1 Se Bilatu sa shoja su yi Yesu ambere. 2 Shoja su yi lende ni ankwanya su sa Yesu nshi a kiya. Se su sa Yesu riga ni arikimba nsu ruwa ni gawura 3 su ma zo anya Yesu su ma nkye, <<Leyi ke e dede, seleki ntani Yawudawa!>> Se su sala e yi mmari.

4 Se Bilatu butu a woze jaja. E gye ntani Yawudawa nkye, ku kone, Na butu ku nshi a woze de ku shina nkye ni geni yi nlepi daa ni taala a kiya nseminji mu ba.>> 5 De Yesu butu a woze ni lende ni ankwanya nja riga alikimba ni ruwa gawura, se Bilatu gye su nkye, <<Nseminji ni namu!>>

6 De tolense ni nsu pirisi nja nsu kpanku Laki Mirikisi geni Yesu, su yi kuruwa nkye, <<Gidiri yi! ku Gidiri yi!>>

Sede Bilatu keleba nkye, <<Ku leyi te de ku gidiri yi. Ni keyi ni lepi daa de Na yi taala ni muntu ba.>>

7 Se Yawudawa su keleba nkye, Mu mani doka, a siki doka mu e kamata de e muntu, sobon e la kiya yi ma Yaa ni Mirikisi.>>

8 De Bilatu zi beta mu, e zi womba soseyi, 9 Se Bilatu kuma mbayi te a siki pada e yi. Bilatu minya Yesu nkye, <<Dege angana ki butu?>>

sede Yesu keleba yi ba. 10 Bilatu nkye, <<Ki ki de ki yi beta nja ni?>> <<Ki shina nkye ni ma ni yiko de ni shika ke ko ni gidiri ke bo?>>

11 Yesu keleba nkye, <<Ki mani yiko daa a kiya na ba mba Mirikisi te ba ke yiko naba. Nkayomu nsude la ni sa a nani ke e pi ke lepi.>>

12 De Bilatu zi yomu e bila turiki de e shika Yesu, sede Yawudawa sigeba ni yi kuruwa nkye, <<Nde ki bila nseminji mu te, kama oboki ni seleki Keisa ba. Sobon ba nsude ma seleki de yaa yi geba nja totolo seleki.>>

13 De Bilatu zi beta de ntani ma pala, Bilatu butu Yesu zo a woze e zunwa a kingbolo shiriya. De sua sukwa yi <Debe dunsi ni arishiya Yawudawa. 14 De nana shiri ni buki nyenteri yi, a kyakya sisika nana dede keripi sha bi.

Bilatu gye Yawudawa nkye, <<Seleki ku naka.>>

15 Sede Yawudawa yi kuruwa nkye,<<kisa yi! kisa yi! Gidiri yi!

Bilatu minya nkye, <<Ni gidiri seleki ku?

Toree pirisi keleba nkye, <<Mu mani seleki daa ba se Keisa

16 A karishe Bilatu la Yesu ba su a nani su de su gidiri. Se shoja ka Yesu.

17 Su butu ni Yesu te nshi a woze e keyi gidiri, e butu te a woze ni totolo geri te anya de sua sukwa yi kwankwankiya,>> ni arishiya Yawudawa sua sukwa yi goligota. 18 Anya ni su gidiri Yesu nja ntani bi daa a nani dama daa a nani guni se Yesu ma a sisika su.

19 Se Bilatu rubuta rubutu de su mala a gidiri. Nkye: YESU NSEMINJI DEGE Nazere, SELEKI NI YAWUDAWA. 20 Ntani Yawudawa nyowa karanta rubutu ni, sobon anya de su gidiri Yesu yi nyisa nja totolo geri ba, su rubuta mbom ni arishiya wuku, Aramaya, nja Roma nja Helenawa, 21 Se toree pirisi ni Yawudawa yeda ba<<kede Bilatu e rubuta <Seleki Yawudawa ba,> sede Bilatu rubuta nseminji mu pala nkye e ma seleki Yawudawa.>>

22 Se Bilatu keleba nkye, <<Mbode Ni rubuta, Ni rubuta aka.>>

23 De shoja gama gidiri Yesu, su la rigye yi laba keshi wuru, kowoni shoja la kunji daa, ni riga daa ni siki de su dunki yi ba dololo dege bisi zo a kisi.

24 Su gye nkiya su nkye, <<kede mu saga e yi ba,>><<Bila de mu yi kuriya de mu geni nsude yaa ma na yi.>>

Yomu paru na de e sika mbode takada Mirikisi pala nkye,

<<Su laba riga na a sisika asu

Su yi kuriya sobon keyi na.>>

Mbode shoja su yi aka.

25 A keteri ni gidiri amaa ni Yesu, nja yayiwa ni amaa e yi, Meremu mata ni Kilobas nja Meremu dege Magadaliya. 26 De Yesu geni amaa e yi, nja yayagizi de yaa so sakisi anya ni, Yesu gye amaa e yi nkye, <<Mase, Yaa ke naka,>> 27 Yesu gye yayagizi ni nkye, <<Amaa ke aka.>> Dege kwanki ni, yayagizi Yesu ni la amaa ni Yesu ta a gizi yi.

28 Yesu shina nkye su gama guru mbo, nja de takada Mirikisi e sika, Yesu nkye, <<Na bila de Ni sha riki.>> 29 Anya ni gwala daa de mani riki inebi de musha, se su juku soso a siki yi, su sa soso a siki gwala ntasi, su sa Yesu nshi a baki. 30 De Yesu sha riki inebi de musha mu nkye, <<Eya!>>

Se Yesu sonka nkiya yi e beyi Aworo yi se e muntu.

31 Tunde e ma nana ni shiri Yawudawa la, nja nana ni bi ma asibi, sobon yomuna Yawudawa su bila de e bila nki Yesu a gidiri ari a kwanki ni asibi ba, su bila dama anya Bilatu de su keriya su seni nja su sonka nkiya su dege gidiri. 32 Nkayomua shoja su te keriya seni nseminji ni pari de su gidiri yi nja Yesu, su kwa keriya ni nse ni bi. 33 Sede de su zo anya Yesu e rigye muntu. Sobon yomuna su keriya seni Yesu ba. 34 Sede shoja daa sukwa yi ni dagi a kekeri. Dandani se zini nja riki butu a nki Yesu. 35 Nseminji de geni mbo mu beyi sheeda a kiya e yi, sheeda yi ma gaskye la. E shina nkye e ma pala gaskye la, E pala mbo mu de ku yeda. 36 Mbo worosu mu paru de beta Mirikisi e sika: <<Ba keshi ni nki yi daa de sua keriya ba.>> 37 Yiride e ma a siki beta Mirikisi nkye, <<Sua nya ndani kone nsude su sukwa yi mmasu.

38 A beyi mbode paru, Yusupu nseminji Arimatiya minya Bilatu de e beyi nki ni Yesu, Yusupu de ma yaagizi Yesu a boyi sobon womba ni Yawudawa de kede su shina nkye ema yaagizi Yesu ba. E bila dama anya ni Bilatu, e zo la nki Yesu te nshi. 39 Nikodimu nseminji de para zo anya Yesu ndederi, E zo ni mayi myrrh nja alosi gongo kusa ni kilo talatin. 40 Se su la nki Yesu lende a woriki peri, yada ni keyi kemeshi, yiride alada ni Yawudawa ni bishina nsebeki ma. 41 Bikiya daa ma a keteri de su gidiri Yesu, a siki yi kumsha daa sabuwa ma anya ni de su taba sa nseda a siki yi ba. 42 Tunde e ma nana shiri ni Yawudawa la nja kumsha daa ma kusa anya ni, su la Yesu sa ashi