Su Ka Yesu
Mat 26.47-56; Mk 14.43-50; Lk 22.47-53
1 A beyi de Yesu gama lepa. Yesu nja yayagizi yi nyenteri miya Kidron, a keteri ni bikiya daa de ma anya ni, Yesu nja yayagizi yi yuru a siki bikiya ni.
2 Yawuda nsude yaa butu Yesu a beyi shina anya ni, sobon Yesu saba gomu nja yayagizi yi anya ni. 3 Se Yawuda nja toree pirisi nja keshi ni shoja Roma nja nsu kpanku Laki Mirikisi nja worosu parisiyawa zo anya ni, su keyi wuta pitila nja keyi yanki.
4 Yesu shina guru mbode yaa te paru nshi, Yesu ja te minya su nkye, <<Waa kwa bila?>>
5 Su keleba nkye, <<Yesu ni Nazere
Yesu nkye <<E ni na ni ma e shi>> Yawuda de butu Yesu a beyi sakisi anya ni nja su. 6 De Yesu nkye <<E ni na ni ma e shi,>> se su jaa mbayi pauri a kisi.
7 E minya su jaja nkye, <<Waa kwa bila?>>
Su nkye, <<Yesu ni Nazere.>>
8 Yesu keleba nkye, <<Ni gye ku nkye E ni naka,>> <<Nde kwa bila ni la, se ku bila worosu mu de su te,>> 9 Mbom paru la de su sika beta de Yesu pala: <<Ni lesa daa a siki worede ki ba ni ba.>>
10 Se Sima Biturusu, de keyi obalaba, e butu obalaba e butu bunwa ni tolense pirisi kuni. seni bunwa ni ma Malikus.
11 Yesu gye Biturusu nkye, <<kuma ni obalaba ke sa akupi yi, dole na de ni sha koshiya ni Genbeki de Adaa na ba ni bo?>>
Su La Yesu Te A geba Tolense Pirisi Anasi
12 Se keshi shoja nja tolense asu nja toree Yawudawa su ka Yesu, Su domuna e yi, 13 su pari keyi Yesu te nshi a geba Anasi, de ma adaa ni mata Kayapa, Kayapa nama tolense ni pirisi a shekera ni. 14 Kayapa nama daa a siki worede ba toree ni Yawudawa showura nkye yaa yi kyawu nde nseda kaka yaa muntu sobon ntani guru.
Biturusu Yi Musu Shina Yesu
Mat 26.69,70; Mk 14.66-68; Lk 22.55-57
15 Sima Biturusu nja yayagizi Yesu daa su biya Yesu. Sobon tolense pirisi shina yaagizi Yesu nsuni soseyi, e te nja Yesu a siki papada ni tolense pirisi, 16 sede Biturusu sakisi a woze a baki kopa. Se yayagizi Yesu de tolense pirisi shina yi, kuma mbayi de e yi beta nja yaamase de kpanku kopa sa Biturusu yuru a siki papada ni tolense pirisi.
17 Se bunwa mase de ma a baki kopa minya Biturusu nkye. E ke ki ma daa a siki yayagizi nse mu na bo?
Biturusu keleba nkye, <<Yi, ni ma daa a siki asu ba.>>
18 Su meyi yari, se bunwa nja nsu kpanku Laki Mirikisi sakisi gyowe sua zi wuta. Biturusu ma du sakisi nja su yaa zi wuta.
Tolense Pirisi minya Yesu Beta
Mat 26.59-66; Mk 14.55-64; Lk 22.66-71
19 Se tolense ni pirisi minya Yesu beta a kiya yayagizi yi nja mbode yaa kokoyi.
20 Yesu keleba nkye, <<Ni yi beta a pili ba durinya,>> Ni yi beta boyi ba, Ni kokoyi a kolonwa nja Laki Mirikisi, anya de guru Yawudawa sua tala gabada. Ni yi beta daa a boyi ba. 21 Mina sa ka minya ni beta mu? ki minya worede su zi ni. Ni tabata sua shina mbode ni pala.>>
22 De Yesu yi beta yomu daa a siki nsu kpanku de sakisi a keteri sala Yesu mari a pisika nkye, <<Yomuna e kamata de ki keleba tolense ni pirisi?>>
23 Yesu keleba nkye, <<Nde Ni pala mbode ma kyakya ba,>> <<Se ki pala de konwawa e zi. Sede nde Ni pala gaskye, mina sa de ki mari ni?>> 24 Se Anasi e sa su te Yesu dodomuna anya Kayapa tolense Pirisi.
Biturusu Yi Musu Shina Yesu Ni Bi
Mat 26.71-75; Mk 14.69-72; Lk 22.58-62
25 De Biturusu sakisi yaa zi wuta, worosu su minya yi nkye, <<E ke ki ma daa dege siki yayagizi Yesu na du bo?>>
Sede Biturusu yi musu nkye, <<Yi, Ni ma daa a siki su ba.>>
26 Bunwa daa dege siki tolense ni pirisi, de ma zuriya ni nseminji de Biturusu yanka yi kuni nkye, <<Ni geni ke yere nja nseminji mu a bikiya bo?>> 27 Se Biturusu yi musu jaja nkye yi, dandani zakala yi kala.
Yesu A geba Bilatu
Mat 27.1,2,11-14; Mk 15.1-5; Lk 23.1-5
28 Mbaki sasape toree Yawudawa la Yesu dege gizi Kayapa te a pada ni gomuna ni Roma. Sobon ni alada Yawudawa de sua biya kede su ma nsu dola su yuru a pada ni gomuna Roma ba, sua bila de su si mbosi buki nyenteri. 29 Sobon yomu Bilatu butu te nja su a woze minya su nkye, <<Woni mungu mbo na nseminji mu yi?>> 30 Se su keleba nkye, <<Da mua la nseminji mu zo anya ke ba, nde e yi mbodaa mumungu ba. 31 Bilatu gye su nkye, <<Ku la yi nkiya ku te de ku yi shiriya yiride doka ku pala.>>
Yawudawa keleba nkye <<Sede mu man yenshi de mu yi nseda taala muntu ba.>> 32 Nsu mu paru de e sika kelima de Yesu pala yiri muntu de yaa yi.
33 Se Bilatu kuma mbayi te a siki pada e yi, e sukwa Yesu e minya yi nkye, <<Eke na ki ma seleki ni Yawudawa?>>
34 Yesu keleba yi nkye, <<Nsu mu ma dege anya ke na ko worosu su na gye ke a kiya na?>>
35 Bilatu keleba nkye,<<Ni ma Yawudawa ba>> <<Ntani ke nja toree pirisi na su keyi ke zo nshi anya na. Mina ki yi?>> 36 Yesu gye Bilatu nkye,<<Solota na mani durinya mu aba. Da e mani durinya mu la, nsu bunwa na sua yi topula de kede su la ni ba ntani Yawudawa ba. Sede solota na mani durinya mu na ba.>>
37 Se Bilatu minya nkye, <<E ke na ki ma seleki na!>>
Yesu keleba nkye, <<Ki pala nkiya ke de ki nkye Ni ma seleki la. Ngaskye, sobon delili mu na su yapu ni, sobon nsu mu na Ni zo a durinya, de ni pala gaskye. Du nsude ma A beyi gaskye yaa zi mbode mma pala.>>
38 Bilatu minya Yesu nkye, <<Mina ma gaskye?>> de Bilatu pala yomu se e butu te a woze anya Yawudawa jaja gye su nkye, <<Ni san nseminji mu ni lepi daa de deta de na yi taala ba.
Su yi Yesu Taala Ni Muntu
Mat 27.15-31; Mk 15.6-20; Lk 23.13-25
39 Sede ku mani alada, Ni saba shika ku yaa jaru a kwanki ni buki nyenteri. <Kwa bila de ni shika ku seleki ni Yawudawa?>>
40 Se ntani yi kuruwa nkye, <<Yi, mua so nseminji mu ba! shika mu Baraba!>>Baraba kwa ma ozagbo nseminji de ma daa a siki worede su yi tawaye a gomunati ni Roma.