1 ያትን፥ ሳሎን ዳሮ አሳይ፥

"ፆሳይ ጋላተቶ!

አቶተይ፥ ቦንቾይነ ዎልቃይ ኑ ፆሳስ ግዶ።

2 እያ ፕርዳይ ቱማነ ፅሎ።

ሳኣ ቱንስዳ ኢታ ላይምዉ ፆሳይ ፕርድስ።

ፆሳይ ባ አይለታ ሱ ኢፐ አችስ"

ያግሽን ስአስ።✝

3 ሄ አሳይ ዛሪድ ባንታ ቃላ ቁ ኦድ፥

"ፆሳ ጋላት ጋኮ።

ሄ ካታምያ መርናዉ ጩያሸ ዳና"

ያግዶሶና።✝

4 ላታማነ ኦይዱ ጭማትነ ደኦን ደእያ ኦይዱ መተት አራታን ኡትዳ ፆሳስ ጉፋንድ፥

"አምንእ! ፆሳ ጋላት ጋኮ"

ያግድ ጎይንዶሶና።

5 ያትን፥

"ፆሳ አይለት፥

ፆሰ ያይያ ጉነ ግት ኡባይ፥

ኑ ፆሳ ጋላትተ"

ግያ ቃላይ አራታፐ ከይስ።✝

6 ያትን፥ ዳሮ አሳዳ ዎጫምያ፥ ዎልቃማ ሻፋዳ ጉምያ፥ ዳዳዳ ደችያ ግርሳይ፥

"ፆሳ ጋላት ጋኮ፤

ኑ ጎዳይ፥ ኡባፈ ዎልቃማ ፆሳይ ካዎትስ።✝

7 ዶርሳ ያጋኖይ ጋክዳ ግሾነ እያ ገልያራ ጊግዳ ግሾ፥

ኑ ኡፋይቶስ፥ ጋላቶስነ ዶርሳ ቦንቾስ።

8 ገሎስ ጊግዳራ ጶልያነ ጌሽ ግድዳ

ሊኖ ማአና መላ እዉ እመትስ"

ያግሽን ታ ስአስ። (ሊኖ ማኦይ ጌሻታ ፅሎ ኦሶ ሌምሶ።)

9 ሄሳፈ ጉየ፥ ኪታንቾይ ታኮ፥ "ዶርሳ ያጋኖ ፄገትዳይሳት አንጀትዳይሳታ" ጋዳ ፃፋ። ሄ ኪታንቾይ ጉጅድ፥ "ሀይስ ፆሳ ቱማ ቃላ" ያግስ።✝

10 ሄ ዎደ ታ እያ ጎይናናዉ እያ ቶሁዋ ቦላ ኩንዳስ። ሽን እ፥ "ሄሳ ኦፋ! ታኒ የሱሳባ ማርካትያ ነ መላነ ነ እሻታ መላ። ነ ፆሳ ጎይና" ያግስ። ህዛ፥ የሱሳባ ማርካትዳይሳታስ ናበተ አያን ደኤስ።

11 ያትን፥ ሳሎይ ዶየትን፥ ያን ቦ ፓር ደኤይሳ በአስ። ሄ ፓራ ቶግዳይስ አማነትዳይሳነ ቱማንቾ ጌተቴስ። እ ፅሎተን ፕርደስነ ኦለቴስ።✝ 12 እያ አይፈይ ታማ ላጮ ዳኔስ፤ እያ ሁጰን ዳሮ ካላች ደኤስ። እያ ቦላ እ አትሽን፥ ሀር ኦንካ ኤሮና ፃፈትዳ ሱን ደኤስ።✝ 13 እ ሱን ሙከትዳ ማኦ ማእስ፤ እያ ሱንይካ ፆሳ ቃላ። 14 ጶልያነ ጌሽ ግድዳ ሊኖ ማእዳ ሳሎ ኦላንቾት ቦ ፓራታ ቶግድ እያ ጌዶ ካሎሶና። 15 ካዎተታ ቃንፅያ ቃራ ማሻይ እያ ዶናፐ ከዬስ። እ ብራታ ፃምአን አሳ ሃራና። ኡባፈ ዎልቃማ ፆሳ ሀንቆ ዎይነ ኡሻ ጉምእያ በሳ እ የና።✝ 16 እያ ማኡዋ ቦላነ እያ ዎድርያ ቦላ፥ "ካዎታ ካዋነ ጎዳታ ጎዳ" ግያ ሱንይ ፃፈትስ።

17 ሄሳፈ ጉየ፥ እስ ኪታንቾይ አዋ ቦላ ኤቅዳይሳ በአስ። ሄ ኪታንቾይ ሳሎራ ፕራያ ካፎ ኡባስ ባ ቃላ ቁ ኦድ፥ "ሃ ዪተ! ፆሳ ግብራ ማናዉ እስ በሲ ሺቅተ።✝ 18 ይድ ካዎታ አሹዋ፥ ሻላቃታ አሹዋ፥ ዎታዳረታ አሹዋ፥ ፓራታ አሹዋ፥ ፓራታ ቶገይሳታ አሹዋ፥ አሳ ኡባ አሹዋ፥ አይለታ አሹዋ፥ ዎማኖታ አሹዋ፥ ግታታነ ጉታ አሹዋ ሚተ" ያግስ።

19 ዶአይ፥ ፓራ ቶግዳይሳራነ እያ ኦላንቾታራ ኦለታናዉ ሳአ ካዎትነ ኤንታ ኦላንቾት እስ በሲ ሺቅዳሽን በአስ። 20 ሽን ሄ ዶአይነ እያ ሱንን ማላታታ ኦዳ ዎርዶ ናበይ እያራ እስፈ ኦይከትስ። ሄ ማላታታን ዶኣ ማላይ ደኤይሳታነ እያ ምስልያ ጎይነይሳታ እ ባለስ። ዶአይነ ዎርዶ ናበይ ናምአይካ ዲነን ኤፅያ ታማ አባን ፓፃ የገትዶሶና።✝ 21 አትዳይሳት ፓራ ቶግዳይሳ ዶናፐ ከይያ ማሻን ሀይቅዶሶና። ካፎት ኡባይ ኤንታ አሹዋ ምድ ካልዶሶና።