1 አስ ባ ዎዛናን ሀልቼስ፤

ሽን ልከ ዛሮይ ጎዳፐ በንቴስ።

2 አስ ኦያ ኦሶ ኡባይ እያዉ ልከ ዳኔስ፤

ሽን ጎዳይ ደንዶ ቆፋ በኤስ።

3 ነ ኦሶ ኡባ ጎዳስ ሀዳራ እማ፤

ኔኒ ቆፕዳባይ ፖለታና።

4 ጎዳይ ኡባባይ ቆፕዳይሳ ባና መላ ኦስ፤

ሀንኮካ፥ ማካላንቾታ ዉርሰይ ዮ።

5 ጎዳይ ኦቶራንቾታ እፄስ፤

ኤንቲ ሴረቶና አቶኮና።

6 ሲቆንነ አማነተን ናጋር አቶ ጌተቴስ፤

ጎዳስ ያይድ አስ ኢታባፐ አቴስ።

7 አሳ ሄመ ጎዳ ኡፋይስያባ ግድኮ፥

እ ባ ሞርከታራ ሳሮ ዳናዳ ኦስ።

8 ፅሎተን በንትያ ጉባይ፥

ዎርዶን ደምያ ዳሮ ዎፐ ሎኦ።

9 አስ ዎዛናን ባ ኦናባ ሀልቼስ፤

ሽን ሀልቾይ ጎዳ ማደን ፖለቴስ።

10 ካዎይ ፆሳፈ ኤክዳ ማታን ፕርዴስ፤

እያ እንፃርሳይ ሱረ ፕርዴስ።

11 ግና ምዛነትነ ማካ ሚሸት ጎዳባ፤

ባይዝያባ ኡባን ገነይ ዶና መላ ጎዳይ ኮዬስ።

12 ካዎት ኢታ ኦሶ እፆሶና፤

ኤንታ አራታይ ፅሎተን ኤቄስ።

13 ካዎት ፅሎ እንፃርሳን ኡፋይቶሶና፤

ቱማ ሃሳያ ኡራ ዶሶሶና።

14 ካዋ ሀንቆይ ሀይቆ ኪታንቾ መላ፤

ሽን ጭንጫ አስ ሀንቁዋ እርፅሴስ።

15 ካዋ ሶምኦይ ፖእኮ ደኦይ ደኤስ፤

እያ ሎኦተይ እራ ኤህያ ሻራ መላ።

16 ጭንጫተ ደሞይ ዎርቃ ደሞፐ አስ፤

አኬካ ደሞይ ብራ ደሞፐ ሎኦ።

17 ሱረታ ኦገይ ኢታፐ ሃኮ፤

ባ ሄመ ናግያ ኡራይ ባ ሸምፑዋ ናጌስ።

18 ኦቶሮይ ዮ ካለስ፤

ጬቀተ ኩንደ ኤሄስ።

19 ኦቶራንቾታራ ድኦ ሻከታናፐ፥

አሽከ ግድድ ማንቅድ ደኤይስ ሎኦ።

20 ዞረ ስእያ ኡራስ እ ኦያባ ኡባይ እንጀታና፤

ጎዳን አማነትያ ኡራይ አንጀታና።

21 ባ ቆፋን ጭንጫ ግድዳ አስ አኬካንቾ ጌተቴስ፤

ሎኦ ቃል ኤራተ ጉጄስ።

22 ጭንጫ አሳስ ኤራተ ደኦ ፑልቶ መላ፤

ሽን ኤያታ ሴሮይ ጮ ዎደ ዉርሴስ።

23 ጭንጫ አስ ኦደታናፐ ስን ቆፔስ፤

እያ መተርሻይ ኤራተ ጉጄስ።

24 ሎኦ ቃል ኤሳ እልሎዳ ማልኤስ፤

ሸምፖስ ማልኦ፤ መቀስ ፓፆ ግዴስ።

25 አሳስ ሱረ ዳንያ ኦገይ ደኤስ፤

ሽን ዉርሰን ሀይቆኮ ጋስ።

26 አስ ምንድ ኦና መላ ኦይ ካ አሞ፤

ኮሽ ምንድ ኦና መላ ደንስ።

27 ካዉሻ አስ ኢታባ ሀልቼስ፤

እያ ኦዳይ ታማዳ ፁጌስ።

28 ዎበ አስ ኦሽ ደንስ፤

ዝግርስ አማነትያ ላገታ ሻኬስ።

29 ገነ አስ ባ ሾሩዋ ጭሜስ፤

ሎኦ ግዶና ኦገ ካለስ።

30 ባ አይፈን ቃምኦትያ አስ ጌላባ ቆፔስ፤

ባ መተርሻ ሳፅድ ማንድያ አስ ኢታባ ኦስ።

31 ፑሉምዳ ሁጰይ ቦንቾ ካላቻ፤

ሄስካ በንተይ ፅሎ ደኦ ደእና።

32 ዎልቃማ አስ ግዳናፐ ዳንዳአ አስ ግዶይ ሎኦ፥

ዳሮ ካታማታ ኦልድ ኦይካናፐ ባና ሃሮይ አስ።

33 አስ ሳማ የጌስ፤

ሽን ዉርሰ ዛሮይ ጎዳፐ በንቴስ።