1 A beyi da mu, Yesu te Wurishelima a buki ntani Yawudawa. 2 A Wurishelima romu riki daa ma kusa ni Kopa Timshiya, de su gyowe yi ni rugwa biyari de arishiya ntani Yawudawa sua sukwa yi nkye Beseda. 3 A rugwa ni worosu su nsu suwo su ma zunwa a siki yi, ni makapi, ni gurugu, ni nsu nki sha riki. 4 Sua pekye de meleku Mirikisi e bula riki, sobon akonwoni kwanki meleku Mirikisi ma sonka de bubula riki. Du nsude para yuru a kwanki de su bubula riki, yaa worikye dege kowoni yiri suwo de e man shi. 5 Anya ni nseminji daa e ma yi suwo shekera talatin ni takusi. 6 De Yesu geni yi kwakwana anya ni, e shina nkye nseminji mu e dede de yaa suwo, Yesu minya yi nkye, <<Ka bila de ki worikye?>> 7 Nsu suwo mu keleba nkye, <<Male,>> <<Ni man nseda ba de yaa sua ni nto kwanki de Meleku bubula romu riki. Nde mma yi kokori de ni yuru nseda yaa rigye yuru.>> 8 Se Yesu gye yi nkye, <<Dege a bisi! la kalanga ake de ki yi tepiya.>> 9 Dandani nseminji ni worikye; e la kalanga yi a bisi yi tepiya te.

Nana de mbo mu paru e ma nana asibi de ntani Yawudawa sua yi ANKI ba, 10 se Yawudawa gye nseminji de worikye nkye, <<Yaa ma nana pushe la; doka nana de ki la kalanga ke a nana asibi.>> 11 Sede e keleba su nkye, <<Nsude worikye ni gyeni nkye, ni la kalanga na de ni yi tepiya.>>> 12 Se su minya yi nkye, <<Waa ma nseminji mu de gye ke nkye ki la kalanga ake de ki yi tepiya?>> 13 Nseminji de Yesu worikye nshi shina ko ema waa naba, Yesu beeta mayi a siki yowa ntani de su ma anya ni. 14 A beyi yomu Yesu geni yi a siki laki Mirikisi e gye yi nkye, <<Kone, ki worikye wo. Bila lepi ko mbodaa de pi yomu mungu e paru nja ke.>> 15 Se nseminji ni te gye toree Yawudawa nkye Yesu na worikye nshi. 16 Sobon yomu, Yawudawa su para ba Yesu Genbeki, sobon de yaa worikye ntani a nana asibi. 17 Yesu gye su nkye, <<Adaa na e mayi ANKI ari kuzukam, E ni ma du mma yi ANKI.>> 18 Sobon delili mu, Yawudawa su bila guru turiki de su kisa Yesu; ba sobon e ki biya nana asibi kin naba, sede yaa sukwa Mirikisi Adaa yi, e la kiya yi e ma kyakya nja Mirikisi.

19 Se Yesu keleba su nkye, <<Na gye ku gaskye, Yaa yaa yi mbodaa nkiya yi ba; sede mbode e geni Adaa yi mayi, sobon guru mbode Adaa mayi yomu la Yaa e shi ma du yaa yi. 20 Sobon Adaa yaa so Yaa se e nana e yi guru mbode e yi. Ari yaa nana yi mbo nsu girima de pi yomu de yaa sa ku yi mamanki. 21 Yiride Adaa ema dege worede su muntu de su ma leyi, yomu na du Yaa yaa ba worede yaa so leyi. 22 Adaa yaa yi nseda shiriya ba, sede e ba Yaa guru sori de e yi shiriya, 23 sobon de guru ntani su ba Yaa girima yiride sua ba Adaa. Nsude ba Yaa girima ba, e ba Adaa de sakye yi girima ba. 24 <<Na gye ku gaskye, du nsude zi kelima na nja e beigaskye ni nsude saka ni e mani leyi ni dindindin. sua taba yi shiriya ba; sede e nyenteri muntu te man leyi. 25 Na gye ku gaskye, kwanki mma zo ari ma e rigye zowo de worede su muntu sua zi murinya Yaa Mirikisi nja worede su zi yi sua man leyi. 26 Yiride Adaa nkiya yi e ma tutiri leyi, yomuna e sa Yaa yi e ma tutiri leyi. 27 E bayi dama de e yi shiriya sobon e ma Yaa nsebeki. 28 <<Kede ku yi mamanki a kiya mbo mu, kwanki yaa zo de worede su ma a siki kumsha sua zi murinya yi. 29 sua butu a woze, worede su yi mbo kyakyawu sua dege nleyi, se worede su yi mungu mbo sua dege nleyi te anya de sua yi su shiriya.

30 Na yi mbodaa nkiya naba; Na yi shiriya kyakya mbode ni zi, shiriya na e kwa ma gaskye, ba Na yi mbode mma so naba sede ni nsude saka ni.

31 <<Nde Ni yi sheeda kiya na, sheeda na e mani gaskye ba. 32 Sede nseda ma de beyi sheeda na, Ni shina nkye sheeda yi a kiya na ema gaskye la.

33 <<Yaaya e shiya ma nsude ku saka yi de ema nsu manki nja a kwa beyi sheeda ni gaskye. 34 Ba nkye Ni yeda ni sheeda ni nsebeki na ba; sede Ni pala yomuna de ku sila. 35 Yaaya e ma kankye pitila de yaa shi de e beyi asikye la, nja ku zabi kwanki de ku zi dadi asikye yi.

36 <<Ni mani sheeda de yi loni pi ni Yaaya de e yi a kiya na. Ni yi ANKI de Adaa ba ni de ni gama, de mma yi, sheeda nkye Adaa saka ni. 37 Se Adaa de saka ni e shi nkiya yi e meyi beyi sheeda na. Ku taba zi murinya yi ba, ko ku taba geni yi ba. 38 Ku keyi kelima yi a siki dishiya ba, sobon ku beigaskye nja nsude e saka yi ba. 39 Kuma binshikye rubutu takada Mirikisi, sobon kuma geni kankye a siki asu na kwa samu leyi ni gbogbo. Takada Mirikisi e beyi sheeda a kiya na la! 40 Sede nzun yomu ku ki de ku zo anya na de ku samu leyi.

41 <<Mma bila yobo ni ntani ba. 42 Sede Ni shina ku, Ni shina nkye kuma so Mirikisi a dishiya aku ba. 43 Ni zo a siki seni Adaa na, ku ki keleba ni; sede nde nseda zo a siki seni kiya yi, kwa keleba yi. 44 Ku pi so de ku bila yobo nja nkiya ku, sede ku ki de ku bila yobo anya Mirikisi; yaya na kwa yeda? 45 Kede ku geni kankye, Eni na ni keyi kara ku te nshi anya Adaa na. Nsude yaa geni lepi ku e shiya ma Musa, de ku sadishiya nja nshi, e shiya yaa geni lepi ku. 46 Nde ku yeda nja Musa kwa yeda nja ni, sobon Musa rubuta a kiya na. 47 Sede nde ku yeda ni mbode Musa rubuta ba, yaya na kwa yeda ni mbode Ni pala?>>