1 A nana ni wuku su yi buki ni amere a kesa Kaana ni Galili. Amaa ni Yesu ma ayan, 2 su woyi Yesu nja yayagizi yi ma du a buki amere ni. 3 De riki inebi yaa, amaa ni Yesu gye yi nkye, <<Riki ni inebi asu yaa.>>

4 Yesu keleba nkye, <<Amaa, kede e dama ke>> <<Kwanki na tuku yi woba.>> 5 Amaa Yesu gye nsu bunwa ni nkye, <<Ku yi guru mbode Yesu gye ku nkye ku yi.>> 6 Anya ni tuni kesa gunda shida sakisi, de Yawudawa su meyi ampani nshi sobon alada asu ni wonkye nki, kowoni tuni daa yaa si gwala riki ashiri nja talatin.

7 Yesu gye bunwa nkye, <<Sika tuni worosu mu ni riki>>; Se su sika tuni woroni ni riki e nya.

8 Se e gye su nkye, <<Kuzukam ku sa riki keyi tolense ni buki.>>

Su yi yiride e gye su, 9 tolense buki sha riki ni piri de rigye juyi ma riki ni inebi. E shina ko angana su butu nshi ba, kode nkye bunwa de su sua riki shina anya de e butu. Se e sukwa minzi okeshe a keteri 10 nkye, <<Konse ma para beyi riki inebi kyakyawu nde ntani sha nyowa tuku yaa zo ni daa de yi kyawu kankye daa ni ba; sede e ke ki la kyakyawu riki inebi boyi ari kuzukam.>>

11 Daa mu e shiya ma alama mbo mamanki ni pari, de Yesu yi a Kaana kesa Galili. Yomuna e pelesa dereja e yi sori yi, se yayagizi yi su beigaskye nshi.

12 A beyi da mu Yesu ta Kapanawu nja Amaa e yi nja yayuwa e yi nja yayagizi yi. Anya ni su yi kwana bi.

13 De e keyi kwanki ni buki nyenteri ni Yawudawa, Yesu te a Wurishelima. 14 A siki pili Laki Mirikisi Yesu geni ntani su ma la saa, nja timshiya, nja tatambiri see, nja nsu shenja gyolo zunwa a teburu asu . 15 Se Yesu lende ambere, kula su guru bila pegye laki Mirikisi, nzun timshiya, nja saa; e la gyolo nsu beyi shenja yaapi nja e burunwa teburu su. 16 Worede sua la tatambiri see e gye su nkye, <<Ku butu mbo woromu bila anya mu! Kede ku juyi gizi Adaa na ma bije!>>

17 Yayagizi yi su turunwa nkye e ma rubutu a siki takada Mirikisi nkye: <<Memeri ni so de ni meyi gizi Mirikisi e ma suwuta ni kankye wuta.>>

18 Se toree ni ntani Yawudawa su minya Yesu nkye, <<Woni mbo mamanki na ka yi mu nshi de nana nkye ki man sori ni yi guru mbo worosu mu?>>

19 Yesu keleba su nkye, <<Ku juru laki Mirikisi mu, Na gina yi a siki nana wuku.>>

20 Se Yawudawa keleba yi nkye, <<E la nsu adaatolo amu shekera aribeni ni shida kapi de su gini laki Mirikisi mu, e ke ki nkye ka gini yi a siki nana wuku?>> 21 Sede laki Mirikisi de Yesu meyi beta a kiya e yi nama nki yi. 22 A beyi de e dege a siki kumsha, yayagizi yi su turunwa ni mbode e pala. Se su yeda mbode su rubuta a takada Mirikisi de Yesu pala.

23 Kwanki de tuku ma a Wurishelima anya buki nyenteri, ntani nyowa su geni mbo mamanki de yi su beigaskye ni seni yi. 24 Sede Yesu yeda ni ntani ba, sobon e shina yiride ntani guru ma. 25 Yaa bila de nseda e beyi sheeda ni mbodaa a kiya nseda ba, sobon e shina mbode ma a siki dishiya konwawa.