1 A beyi nsum, Yesu gyewe geri nyowa a siki Galili, sede e bila de e te a siki kesa Yawudawa ba sobon toree Yawudiya de su ma anya ni sua bila de su kisa yi. 2 Sede de Buki Rugwa ni ntani Yawudawa su la zo kusa, 3 se yayuwa Yesu gye yi nkye, <<Bila anya mu de ki te a Yawudiya, de yayagizi ke su geni mbo mamanki de ki meyi. 4 Nsude yaa bila de su shina yi yaa taba boyi mbode e mayi ba. Tunde ki mayi yiri mbo worosu mu, se ki nana kiya ke te ni ntani durinya guru.>>

5 Du ko yayuwa Yesu ma su yeda nja shi ba. 6 Yesu gye su nkye, <<Kwanki na yi wo ba; sede anya ku kowoni kwanki e ma kyakya la. 7 Oku ntani durinya mu sua ki ku ba, sede e ni la sua ki ni sobon Ni ma beyi sheeda a kiya mbo mumungu de sua yi. 8 Ku te a buki ni ma ku. E ni na te a buki ni ba, sobon kwanki na yi wo ba.>> 9 A beyi de Yesu gye su beta mu, e zunwa nana piri a Galili.

10 A beyi de yayuwa Yesu su te anya buki ni, Yesu dege te anya buki ni du, a boyi, e bila de nseda e shina ba. 11 Anya buki ni Yawudawa su ma bila Yesu nkye, <<Nseminji ni manga?>>

12 Ntani de su tala su mayi beta a boyi a kiya Yesu. Worosu su su ma nkye, <<Yesu ma nse gangasi la.>>

Worosu su nkye, <<Yi, e ma shishirigye ntani la.>> 13 Sede nseda yi yaa yi sori dishiya de yi beta a kiya Yesu a pili ba sobon su meyi womba toree Yawudawa.

14 De buki keyi sisika se Yesu dege yuru a siki Laki Mirikisi e para kokoyi. 15 Ayan toree Yawudawa su yi mamanki soseyi su minya nkye, <<Nseminji mu taba te a makaranta ba yaya na e man shina yomu?>>

16 Yesu keleba nkye, <<Mbode mma kokoyi e ma nna naba. Sede dege anya Mirikisi de saka ni. 17 Guru nsude zabi de yi mbode Mirikisi ma bila, yaa shina ko kokoyi na butu dege anya Mirikisi la ko mmayi beta ni sori kiya na la. 18 Guru nsude ma kokoyi mbo ni sori kiya yi yaa bila yobo kiya yi la, sede guru nsude mayi kokori yobo nsude saka yi e shiya e ma nsu gaskye; yiri nse mu e ma nsu gaskye la yaa taba yi yaruwa ba. 19 Musa ba ku doka de Mirikisi beyi bo? Nzun yomu nseda ku yi yaa biya doka de Musa ba ku ba. Mina sa de kwa bila de ku kisa ni?>>

20 Ntani keleba nkye, <<Ki mani arizeni,>> <<Nsu waa sua bila de su kisa ke?>>

21 Yesu keleba nkye, <<Ni yi mbo mamanki ndandaa kya guru aku ku yi mamanki. 22 Nkayomu Musa ba ku doka nkye ku yi yaya ku menza yanka, kode nsu adatoloku na su para, nzun yomu ku mayi yaya ku yanka a nana Asibi. 23 Nde ku mayi yaya menza yanka a nana Asibi de ku biya Doka Musa, mina sa de ku mayi anwashi nja ni sobon de ni worikye nseminji a nana Asibi? 24 Kede ku yi seberi yi shiriya sobon mbode kuma geni a pili, ku kone gangasi tuku de ku yi shiriya de ma kyakya.>>

25 Se worosu su ntani Wurishelima su nkye, <<Da mu e shiya ma nseminji de sua bila de su kisa yi ni bo? 26 Kone e shi na ka mayi beta a pili, su gye yi mbodaa ba. Ko toree su yeda nkye e shiya ema Kiristi? 27 Sede mu shina anya de nseminji mu butu; sede kwanki de Kiristi ni gaskye te zo, nseda yaa shina ko agana e butu ba.>>

28 De Yesu ma kokoyi su a siki Laki Mirikisi, se Yesu dege murinya nsori nkye, <<Ee, ni shina ku shina ni, nja ku shina anya de ni butu. Sede ni zo nsori kiya na naba, nsude saka ni e ma nsu gaskye la. Ku shina yi ba, 29 sede Ni shina yi sobon dege anya e yi la Ni zo e shiya saka ni.>>

30 De Yesu pala beta mu su bila de su keyi, sede nseda kpa yi ba, sobon kwanki yi yi woba. 31 Nzun yomu, ntani nyowa su beigaskye nja Yesu. Su ma nkye, <<Nseminji mu yi mbo mamanki nyowa, nde Kiristi zo yaa yi mbo mamanki de pi ni nseminji mu.>>

32 De Parisiyawa su zi ntani su meyi musu nja nkiya su a boyi a kiya Yesu. Se tolense nsu pirisi nja Parisiyawa su saka nsu kpanku Laki Mirikisi de su ka Yesu.

33 Ayan Yesu gye su nkye, <<Kwanki de ni ma nja ku e rigye piri, Na kuma te anya nsude saka ni. 34 Kwa bila ni, sede kwa geni ba; anya de Ni ma te, kwa yi yaa zo anya ni ba.>>

35 Se Yawudawa su yi beta nja nkiya su nkye, <<Anga na yaa te de mua bila e yi ari mua geni ba? Ko yaa te anya ni Yawudawa de su yaapi a siki ntani Helenawa na, de e kokoyi ntani Helenawa anya ni? 36 Mina e mayi nupi de nkye, <Kwa bila ni, sede kwa geni ba,> nja anya de Na te, kwa yi yaa zo anya ni ba?>>

37 A nana karishe ni Buki rugwa ni de ma totolo nana, Yesu dege sakisi a bisi yi beta nsori nkye, <<Guru nsude yaa bila de e sha riki e zo anya na de e sha. 38 E ma a rubuta a siki takada Mirikisi nkye, guru nsude beigaskye nja ni yaa sha dege ndani miya ni riki nsu beyi leyi yaa butu dege siki yi.>>> 39 Yesu mayi beta a kiya Aworo Nsuseki, de worede su yeda nja shi sua keleba. Sobon a kwanki ni Mirikisi tuku ba su Aworo Nsuseki woba, sobon e tuku na Yesu girima woba.

40 De Worosu su ntani a siki yowa zi beta de Yesu pala su nkye, <<Gaskye nseminji mu e shiya ma Anebi mu de mua pekye.>>

41 Worosu su nkye, <<E ma Kiristi la>>

Ari kuzukam worosu su su pala nkye, <<Kiristi yaa butu dege Galili ba. 42 E ma a rubuta a siki beta Mirikisi nkye Kiristi yaa butu dege siki zuriya Seleki Dowuda na bo? Su yapu yi a siki Batalami, dende geri de Dowuda ma zunwa a siki yi na bo?>> 43 Anya ni baki ntani la laba bi sobon Yesu. 44 Worosu su ntani bila de su ka Yesu, sede nseda kpa yi ba.

45 De nsu kpanku Laki Mirikisi kuma mbayi te anya nsu toree pirisi nja Parisiyawa, su minya su nkye, <<Mina sa de ku keyi zo ba?>>

46 Se nsu kpanku Laki Mirikisi su keleba nkye, <<Mu taba geni nseda de taba yi beta kankye nseminji mu ba.

47 Parisiyawa minya nsu kpanku nkye, <<Nzun oku ma e shishirigye ku naka?>> 48 Ko nseda ma a siki nsu toree ko Parisiyawa de su yeda nshi? 49 Yi! Sede Ntani de su tala de su shina mbode Doka Mirikisi pala ba, Mirikisi yaa worosu su.>>

50 Nikodimu de te anya Yesu mpari e ma daa a siki nsu Parisiyawa, gye su worosu su nkye, 51 <<Doka mu pala nkye, mu para minya nsebeki mbode yi nde e yi lepi tuku de mu poro yi bo?>>

52 Su keleba yi nkye, <<E ke ma ki ma nseminji Galili la? Binshikye Beta Mirikisi, ka taba geni anya de su nkye anebi daa butu dege Galili ba.>>

53 Se konwawa te a gizi yi.