1 ኢታት ኦንካ የደና ባቃቶሶና፤

ሽን ፅሎት ጋሞ መላ ያዮና ደኦሶና።

2 እስ ካዎተይ ማካልኮ፥ ሃረይሳት ዳሮሶና፤

ሽን ካለይስ ጭንጫነ አኬካንቾ ግድኮ፥

ሳሮተነ ዎፕ ደኤስ።

3 ማንቆታ ኡንኤያ ካዎይ

ካ ይስያ ዎልቃማ እራ መላ።

4 ህገ ቦንቾና አስ ኢታ አሳ ሳቤስ፤

ሽን ህገ ቦንችያ አስ ኢታ አሳ እፄስ።

5 ኢታ አሳታስ ሱረ ፕርድ ገለና፤

ሽን ጎዳ ጎይንያ አስ ኡባ አኬከስ።

6 ዱረ ግድድ ጭምያ አስ ግዳናፐ፥

ማንቆ ግድድ ሱረ ግደይስ ሎኦ።

7 ህገ ናግያ ናአይ አኬካ ናአ፤

ሽን ፓና አሳራ ሄመተይ ባ አዋ ዬላዬስ።

8 ምሸ የሎን ታልኤይነ አሰ ቦንቅድ ዱረትያ አስ

ሄ አቁዋ ማንቆታስ ኬህያ አሳስ ሺሼስ።

9 ህገ ስአናፐ ግድ ባ ሀይ ቱጭያ፥

ኡራ ዎሳይ ጎዳ ስንን እፀትዳባ።

10 ሱረታ ኢታ ኦገን ካለያ ኡራይ

ባ ቦክዳ ኦላን ኩንዳና፤

ሽን ጌሻት ሎኦባ ላታና።

11 ዱረ አስ ባና ጭንጫ ግድ ቆፔስ፤

ሽን አኬክ ደእያ ማንቆይ እያ ፓጬስ።

12 ፅሎት ፆንያ ዎደ አሳ ኡባይ ኡፋይቴስ፤

ሽን ኢታት ማታ ኦይክያ ዎደ አሳይ ቆሰቴስ።

13 ባ ናጋራ ገንያ አስ አጨና፤

ሽን ፓፀይነ ናጋራ አገይ ማሮታ ኤካና።

14 ጎዳ ኡባ ዎደ ያይያ አስ አንጀትዳይሳ፤

ሽን ባ ዎዛና ምንያ አስ መቶን ገላና።

15 ማንቆ አሳ ሃርያ ኢታ ሀላቃይ፥

ጉድያ ጋሞነ ኮሻትዳ ባባን መላ።

16 አኬክ ባይና ካዎይ ባ ደርያ ቆሄስ፤

ሽን አሰ ቆሆና ሀላቅ ዳሮ ላይ ሃራና።

17 አሰ ዎያ አስ ሀይቃና ጋካናዉ ባቃትሸ ደኤስ፤

እያ ኦንካ ማደና።

18 ቦረይ ባይና ሄመትያ አስ ቆሄተና፤

ሽን ጌላ አስ አኬኮና ኩንዳና።

19 ምንድ ኦያ አስ ካ ካሌስ፤

ሽን ፓና አሞ ካልያ አስ ማንቆተ ላታና።

20 አማነትያ ኡራይ ዳሮ አንጀታና፤

ሽን ዱረታናዉ ዎፅያ አስ መቶ በአና።

21 ሶምኦ በእድ ፕርዶይ ሎኦ ግደና፤

ሽን አስ ባሶ ኡይ ግሾ ግድ ቆሄስ።

22 ያረ አስ ዱረታናዉ ባቀቴስ፤

ማንቆተ አኬኮና ኦይካናይሳ ኤረና።

23 አሰ ጮ ሳቢያ አሳፐ

ሀንቀትያ አስ ጉየፐ ጋላተቴስ።

24 ባ አዋነ ባ አይዉ ካይሶትድ፥ "ናጋራ ኦብከ"

ግያ አስነ ደምዳባ ይስያ አስ እስኖ።

25 ኡዘ አስ ኦሽ ደንስ፤

ሽን ጎዳን አማነትያ አስ ካሌስ።

26 ባናን አማነትያ አስ ኤያ፤

ሽን ጭንጫተን ሄመተያ አስ ሳሮ ደኤስ።

27 ማንቆስ እምያ አስ መቶተና፤

ሽን ኤንታ በአናፐ ግድ ቅልምኤይ ባደታና።

28 ኢታ አሳት ሹመትያ ዎደ አሳይ ቆሰቴስ፤

ሽን ኤንቲ ይያ ዎደ ፅሎት ዳሮሶና።