1 ማያ ኡሽ ኤያነ ኦሻንቾ ኦስ፤

ኡሻን ባለትያ አስ ጭንጫ ግዳናዉ ዳንዳኤና።

2 ካዎ ሀንቆይ ጋሞ ጉደ መላ፤

እያ ይሎይያ አስ ባ ሸምፑዋ ቦላ ፕርዴስ።

3 ፓላማፐ ሃከይስ ቦንቾ፤

ሽን ኤያ አስ ኦየታናዉ ኤለሴስ።

4 አዛላ ጎሻንቾይ ዎደ ናግድ ጎየና፤

ካ ጫክያ ዎደ እ ዎሳናዉ ኮዬስ፤

ሽን አይባካ ደመና።

5 አሳ ዎዛና ሀልቾይ ጪሞ ሃ መላ፤

ሽን ዎዛናማ አስ ዱቅድ ከሴስ።

6 ዳሮ አሳት ባንታ ሎኦተ ኦዶሶና፤

ሽን ቱማ አማነትያ አስ ደማናይ ኦኔ?

7 ፅሎ አስ ቦረይ ባይና ደኦ ደኤስ፤

እያ ካልያ እያ ናይት አንጀትዳይሳታ።

8 ካዎይ ፕርዳናዉ ባ አራታን ኡትያ ዎደ፥

ኢታ ኡባ ባ አይፈን ሀርቅድ ከሴስ።

9 "ታ ዎዛናይ ጌሽ፤ ታናን ናጋር ባዋ"

ጋናዉ ዳንዳእያ አስ ዳነሻ?

10 ጎዳይ ዎርዶ ምዛነነ

ግና ግዶና ማካ ሚሸን ጎኤተይሳታ እፄስ።

11 ናእ ጌሽነ ሱረ ግደይስ

እ ኦያ ኦሶን ኤረቴስ።

12 ስእያ ሀይነ ፄልያ አይፈ፥

ጎዳይ መስ።

13 ስኮን ነ ዎደ ዉርስኮ ነ ማንቃና፤

ምናዳ ኦኮ ነ ካ ካላና።

14 ሻምያ አስ፥ "ቆሄስ! ቆሄስ!" ያጌስ፤

ሽን ብዳፐ ጉየ፥ "ገላን ሻማስ" ያግድ ጬቀቴስ።

15 ዎርቀይ ኩምስ፤ አልኦ ሹችካ በንቴስ፤

ሽን ኤር ኩምዳ እንፃርስ ኡባፈ አዳ አሌቆ።

16 ኤሮና አሳስ ዋሰ ገልያ ኡራ ማኡዋ ቃር ኤክተ፤

እማ አሳስ ዋሰ ገልያ ኡራ ማኦ ኦይክተ።

17 ዎርዶን ደምዳ ካ ማልኤስ፤

ሽን አቅድ ፔእሸ ዶናን አጨዳ ሀኔስ።

18 ዞረ ኤካዳ ነ ቆፋ ቃቻ፤

ዞረ ኤኮና ደአሸ ኦላ ቦፓ።

19 ዝግርያ አስ ፁራ ገንና፤

ሄሳ ግሾ ጮ ሃሳያ አሳፐ ሃካ።

20 ባ አዋ ዎይኮ ባ አይዉ ባድያ አሳ፥

ደኦ ፆምፐይ ሳካና ማን ቶአና።

21 ኮይሮራ ኤሶን ሺቅዳ ሻሎይ

ዉርሰን አንጀተና።

22 ነና ቆህዳ ኡራ ቆሀዳ ዛራና ጎፓ፤

ጎዳን አማነታ፤ እ ነና አሻና።

23 ጎዳይ ናምኡ ቆሞ ምዛነ እፄስ፤

ዎርዶ ምዛነይ እያ ኡፋይሰና።

24 አሳይ ባና ኦግያ ጎዳይ ካለስ፤

ያትን፥ አስ ባ ደኦን ባና ኦግያ

ዋትድ አኬካናዉ ዳንዳኢ?

25 ኤሶን፥ "ሀይሳ ታኒ ፆሳስ እማስ" ጉስነ

ጉየፐ ቂሮተ አሳስ ፅሄ።

26 ጭንጫ ካዎይ ጌላታ ሻክድ ኤሬስ፤

እ ኤንታ ቃቶና ሴሬስ።

27 አሳ አያን ጎዳስ ፆምፐ፤

እያ ጋ አሳተ ኡባ ፕልግድ ፄሌስ።

28 ሲቆይነ አማነተ ካዋ ናጎሶና፤

እያ አራታይ ቱማ ፕርዳን ምኔስ።

29 ያላጋታ ቦንቾይ ኤንታ ዎልቃ፤

ጭማታ ቦንቾይ ኤንታ ፑሉን።

30 ምኖ ሴር ኢታተ ሾዴስ፤

ዋይ ኢታ ዎዛና ላሜስ።