1 ጎዳይ ዎርዶ ምዛነ እፄስ፤

ሽን ልከ ምዛነን ኡፋይቴስ።

2 ኦቶሮይ ያ ዎደ ካዉሻተ ዬስ፤

ሽን አሽከተን ጭንጫተ ዬስ።

3 ፅሎታ ኤንታ ሱረተይ ካለስ፤

ሽን ኢታ አሳታ ኤንታ ጌላተይ ይስስ።

4 ሀንቆ ጋላስ ዱረተ ጎኤና፤

ሽን ፅሎተ ሀይቆፐ አሼስ።

5 ቦረይ ባይና ኡራ ኦግያ ፅሎተይ ሱርሴስ፤

ሽን ኢታ ኡራይ ባ ኢታተን ኩንዴስ።

6 ሱረታ ኤንታ ፅሎተይ አሼስ፤ ሽን አማነቶናይሳታ ኤንታ አሞይ ፅሄ ግድድ ኦይካና።

7 ኢታ አስ ሀይቅያ ዎደ፥ እ ናግያ ኡፋይሳይ እያራ እስፈ ሀይቄስ፤ እ ባ ዎልቃን ጬቀትያባይ ኡባይካ ዬስ።

8 ፅሎይ መቶፐ አቴስ፤ እያ ግሾ ኢታ ቦላ መቶይ ዬስ።

9 ፆሳ ካድዳ አስ ባ ዶናን አሳ ይስስ፤ ሽን ፅሎት ኤራን ከስ ኤኮሶና።

10 ፅሎት ቦንቸትያ ዎደ፥ ካታማይ ኡፋይቴስ፤ ቃስ ኢታት ሀይቅያ ዎደ፥ ሀሹ ጌስ።

11 ፅሎታ አንጁዋ ጋሶን ካታማይ ድጬስ፤ ሽን ኢታ ኡራ ኦድ ካታማ ይስስ።

12 ባ ሾሩዋ ካያ ኡራስ ዎዛን ባዋ፤ ሽን አኬካንቾ ኡራይ ስእ ጌስ።

13 ዝግርያ አስ ፁራ ላሌስ፤ ሽን አማነትያ አስ ፁራ ገንስ።

14 ካለያባይ ይኮ፥ ካዎተይ ኩንዴስ፤ ሽን ዳሮ ዞረይሳት ደእኮ፥ ሳሮይ ደኤስ።

15 ኤረና ኡራስ ዋሰ ግድያ አስ ቱማፐ መቶታና፤ ሄሳፈ ዋሰ ግዶና እፀይስ ሎኦ።

16 ኡሎ ኬሀ ማጫስ ቦንቸታዉሱ፤ ሽን ኢታ አስ ዱረተ ፃላላ ዱረቴስ።

17 ኬሀ አስ ባዉ ሎኦባ ኦስ፤ ሽን ዎዛና ምኖ አስ ባና ቆሄስ።

18 ኢታ አስ ደምያ ሚሸይ ጭሞ፤ ሽን ፅሎተ ዘርያ ኡራይ ቱማ ዎይቶ ጫካና።

19 ፅሎተን ምንድ ደእያ ኡራይ ፓፃ ደአና፤ ሽን ኢታተ ካልያ ኡራይ ሀይቃና።

20 ጎዳይ ኢታ ቆፋይ ደእያ አሳታ እፄስ፤ ሽን ሱረ ሄመተይሳታን ኡፋይቴስ።

21 ኢታ አስ ሴረቶና አተና፤ ሽን ፅሎታ ኮቻይ አታና።

22 ቆፍ ባይና ማላ ሎኦ ማጫ ፑላተይ

ጉዱን ስን አዳ ዎርቃ መላ።

23 ፅሎታ አሙዋስ ፖሎይ ሎኦ ፃላላ፤ ሽን ኢታታ አሙዋስ ፖሎይ ሀንቆ ፃላላ።

24 እስ እስ አሳት ባንታ ሚሸ አሳስ ጮ ኬሆሶና፤ ሽን ኤንታ አቆይ ሃ ዳሬስ። ሀራ አሳት ቃስ ባንታ ሚሻስ ፓላ ኡዘቶሶና፤ ሽን ኤንታ አቆይ ያ ፓጬስ።

25 ኬሀ አስ ዱረታና፤ ሀራታ ማድያ አስ ማደታና።

26 ካ አልእን ባይዛናዉ ምንጅያ ኡራ አሳይ ባዴስ። ሽን ባ ካ አሳይ ኮይያ ዎደ ባይዝያ ኡራ አንጄስ።

27 ሎኦባ ምንድ ኮይያ ኡራይ ኡፋይሳ ደሜስ፤ ሽን ኢታባ ኮይያ ኡራ ኢታባይ ደሜስ።

28 ባ ዱረተ አማነትያ አስ ኩንዳና፤ ሽን ፅሎት ባልጎ ምዳ።

29 ባ ሶ አሳ ቦላ ቡቀ ደንያ ኡራይ ጎኤትያባይ አይብካ ባዋ። ኤያትካ ጭንጫታስ አይለ ግዳና።

30 ፅሎ አስ ደኦ አይፈ አይፍያ ም መላ፤ ሸምፖ አሸይሳት ጭንጫታ።

31 ፅሎት ሳአን ባንታ ኦሶ ጋተ ኤክያባ ግድኮ፥ ኢታትነ ናጋራንቻት ባንታ ኦሱዋስ ኤካና ጋተይ ዋንድ ዳራንዴሻ!