1 Buki ni nyenteri rigye nana shida, Yesu te a kesa ni Betani, anya de Lazaru nsude Yesu dege yi a kumsha yaa zunwa. 2 Anya ni su beyi mbosi ni nyema, Mata ma nsu sua nto, Lazaru ma a siki worede su zunwa a kingbolo si mbosi nja Yesu. 3 Se Meremu la koluba ni meyi kemeshi ni nardi de ma sere, meyi kemeshi nsu gyolo nyowa, e la nya a seni Yesu nja e shire Yesu seni ni gesa kiya yi. kemeshi kakada gizi ni guru.

4 Sede daa a siki yayagizi yi, Yawuda Isikariyoti, nsu de yaa butu Yesu a beyi, pala nkye, 5 <<Mina yaa nana de su la meyi kemeshi mu see de su la gyolo ni ba potoruwa ba? E deta gyolo de nse yaa yi anki shekera daa.>> 6 E pala yomu, ba sobon yaa so potoruwa naba sede sobon e ma bolowa la; e shiya bogolo ni gyolo su ma a nani yi, e meyi bolowa dege siki gyolo de ma anya yi.

7 Yesu keleba nkye, <<Ku bila yi meyi>> <<Yaa la meyi mu sa pekye nana de sua bishina ni. 8 Kowoni kwanki kuma nja potoruwa, sede ba kowoni kwanki na kwa ma nja ni ba>>

9 De ntani Yawudawa nyowa de su zi nabari Yesu ma anya ni se su zo, ba sobon Yesu eshi dandaa naba sede sobon de su geni Lazaru, nsude su dege yi a kumsha. 10 Se tolense pirisi su yi showura de su kisa Lazaru du, 11 sobon nshi la Yawudawa nyowa su beigaskye nja Yesu.

12 De geri shekeri ntani nyowa tala a buki nyenteri su zi nkye Yesu ma a turiki de yaa zo a Wurishelima. 13 Se su kwa yi opanpo gima su butu woze de su gomu nshi, su dege murinya sua nkye <<Osana>> <<Anabirika ma nja nshi nsu de yaa zo a siki seni ni Obagizi!>> <<Anabirika ma nja Seleki ni Izireyila!>>

14 De Yesu samu yaa janki daa se e zunwa a kiya e yi, yiri de e ma a rubutu nkye,

15 <<Kede ki zi womba, e ke yaamase ni Siyona;

<<Geni Seleki ke nama zo ka

e zunwa a kiya yaa janki>>

16 Yayagizi Yesu gane mbo worosu mu dege pari ba. Sede a beyi de su la Yesu te a siki dereja yi, Se su turunwa ni mbode su rubuta a kiya e yi na su yi Yesu mbo mu

17 Ntani de su tala anya ni nja Yesu a kwanki de e dege Lazaru a kumsha worede su ma anya ni su sigeba ni beyi sheeda a kiya mbode Yesu yi. 18 Sobon su zi mbo mamanki de Yesu yi, na ntani nyowa butu de su gomu nja shi. 19 Se anya ni Parisiyawa gye kiya su nkye, <<Geni, mbo mu yaa keyi mu ta anya daa ba. Kone yiride konwawa durinya su ma biya yi!>>

20 Worosu su Helenawa a siki worede su te anya buki a Wurishelima de su yi bowuta. 21 Su zo anya ni Pilibu, nsu de e butu a Beseda ni kesa Galili, ni pata. <<Tolense>> su nkye << Mua bila de mu geni Yesu.>> 22 Pilibu te gye Anduru; Anduru nja Pilibu te gye Yesu.

23 Yesu keleba su nkye, <<Kwanki yi wo de sua ba Yaa nsebeki girima. 24 Mma gye ku gaskye, se ku bishina saba ni alkama a kisi de e muntu tuku ba, yaa ma yiri ndandaa. Sede nde e muntu tuku yaa yapu nyowa. 25 Nsude yaa so leyi yi yaa lesa yi, sede nsude ki leyi yi a durinya mu sobon Eni yaa mani leyi ni gbogbo. 26 Du nsude yaa bowuta ni dole na e biya ni; nja anya de ni ma, bunwa na yaa ma nja ni du. Adaa na yaa ba guru nsude bowuta Ni girima.

27 <<Kuzukam dishiya na ma a siki ngala, mina na pala? <Adaa, sila nni butu a kwanki mu>? Yi, sobon kwanki mu na ni zo. 28 Adaa, ki dereja seni ke!>>

Se murinya butu a bisi nkye, <<Ni dereja ke, Na kwa dereja ke jaja.>> 29 Ntani nyowa de su tala anya ni zi murinya mu su nkye mu zi kankye akpala; worosu su nkye meleku Mirikisi na yaa yi beta nja shi

30 Yesu nkye, <<Murinya mu e ma sobon ku la, ba sobon e ni naba. 31 Kuzukam na e ma kwanki de sua yi durinya shiriya; kuzukam na nsu solota durinya mu sua butu yi a solota durinya. 32 Nde su dege Ni a kisi, na jaa guru ntani zo anya na.>> 33 Yesu pala yomu de e nana yiride yaa muntu.

34 Ntani pala nkye, <<Mu zi dege siki doka nkye Kiristi yaa ma ari gbogbo, yaya na ka nkye, <<Dole na sua dege Yaa nsebeki a bisi>? Waa ma <Yaa nsebeki mu>?>>

35 Se Yesu gye su nkye, <<A siki kwanki piri asikye yaa ma nja ku. Ku yi tepiya a kwanki de asikye ma nja ku, kede dopuwa e shakiya aku. Nsude meyi tepiya a siki dopuwa yaa shina ko angana yaa te ba.

36 Ku beigaskye ni asikye tunde e tuku ma nja ku, de ku ma yaya asikye, >> De Yesu gama yi beta mu, e dege te boyi kiya yi dege anya su.

37 Kode Yesu yi guru mbo mamanki mu a geba su, nzun yomu su ki beigaskye nshi. 38 Nsum e ma de su sika mbode e ma a rubuta a siki takada anebi Ishaya nkye:

<<Obagizi waa beigaskye ni manki mu

nja te anya waa Obagizi ka pelesa yiko ke?>>

39 Sobon delili mu la sa su beigaskye ba, yiride anebi Ishaya pala anya daa a siki takada e yi nkye:

40 <<Mirikisi sa su ma makapi

nja e sa dishiya asu yi tori

de kede su geni ni ndani su,

ko su gane ni dishiya su,

de su juyi zo anya na de Ni worikye nsu.>>

41 Anebi Ishaya pala mbo mu sobon e geni dereja ni Yesu> nja e beyi manki a kiya Yesu.

42 Nzun yomu kwanki ni ntani nja toree Yawudawa nyowa su beigaskye ni Yesu. Sede sobon Parisiyawa su ki yi beta a pili su zi womba kede su kula su bila kolonwa; 43 Su pi so yobo dege anya ntani nja pi yobo ni Mirikisi.

44 Se Yesu dege murinya nkye, <<Guru nsude beigaskye nja Ni, e beigaskye nja E ni dandaa na ba, sede nja nsude saka ni. 45 Du nsude kone ni, yaa geni nsude saka ni na du. 46 Ni zo a siki durinya a kiya de ni ma asikye la, de du nsude e beigaskye nja ni yaa zunwa a siki dopuwa ba.

47 <<Nsude zi kelima na biya yi ba, Na yi shiriya ba. Ni zo de ni yi ntani durinya shiriya na ba, sede ni sila nshi. 48 Sede Ni ma ni nsude yaa yi shiriya du nsude ki ni e kuma ki biya kelima na; kelima de ni pala na yaa yi su shiriya a nana karishe. 49 Ba ni yi beta mu dun kiya na ba, sede Adaa de saka ni na ba ni doka ni mbode na pala nja yiride na yi beta. 50 Ni shina nkye doka yi de e beyi e ma leyi ni gbogbo na, sobon yomu guru mbode mma pala e ma mbode Adaa gye ni nkye ni pala.>>