1 Su yi nseda nsu seni Lazaru. E meyi zunwa a Betani, a dende geri de Meremu nja yayiwa e yi Mata su ma. Lazaru e meyi suwo. 2 Lazaru, de e meyi suwo, e ma yayiwa ni Meremu de nya Obagizi meyi kemeshi a seni de e kwa shire seni yi ni gesa kiya yi. 3 Meremu nja Mata yayiwa Yesu su beyi manki te nja Yesu nkye, <<Obagizi, oboki ke de ki ma so soseyi ema yi suwo.>>

4 De Yesu zi yomu, e pala nkye, <<Suwo mu yaa taba kisa Lazaru ba. Sede yaama delili de ntani sua ba Mirikisi girima su kua ba Yaa yi dereja.>> 5 Yesu so Meremu nja yayiwa e yi Mata nja Lazaru. 6 Nzun yomu de e zi nkye Lazaru e meyi suwo, Yesu kwa ja kwana bi anya de e ma tuku e dege te.

7 Se Yesu gye yayagizi yi nkye, <<Ku dege de mu kuma mbayi ta Yawudiya.>>

8 Sede yayagizi yi su nkye <<Male, e dede ba aka de Yawudawa su bila de su ripi ke ndunsi, ka kwa kuma mbayi te anya ni?>>

9 Yesu keleba nkye, <<Keripi gom sha bi na e ma nana daa bo? Sobon yomu guru nsude e meyi tepiya nnana yaa titimi ba, sobon e ma geni asikye durinya mu. 10 Sede guru nsude e meyi tepiya ndederi yaa titimi, sobon e ma geni asikye ba.>>

11 De Yesu pala yomu, e sigeba ni gye su nkye, <<Oboki amu Lazaru e muntu; sede Na te de ndege yi.>>

12 Yayagizi yi su pala gye yi nkye, <<Obagizi, nde e ma yi kwana la, yaa worikye.>> 13 Yesu meyi nupi Lazaru muntu la, sede Yayagizi yi su ma geni kankye Lazaru e ma yi kwana ni pushe la.

14 Anya ni Yesu gye su a pili nkye, <<Lazaru muntu, 15 Sede sobon oku la mma yi peri siki de ni ma ayan ba, sobon de ku beigaskye. Ku dege de mu te anya e yi.>>

16 Ayan Tomasi de sua sukwa yi nkye Togoyi, gye ririgye yayagizi Yesu nkye, <<Omu ma mu te de mu muntu nja shi.>>

17 De Yesu keyi Betani, e zi nkye, Lazaru muntu ari su bishina yi kwana wuru aka. 18 Betani e keyi meli bi ba nyisa yi nja Wurishelima, 19 Yawudawa nyowa su te a Betani de su ba Meremu nja Mata ankuri sobon yayiwa su de muntu. 20 De Mata zi nkye Yesu ma zo, E butu te de yi Yesu naaba, sede Meremu zunwa meyi a gizi.

21 Mata gye Yesu nkye, <<Obagizi,>> <<de ki ma anya mu, yaa na yaa muntu ba. 22 Sede ko kuzukam ni shina guru mbode ki ologba Mirikisi yaa ba ke.>>

23 Yesu gye yi nkye, <<Yayiwa ke yaa dege nleyi jaja.>>

24 Mata keleba nkye, <<Ni shina yaa dege jaja a nana karishe.>>

25 Yesu gye yi nkye, <<Eni la ni ma dege kumsha nja leyi. Guru nsude beigaskye nja ni, ko e muntu yaa kwa dege nleyi 26 Guru nsude e man leyi nde e beigaskye nja ni yaa muntu ba gbogbo. Ki beigaskye yomu?>>

27 Mata keleba nkye, <<Ee, ni beigaskye Obagizi, eke la ki ma Kiristi, Yaa Mirikisi, de yaa zo a durinya.>>

28 De Mata pala yomu, anya ni e kuma te a gizi se e sukwa yayiwa yi Meremu a keteri. Mata gye yi nkye, Male zo,>> <<E ma minya beta ke.>>

29 De Meremu zi yomu, e dege seseberi te anya Yesu. 30 Ari kuzukam Yesu tuku yuru a siki Betani wo ba, sede e tuku ma anya de Mata te tele yi a turiki. 31 De Yawudawa de su ma nja Meremu a siki gizi su ma beyi takuwa, su geni Meremu dege seseberi e butu te a woze, se su biya yi, su ma geni kankye Meremu yaa te a kumsha de yi kuka la.

32 De Meremu keyi anya de Yesu ma e kwa geni Yesu, e puari a geba Yesu nkye, <<Obagizi, de ki ma anya mu, yayiwa na yaa muntu ba.>>

33 De Yesu geni Meremu meyi kuka, Yawudawa de su zo nja shi guru su su ma yi kuka du, anya ni e suwe Yesu a dishiya yi beki siki soseyi. 34 Yesu minya su nkye, <<Anga la ku bishina yi?>> su keleba nkye,

<<Zo ki geni, Obagizi,>>

35 Anya ni Yesu yi anwe.

36 Sobon yomu na Yawudawa su nkye, <<Geni yiride ema so Lazaru!>>

37 Sede worosu su a siki Yawudawa su nkye, <<E bure ndani makapi mina sa de e nana nseminji mu muntu ba?>>

38 De e sakye suwo Yesu a dishiya soseyi, se Yesu te a kumsha anya de su bishina yi. Kumsha ni ema a koga dunsi la su la totolo dunsi ripe baki. 39 Yesu pala nkye, <<Ku la dunsi bila baki kumsha,>>Mata yayiwa ni Lazaru nkye,

<<Sede, Obagizi,>> <<Kuzukam yaa para royi sobon yawu e yi kwana wuru naka a kumsha.>>

40 Anya ni Yesu gye Mata nkye, <<Ba ni rigye gye ke nkye nde ki beigaskye, ka geni girima Mirikisi bo?>>

41 Se ntani su dege dunsi ni. Se Yesu dege ndani yi a bisi nkye, <<Adaa, ni gbede nke sobon de ka zi ni. 42 Ni shina a kowoni kwanki ki ma zi ni, sede ni pala yomu la de ntani de su ma anya mu su beigaskye nkye e ke la ki saka ni.

43 De Yesu pala yomu, se Yesu dege murinya nsori nkye, <<Lazaru, butu!>> 44 Se Lazaru butu a kumsha, ni nani nja seni yi domuna, ni angwe woriki bishina gan gyewe Pisika yi. Yesu gye su nkye, <<Ku kunshe angwe woriki mu de ku bila yi de e te.>>

45 Nkayomu ntani Yawudawa nyowa de su zo anya geshe Meremu, geni mbode Yesu yi, su beigaskye nja shi. 46 Sede worosu asu te gye Parisiyawa mbode Yesu yi. 47 Se Parisiyawa nja toree pirisi su yada kiya su. Su minya nkiya su nkye,

<<Mina mua yi? Nseminji mu aka e meyi guru mbo mamanki nyowa. 48 Nde mu bila yi de e sigeba ni mbode e meyi mu, guru ntani sua beigaskye nja shi, ntani Roma sua keleba mu kesa mu nzun Laki Mirikisi mu.>>

49 Se nseminji daa de su ma sukwa yi Kayapa e shiya ma tolense ni nsu pirisi a shekera ni, gye su nkye, <<ku shina mbode e ma paru ba durum! 50 E yi kyawu de nseda e muntu sobon ni ntani nyowa nja de ntani guru sua muntu.>>

51 Beta mu de Kayapa pala e ma tunani kiya yi naba, sede de e ma tolense pirisi a shekera ni na e yi aneshi nkye Yesu yaa muntu sobon ni ntani Yawudawa, 52 Yesu yaa muntu sobon ntani Yawudawa na kin ba sede nzun yaya Mirikisi de su yaapi a woze a ko anga, de e yada su su ma daa. 53 Dege nana ni na Yawudawa su bila turiki de sua kisa Yesu.

54 Nkayomu Yesu sakye yi tepiya a siki Yawudawa a pili gagaba. Yesu bila anya ni te a geri de ma kusa ni denka de mbodaa ma ba, de su ma sukwa yi Ipirayimu, anya ni e zunwa nja yayagizi yi.

55 De kwanki ni Buki nyenteri ni Yawudawa kusa, ntani nyowa butu dege kesa asu su ma te a Wurishelima de su wonkye nkiya su de su jima Mirikisi sobon yiri alada su ni Yawudawa. 56 Su ma te bila Yesu, su sakisi a siki Laki Mirikisi su ma minya nkiya su nkye, <<Ku ma geni yaa zo a buki mu?>> 57 Sede toree ni nsu pirisi nja Parisiyawa su beyi doka nkye guru nsude geni Yesu e gye su de su keyi.