1 Kapi de nana ni buki nyenteri yi. Yesu shina nkye kwanki yi de yaa bila durinya yaa kuma te anya ni Adaa. Yaa so ntani e yi de su ma a durinya mu, e nana su guru yiri so de yaa yi a kiya asu soseyi. 2 De Yesu nja yayagizi yi ma siki si mbosi ni nyema, obiri rigye yuru a dishiya ni Yawuda nse ni Isikariyoti, yaa ni Sima, de e butu Yesu a beyi. 3 Yesu shina nkye Adaa beyi guru mbo a siki nani yi, e zo dege anya Mirikisi anya Mirikisi la yaa kuma te; 4 Se Yesu dege a bisi anya si mbosi, e butu riga yi ni woze e la woriki domuna a goto. 5 A beyi yomu, e sua riki nya a terebi na e para wonkye seni ni yayagizi yi e kunshe woriki de domuna a goto e shire su seni.

6 De e zo anya Sima Biturusu, Bitrusu minya yi nkye, <<Obagizi E ke na ka wonkye ni seni na?>>

7 Yesu keleba yi nkye, <<Ka taba shina mbode mma yi kuzukam ba, sede ta a geba ka shina.>>

8 Biturusu keleba nkye <<ayi,>> <<Ka taba wonkye seni naa ba.>>

Yesu keleba nkye, <<Nde Ni wonkye ke seni ba, Kaa taba ma yaagizi naba.>>

9 Biturusu keleba nkye, <<Obagizi,>> <<Ba seni na kede naba ka wonkye ba sede nani nja kiya na du!>>

10 Yesu keleba yi nkye, <<Nsude yi wonka yaa bila wonkye seni na kede; sobon nki yi guru ma sere wo. Oku kuma sere, sede ba guru ku naba.>> 11 Sobon Yesu shina nsude yaa butu yi a beyi, mbode sa de e pala nkye, ba guru ku na kuma ni dishiya sere ba.>>

12 De Yesu gama wonkye seni su, se e yaapi riga yi ni woze e kuma te anya de e zunwa ashi. E minya su nkye. <<Ku shina mbode ni yi ku nshi?>> 13 Kuma sukwa ni nkye, <Male> nja <Obagizi,> e ma kyakya, sobon yomu na Ni ma. 14 Kuzukam de Ni ma Obagizi nja Male ku, Ni wonkye seni ku, e ma dole na oku ma ku wonkye seni nkiya ku. 15 Ni yi ku yomu sobon de oku ma ku yi yiride ni yi ku nshi. 16 Mma gye ku gaskye, bunwa yaa pi nsugizi yi ba, ko yamanki de yaa pi nsude saka yi girima ba. 17 Kuzukam de ku shina gaskye, nde ku yi su kwa ma nsu anabirika.

18 Ba guru aku na mma yi nupi nja ku ba; Ni shina worede ni zabi. Sede dole mbode ma rubuta a siki takada Mirikisi e sika: <Nsude e ma si mbosi nja ni e shiya yaa yi geba nja Ni.> 19 <<Mma gye ku mbom kuzukam kapi de e zo paru, sobon nde e te zo paru kua beigaskye nkye E ni na ni ma e shi. 20 Mma gye ku gaskye, Du nsude keleba nsude ni saka yi E ni la e keleba; nja du nsude keleba ni e keleba nsude saka ni naka.>>

21 A beyi de e pala yomu, Yesu damu a siki dishiyeyi se e pala a pili nkye, <<Ni ma gye ku gaskye, daa a siki ku yaa butu ni a beyi.>>

22 Anya ni yayagizi yi su ma kone nkiya su, su lesa shina ko waa na a siki asu. 23 Se daa a siki yayagizi de Yesu ma so soseyi, e zunwa mala ni Yesu. 24 Sima Biturusu e yi beta nnani nkye, <<minya yi waa yaa yi nupi nja shi.>>

25 Se yaagizi de mala ni Yesu, minya yi nkye <<Obagizi, waa ma e shi?>>

26 Yesu keleba nkye, <<E shiya Na sa loma buredi agongo de ni beyi.>> Se, Yesu sua buredi, munka Yawuda Isikariyoti, yaa ni Sima. 27 Dandani de Yawuda keleba loma buredi, Obiri yuru a siki dishiyeyi.

Yesu gye yi nkye, <<Mbode ka bila de ki yi, te de ki yi seseberi!>> 28 Sede nseda a siki su de su zunwa ma si mbosi shina mbode Yesu gye Yawuda Isikariyoti ba. 29 Tunde Yawuda na bogolo gyolo asu ma ananiyi, worosu sua geni kankye Yesu gye yi de e te see su keyi ni buki la, ko e ba potoruwa mbodaa. 30 Dandani de Yawuda suku buredi, e butu te a woze. De dederi rigye yi.

31 De Yawuda butu, Yesu nkye, <<Kuzukam Yaa nsebeki yaa mani Dereja nja Mirikisi yaa mani dereja te anya e yi. 32 Nde sua ba Mirikisi dereja te anya Yaa, Mirikisi yaa ba Yaa dereja anya e yi, dandani yaa beyi dereja.

33 <<Oku yaya na dende, nama nja ku ni kwanki piri. kwa bila ni, yiride ni gye Yawudawa, yomu na mma gye ku kuzukam: Anya de na te, kwa yi yaa te ba.

34 <<Sabuwa doka la na ba ku: Ku so nkiya ku. Yiride ni so ku, dole na oku ma ku so kiya ku. 35 Yomuna guru ntani sua shina nkye ku ma yayagizi na, nde ku so nkiya ku.>>

36 Sima Biturusu minya Yesu nkye, <<Obagizi, angana ka te?>>

Yesu keleba yi nkye, <<anya de na te, ka yi yaa biya ni ba, sede dege beyi ka biya ni.>> 37 Biturusu minya nkye, <<Obagizi, mina sa de na biya ke kuzukam ba? Ni ma ashiri de ni beyi leyi na ni Muntu sobon ke.>> 38 Se Yesu keleba yi nkye, <<Gaskye la, ka beyi leyi ke sobon e ni? Mma gye ke gaskye, kapi de zakala yaa yi kala, ka yi musu shina ni sen wuku!