Apocalipse 16

ፆሳ ሀንቆይ ኩምዳ ፁአታ

1 ሄሳፈ ጉየ፥ ፆሳ ኬፈ ላፑን ኪታንቾታኮ፥ "ብድ ፆሳ ሀንቁዋ ላፑን ፁአታፐ ሳአን ጉስተ" ያግድ፥ ኦድያ ዎልቃማ ቃላ ስአስ።

2 ኮይሮ ኪታንቾይ ብድ፥ ባ ፁአን ደኤይሳ ሳአን ጉስን፥ ዶኣ ማላይ ደኤይሳታ ቦላነ እያ ምስልያ ጎይንዳይሳታ ቦላ ኢታነ ዛምያ ማዱን ከይስ።✝16:2 ከሳ 9:10.

3 ናምአን ኪታንቾይ ባ ፁአን ደኤይሳ አባን ጉስን፥ አባይ ሀይቅዳ አሳ ሱ ዳንስ። ቃስ አባን ደእያ መተ ኡባይ ሀይቅስ።

4 ሄን ኪታንቾይ ባ ፁአን ደኤይሳ ሻፋታንነ ፑልቶ ሃታን ጉስን፥ ሃት ሱ ግድዶሶና።✝16:4 ከሳ 7:17. 5 ሄሳፈ ጉየ፥ ሃ ቦላ ማት ደእያ ኪታንቾይ ሀይሳዳ ያግሽን ስአስ።

"ሀእካ በንካ ደእያ ጌሻዉ፥✝16:5 ከሳ 3:14.

ሀይሳዳ ነ ፕርድዳ ግሾ ኔኒ ፅሎ።

6 ኤንቲ ጌሻታ ሱነ ናበታ ሱ ጉስዳ ግሾ፥

ኤንቲ ሱ ኡያና መላ ኦዳሳ።

ኤንቲ ባንታዉ በሲያባ ኤክዶሶና"

ያግስ። 7 ያርሾ በሳፈ፥

"ጎዳዉ፥ ኡባፈ ዎልቃማ ፆሳዉ፥

ነ ፕርዳይ ቱማነ ፅሎ"

ግያ ቃላ ስአስ።

8 ኦይዳን ኪታንቾይ ባ ፁአን ደኤይሳ አዋ ቦላ ጉስን፥ አዋይ ባ ሴላን አሳ ፁጋና መላ አዋስ ዎልቅ እመትስ። 9 አሳይ ዎልቃማ ሴላን ፁገትድ፥ ሄ ቦሻታ ቦላ ማት ደእያ ፆሳ ሱን ባድዶሶና፤ ባንታ ናጋራፐ ስሚድ ፆሳ ቦንችቦኮና።

10 እቻሻን ኪታንቾይ ባ ፁአን ደኤይሳ ዶኣ አራታ ቦላ ጉስን፥ ሄ ዶኣ ካዎተይ ምስ። አሳይ ኡንኣ ግሾ፥ ባንታ እንፃርሳ ሳፆሶና።✝16:10 ከሳ 10:21. 11 ቃስ አሳይ ኡንኣ ግሾነ ማዱን ግሾ፥ ሳሎ ፆሳ ባድዶሶና፤ ባንታ ኦዳ ናጋራፐ ስምቦኮና።

12 ኡሱፑን ኪታንቾይ ባ ፁአን ደኤይሳ ግታ ኤፍራፂሳ ሻፋን ጉስን፥ ዶሎሀ ባጋፈ ያና ካዎታስ ኦገይ ጊጋና መላ ሃይ መልስ።✝16:12 እሳ 11:15. 13 ሄሳፈ ጉየ፥ ሾ ዳንያ ሄ ቱና አያናት ዳውያ ዶናፐ፥ ዶኣ ዶናፐነ ዎርዶ ናብያ ዶናፐ ከይሽን በአስ። 14 ኤንቲ ማላታታ ኦያ ቱና አያናታ። ሄ ሄ ቱና አያናት ኡባፈ ዎልቃማ ፆሳ ግታ ጋላሳን ሀናናዉ ደእያ ኦላስ ሺሻናዉ አላመ ካዎታ ኡባኮ ባና።

15 "ሄኮ፥ ታ ካይሶዳ ያና! አሳ ስንን ካሎቶናዳነ ዬላቶናዳ ባርክድ፥ ባ ማኡዋ ናግያ ኡራይ አንጀትዳይሳ!" ያግስ።✝16:15 ማቶ 24:43.

16 ሄ ቱና አያናት ካዎታ እብራወ ዶናን አርማገዶነ ጌተትያ በሳን ሺሽዶሶና።✝16:16 2 ካዎ 23:29፤ ዛካ 12:11.

17 ላፑን ኪታንቾይ ባ ፁአን ደኤይሳ ጫርኮ ቦላ ጉስን፥ ፆሳ ኬን ደእያ አራታፐ፥ "ፖለትስ" ግያ ዎልቃማ ቃላይ ይስ። 18 ሄሳፈ ዎልአን ዎልአምስ፤ ዳዳይ ቅስ፥ ቢታይ ቃፅስ። አስ ሳአን መቶሳፐ ቢት ሄሳ መላ ቃፆ ቃፅቤና። ሄስ ኡባፈ አዳ ቃፆ።✝16:18 ቆን 8:5፤ 11:13. 19 ግታ ካታማይ ሄ ከይድ ሻከትስ፤ ቢታ ኡባን ደእያ ካታማት ይዶሶና። ፆሳይ ግታ ካታማ ባብሎነ ቆፕድ፥ ባ ኢታ ሀንቆ ዎይነ ኡሻይ ኩምዳ ፁኣ እዉ እሚስ።✝16:19 እሳ 51:17. 20 ዩሾይ አባን ተቀትዳ ቢታት ይዶሶና፤ ደረትካ በንትቦኮና።✝16:20 ቆን 6:14. 21 አሳ ቦላ ኦይታማነ እቻሹ ክሎ ግራመ መላ ዴፅያ ዎልቃማ ሻች ሳሎፐ ቡክስ። ቦሻይ ዳሮ ኢታ ግድያ ግሾ አሳይ ሻቻ ቦሻ ግሾ ፆሳ ባድዶሶና።✝16:21 ከሳ 9:23.