1 A beyi de Yesu pala mbom, e dege ndani kone bisi e yi lepa nkye:

<<Adaa na, kwanki rigye keyi wo de ka ba Yaa ke girima, de Yaa ke e ba ke girima. 2 Sobon ki ba Yaa ke yiko a kiya guru ntani beki de e ba su leyi ni gbogbo, worede e ke Ki ba yi. 3 Leyi ni gbogbo e shiya ma: de ntani su shina ke, e ke de ki ma Mirikisi ni gaskye, nja Yesu Kiristi, de ki saka yi. 4 Ni ba ke girima a durinya mu; te anya gama ANKI de ki ba ni de Ni yi. 5 Kuzukam, Adaa na, Ki ba ni girima a geba ke girima de Ni manshi tun kapi su yi durinya.

6 Ni rigye pelesa seni ke ba worede ki ba ni dege siki durinya mu, su ma na ke la, eke na ki ba ni su. Osu su ma beyi beta ke. 7 kuzukam su shina nkye guru mbode Ki ba ni butu anya ke. 8 Ni gye su kelima de ki ba ni nja su keleba. Su shina nkye e ma gaskye de Ni butu anya ke, nja su yeda nkye eke na ki saka ni. 9 Ni yi su lepa. E ni mma yi durinya na lepa ba, sede worede ki ba ni sobon su ma na ke la. 10 Guru mbode Ni manshi e ma na ke la, nja guru mbode ki manshi e mani nna du. Ni samu dereja ta anya su. 11 Kuzukam Ni mani kwanki nyowa durinya gagaba sede osu tuku ma a siki durinya, E ni ma zo anya ke, Adaa Nsuseki, tengele su ni sori seni ke, seni de ki ba ni sobon de su ma daa yiride omu muma daa nja ke. 12 De Ni ma nja su, Ni tengele su ni seni de ki ba ni. Ni lesa nseda su ba sede daa ni de lesa kiya yi sobon su nupi yi de e bebeta de takada Mirikisi e sika 13 <<Kuzukam Eni mma zo anya ke, sede ni pala mbo mu de Ni tuku ma a siki durinya, de perisiki e sika a dishiya su. 14 Ni gye su kelima ke nja durinya sua yi geba nja su sobon su ma ni durinya naba yiride e ni ni ma durinya ba. 15 Lepa na e shiya ma de ki butu su bila durinya ba sede ki tengele su dege mungu ni. 16 Su ma ni durinya na ba yiride E ni ni ma ni durinya na ba. 17 Sa su ma sere te anya kelima ke ni gaskye; kelima ke ma gaskye la. 18 Yiride ki saka ni a siki durinya E ni ma mma saka su te a siki durinya du. 19 Sobon ni osu na Ni sa kiya na ma sere te anya ke, de osu ma su ma sere ta anya gaskye.

20 <<Lepa na ma sobon yayagizi na kede ba sede Ni lepa sobon worede sua yeda ni manki de su zi dege anya su. 21 Ni yi lepa de guru su su ma daa, Adaa na, yiride ki ma a siki na nja E ni ma a siki ke. Bila de osu ma du ma daa asika mu de durinya su yeda nkye e ke na ki saka ni. 22 Dereja de ki ba ni Ni ba su, de su ma yiride mu ma daa nja ke: 23 Ni ma a siki asu e ke ki ma a siki na. Bila de su ma daa soseyi de durinya su shina nkye eke na ki saka ni nja ni so su yiride ka so ni

24 Adaa na, bila de worede ki ba ni su zunwa nja ni de su geni dereja na, dereja de ki ba ni sobon de ka so ni kapi de su yi durinya. 25 <<Adaa na gangasi, ntani durinya su shina ke ba. Sede E ni Ni shina ke, nja yayagizi na su shina nkye eke na ki saka ni. 26 Ni sa su shina ke, na sigeba de su shina ke, sobon so de ki manshi yaama a siki su nja de e ni mma a siki su.>>