1 A beyi yomu Yesu pelesa kiya yi te nja yayagizi yi jaja, a baki ni totolo riki ni Tiberiya, yiri de e paru aka: 2 Sima Biturusu, Tomasi de sua sukwa yi yaa togoyi, Nantaniyel nseminji kesa ni kaana ni Galili, yaya ni Zabedi, nja yayagizi Yesu guda bi su ma gabada. 3 Se Biturusu gye su nkye,<<Na te ka gunda,>><<Omu mua biya ke.>>se su butu te yuru a kwanto, su ka mbodaa ndederi ni ba.

4 Se nsasape, Yesu zo sakisi a baki ni totolo riki, sede yayagizi shina nkye e ma Yesu naba

5 Se Yesu sukwa su nkye,<<Oboki ku ka gunda bo?>>

Su keleba nkye, <<Ayi>>

6 Se Yesu gye su nkye, <<Ku kutiri eya ku a keteri nani dama ni kwanto kwa ka gunda.>> de su kutiri eya su, su ka gunda nyowa ari su ma sori jaa eya su ba sobon nyowa gunda de su ka.

7 Yaagizi de Yesu yaa so e gye Biturusu nkye, <<Ema Obagizi la!>> dandani de Sima Biturusu zi yomu, se Biturusu la rigye yi sa nki sobon e mani riga nki ba se e tirimi te a siki riki. 8 Worosu yayagizi biya keyi baki riki a siki kwanto, jaa eya sika ni gunda, sobon su yi nyisa ni kesa ba, e man kankye seni gonta deri. 9 De su keyi woze, su geni agushi wuta ni gunda kyapa a siki wuta, nja worosu su buredi

10 Se Yesu gye su nkye, <<Zo ni worosu gunda de ku ka.>>

11 Se Biturusu yuru a kwanto te jaa eya zo a woze, sika ni totolo gunda deri daa ni amisin ni wuku, sede kode nkye ka yowa gunda iya pirigye ba. 12 Se Yesu gye su nkye, <<Ku zo de ku si mbosi.>> ko daa a siki yayagizi minya yi nkye, <<Waa ma eke ba?>> Su shina nkye ema Obagizi la. 13 Se Yesu zo, e la buredi na ba su, nja e yi yomu du ni gunda. 14 Da mu nama ni wuku de Yesu pelesa kiya yi te nja yayagizi a beyi de e dege a kumsha.

15 De su gama si mbosi, Yesu gye Sima Biturusu nkye, <<Sima yaa ni Yaaya, Ka so ni ngaskye pi yiride ririgye yayagizi amu sua so ni?

<<E ba, Obagizi,>> e gye yi nkye, <<Ki shina nkye E ni ma so ke.>>

Yesu gye yi nkye, <<Kula ni timshiya na.>>

16 Yesu minya jaja nkye, <<Sima yaa ni Yaaya, ka so Ni ngaskye?>>

Se Biturusu keleba nkye, <<E ba, Obagizi,>> <<Ki shina nkye mma so ke.>>

Yesu gye yi nkye, <<kpanku timshiya na.>>

17 Se Yesu minya yi ni sen wuku nkye, <<Sima yaa ni Yaaya, ki ma so ni?>>

Se Biturusu yi anwashi sobon de Yesu minya yi ni wuku nkye, <<Ka so ni?>>Se Biturusu nkye, Obagizi ki shina guru mbo; ki kwa shina nkye Ni ma so ke.>>

Yesu gye nkye, <<Kpanku timshiya na. 18 Mma gye ke gaskye, de ki ma sambari ka sa nki ke keikei ka te a guru anya de ke bila de ki te; sede nde ki sopa ka munka nani ke, na nseda yaa sa ke keikei a nki yaa keyi ke te anya de ka bila de ki te.>> 19 Yesu pala yomuna de e nana yiride Biturusu yaa muntu de e dereja Mirikisi. Se Yesu gye su nkye, ku biya ni.

20 De Biturusu juyi e geni yaagizi de Yesu yaa so ma biya su. E shiya ma nsude zunwa kusa ni Yesu a kwanki de sua si mbosi buki nyenteri de minya Yesu nkye, <<Obagizi, Waa yaa butu ke a beyi>> 21 De Biturusu geni Yesu, e minya su nkye, <<Obagizi, nseminji pa?>>

22 Se Yesu keleba su nkye, <<Nde Ni bila yi de e man leyi ari nana de Na kuma mbayi, mina dama ke? E ke de ki biya ni>> 23 Beta mu gyewe a siki nsubiya Yesu nkye yaagizi mu yaa muntu ba. Sede Yesu pala nkye ba yaa ki muntu aba, sede nkye, <<Nde ni te bila de e mani leyi ari nana de Na kuma mbayi, mina dama ke?>>

24 E shiya ma yaagizi de beyi sheeda a kiya mbo mu e kwa rubuta su. Mu shina nkye sheeda e yi ma gaskye la.

25 Yesu yi mbo mamanki worosu nyowa. Nde guru mbode Yesu yi su rubuta e yi takada guru durinya sua yi yaa la ba.