkye,<<Sa nani ke anya mu; kone nani na. munka nani ke de ki bwasa a kekeri na. Bila yi shaka de ki beigaskye.>>

28 Tomasi gye Yesu nkye, <<Obagizi na nja Mirikisi na!>>

29 Yesu gye Tomasi nkye, <<Sobon de ki geni ni, na ki beigaskye; anabirika ma nja worede su geni ba sede su beigaskye.>>

30 Yesu yi mbo mamanki nyowa a ndani yayagizi yi, worede su rubuta su a siki takada mu ba. 31 Sede mbo woromu su rubuta su na de ku beigaskye nkye Yesu e shiya ma Kiristi, Yaa ni Mirikisi, te anya beigaskye kwa mani leyi a siki seni yi.