1 ህንተኖ፥ እስራኤለ አሳዉ፥ ጎዳይ ኦድያ ቃላ ስእተ! 2 ጎዳይ ሀይሳዳ ያጌስ፦ "ሀራ ካዎተታ ኦግያ ታማሮፕተ። ኤንቲ ሳሎ ቦላ ማላታ በእድ ዳጋምኮካ፥ ህንተ ዳጋሞፕተ። 3 ኤንታ ዎጋይ ሀዳ፤ ኤንቲ ዎራፐ ም ቃንፆሶና፤ ማሰይስ ካልታን ማሴስ። 4 ኤንቲ ብራንነ ዎርቃን አሌቅሶሶና፤ ቃፆናዳ ምስማረን ሽድ ኦይሶና። 5 ኤንታ ኤቃት ሌሄ ግዶን ካፎ ዳጋንናዉ ኤስያ ማላ መላ። ኤንቲ ኦደቶኮና፤ ኤንቲ ሄመታናዉ ዳንዳኦና ግሾ አሳይ ኤንታ ቶኮሶና። ኤንታስ ኩም ያዮፍተ። ኤንቲ ቆሀናዉካ ማዳናዉካ ዳንዳኦና ግሾ ኤንታዉ ያዮፍተ" ያጌስ ጎዳይ።

6 አቤት ጎዳዉ፥ ነ ማል ኦንካ ባዋ። ኔኒ ግታ፤ ነ ሱንይካ ግታነ ዎልቃማ። 7 አቤት ካዎተታ ካዋዉ፥ ነና ቦንቾናይ ኦኔ? ጭንጫ አሳ ግዶንነ ኤንታ ካዎተ ግዶን ነ መል ባይና ግሾ ነዉ ቦንቾ በሴስ። 8 ኤንቲ ኤያነ ኤር ይዳይሳታ፤ ኤንቲ ምፈ ማስዳ፥ ፓና ኤቃታፐ አይ ታማሮና? 9 ሄ ኤቃት ታርሰሳ ብራንነ አፌዛ ዎርቃን አሌቀትዶሶና። ኤንቲ ኡባይ ኩሸ ሂላንቾታን ኦሰትዳ ዎይነነ ካሎሰ ዳንያ ማኡዋን ካመትዶሶና። 10 ሽን ጎዳይ ቱማ ፆሳ፤ እ ደኦ ፆሳነ መርና ካዋ። እያ ሀንቁዋን ቢታይ ቃፄስ፤ ካዎተት እያ ይሉዋ ዳንዳኦኮና።

11 "ሀይሳቲ ሳሎነ ሳአ መቦና ፆሳት ሳአፐነ ሳሎፐ ያና" ያጋዳ ኔኒ ኤንታዉ ኦዳ።

12 ባ ዎልቃን ሳኣ መዳይ፥

ባ ጭንጫተን ሳኣ ኤስዳይ፥

ባ አኬካን ሳሎታ ምጭዳይ፥ ፆሳ።

13 እ፥ ባ ኮሽንቻ ስስያ ዎደ፥

ሳሎን ደእያ ሃት ጉሞሶና።

እ ሻራ ሳአ ጋፃፐ ፑደ ደንስ፤

ዎልአን እራራ የዴስ፤

ጫርኩዋ ባ ምንጃ ኬፈ ከሴስ።

14 አስ ኡባይ ኤራ ይድ ኤይስ፤

ዎርቃ ሼሽያ ኡባይ ባ ኤቃን ዬላትስ።

ኤንቲ መዳ ኤቃት ዎርዶ፤

ኤንታዉ ሸምፖይ ባዋ።

15 ኤንቲ ፓናባነ ሀዳ፤

ኤንቲ ሴረትያ ዎደ ያና።

16 ሽን እ ኡባ መዳ ግሾ፥

ያይቆባ ሳማ ግድዳ ፆሳይ

ሄሳ መላ ግደና፤

እስራኤለይ፥ እ ባዉ ዶርዳ ካዎተ፤

እያ ሱንይ ኡባፈ ዎልቃማ ጎዳ።

17 ህንተኖ፥ ሞርከይ ተቅዳይሳቶ፥ ቢታፈ ከያናዉ ህንተዉ ደእያባ ሺሽተ። 18 "ታኒ፥ ሀ ዎድያን፥ ሀ ቢታን ደእያ አሳ ከሳዳ ያምባራና። ኤንታ ቆሆይ ኤረታና ጋካናዉ ኤንታ ቦላ ኢታባ ኤሀና" ያጌስ ጎዳይ።

19 ታ ማዱንፃስ! ታ ማዱንይ ፓፀና። ሽን ታኒ፥ "ሀይስ ታ ሀርገ፤ ታ ዳንዳአናዉ በሴስ" ያጋስ።

20 ታ ዱንካነይ ላለትስ፤ እያ ዎዶሮ ኡባይ ዱፀረትስ። ታ ናይት ኡባይ ታፐ ሻከትድ ብዶሶና፤ ኤንቲ ባዋ። ታ ዱንካንያ ዛሪድ ቶካናዉ ዎይኮ ታ ማጋራጁዋ ካቃናዉ እስ አስካ አትቤና።

21 ሄንንቾት ኤይዶሶና፤ ኤንቲ ጎዳ ኦይችቦኮና። ሄሳ ግሾ፥ ኤንታዉ እንጀቶና እፅስ፤ ኤንታ ዉደ ኡባይ ላለትስ። 22 ኦራ ኦድ ይስ፤ ስእተ። ፑደሀ ባጋን ደእያ ካዎተን ግታ ድርጎይ መትስ። እያ ኦላንቾት ይድ፥ ይሁዳ ካታማታ ባይሳነ ዎርካናት ጉፕያ በሲ ከሳና።

23 አቤት ጎዳዉ፥ አሳ ደኦይ እያዉ ቡዞ ግዶናይሳነ ባ ኦግያ ሱርሳናዉ እያ ሸነ ግዶናይሳ ታ ኤራይስ። 24 አቤት ጎዳዉ፥ ታና ሴራ፤ ሽን ልከራ ግዶ። ታ ዮና መላ ነ ሀንቁዋን ታ ቦላ ዮፓ። 25 ነ ሸንያ፥ ነና ኤሮና ካዎተታ ቦላነ ነ ሱን ፄጎና አሳ ቦላ ጉሳ። ኤንቲ ያይቆባ አሳ ምዶሶና፤ ኤንታ ምትዶሶና፤ ኤንታ ቢታ ይስዶሶና።