Gênesis 25

अब्राहम को अन्य कुलहोन

1 तब अब्राहम ने एक लुगय से भ्यैइ ली जेको नाम कतूरा थो. 2 ओकासे जिम्रान, योक्षान, मदना, मिद्यान, यिशबाक, अरु शुह पैदा हुया. 3 योक्षान से शेबा अरु ददान पैदा हुया; अरु ददान का कुल मे अश्शुरी, लतूशी, अरु लुम्मी इन्सानहोन हुया. 4 मिद्यान को बेटो एपा, एपेर, हनोक, अबीदा, अरु एल्दा हुया, ये सब कतूरा कि सन्तान हुया. 5 इसहाक खे तो अब्राहम ने अपनो सब कुछ दियो. 6 पर अपनी र खेलिहोन*25:6 र खेलिहोन हाजित अरु कतुरा का बेटा खे, खेछ-कुछ दि खे अपना जीते जी अपना बेटा इसहाक का पास से पूर्व देश मे भेजी दियो.

अब्राहम को मरनो

7 अब्राहम की पुरी उमर एक सौ पचहत्तर साल की हुय. 8 अब्राहम को दीर्घायु होना का कारण अर्थातपुरा बुडापा की अवस्था मे जान छुटी गयो; अरु उ अपना इन्सानहोन मे जै मिल्यो. 9 ओको बेटो इसहाक अरु इश्माएल ने, हित्ती सोहर को बेटो एप्रोन की मम्रे को पुर्व दिशा की नजीकआली जमीन मे, जो मकपेलावाली की गुफा थी, ओमे ओ खे मट्टी दी. 10 अर्थात् जो जमीन अब्राहम ने हित्तीदुन्या से मोल ली थी; ओमे अब्राहम, अरु ओकी लुगय सारा, दोय खे मट्टी दि गय.*25:10 उत्पती 23:26 11 अब्राहम का मरना का बाद परमेश्वर ने ओको बेटो इसहाक खे जो कि लहैरोइ नामको कुव्वा का पास र्‍हेतो थो, आशिर्वाद दियो.

इश्माएल को कुल

12 अब्राहम को बेटो इश्माएल जो सारा कि मिस्री दासी हाजिरा से पैदा हुयो थो, ओको यो कुल हइ. 13 इश्माएल का बेटाहोन खे नाम अरु कुल यो हइ; अर्थात इश्माएल को बडो बेटो नबायोत, फिर केदार, अदबेल, मिबसाम, 14 मिश्मा, दुमा, मुस्सा, 15 हदद, तेमा, यतूर, नापीश, अरु केदमा. 16 इश्माएल को बेटो ये ही हुया, अरु इन्ही का नामहोन का अनुसार इनका गावहोन, अरु छावनियहोन का नाम भी पड्या; अरु ये ही बारह अपना अपना कुल का प्रधान हुया. 17 इश्माएल की पुरो एक सौ सैतीस साल को हुयो तब ओकी जान छुटी गयो, अरु अपना कुल मे जै मिल्यो. 18 अरु ओको कुल हवीला से शूर तक, जो मिस्र देश का पुर्व अश्शूर का रस्ता मे हइ, बसी गयो; अरु उनको भाग उनका सब भैइ बन का सामने पड्यो.

याकुब अरु एसाव को जन्म

19 अब्राहम को बेटो इसहाक को कुल यो हइ; अब्राहम से इसहाक पैदा हुया. 20 अरु इसहाक ने चालीस साल को हुय खे रिबका खे, जो पद्दनराम का र्‍हेनआला, अरामी बतूएल की बेटी, अरु अरामी कुल को लाबान की भैइन थी, भ्यय ली. 21 इसहाक की बेटी तो बाँज थी, येकालिये ओने ओका निमित्त यहोवा से बिनती सुनी, यो प्रकार ओकी लुगय रिबका पेटसे हुय. 22 पोर्या ओका पेट मे आपस मे लिपटी खे एक दुसरा खे मारन लग्या, तब ओने बोल्यो, "मरी जो असी दशा र्‍हेये ते मी कशी जिन्दी र्‍हियु?" अरु वा परमेश्वर की इच्छा खे पुछन गय. 23 तब यहोवा ने ओकासे बोल्यो, "तरा पेट मे दो जातहोन हइ, अरु तरी कोक से निकलते ही दो राज्य का इन्सान अलग अलग हुये, अरु एक राज्य का इन्सान दुसरा से जादा शक्तीशाली हुये अरु बडो बेटो छोटा अघीन हुये."*25:23 रोम 9:12 24 जब ओको बेटो पैदा होन को टेम आयो, तब का प्रगट हुयो, कि ओका गर्भ मे जुडवा बच्चा हइ. 25 पहलो जो पैदा हुयो उ लाल निकल्यो, अरु ओको पुरो आंग कम्बल का जसो रोममय थो; येकालिये ओखो नाम एसाव रख्यो गयो. 26 पिछे ओको भैइ अपना हात से एसाव की ऐडी पकडी हुये पैदा हुयो; अरु ओको नाम याकुब*25:26 याकुब कपट से दुसरो को हटा खे अधिकार जमानेवाला रख्यो गयो, जब रिबका ने उन खे जन्म दियो तब तक इसहाक साठ साल को थो.

एसाव को जन्म अधिकार बेचनो

27 फिर वे बच्चा बडन लग्गा अरु एसाव तो वनवासी हुय खे चतुर शिकार खेलनआलो हुय गयो, पर याकुब सीधो इन्सान थो, अरु झोपडीहोन मे र्हेया करतो थो. 28 इसहाक शिकार को मास खाया करतो थो, येकालिये उ ओका से प्रेम रकतो थो; पर रिबका याकुब से प्रेम रकती थी. 29 एक दिन याकुब खान का लिये कुछ दाल पकै र्हो थो; अरु एसाव जंगल से थक्यो हुयो आयो. 30 तब एसाव ने याकुब से बोल्यो, "उ जो लाल चिज हइ, उय लाल चिज मेखे कुछ खला, क्युकि मि थक्यो हइ" येका लिये ओको नाम एदोम भी पड्यो. 31 याकुब ने बोल्यो, "अपनो पहलौठा को अधिकार आज मरा हाथ बेची दे." 32 एसाव ने बोल्य, "देख मि तो अभी मरना पर हइ येकालिये बडोहोन को अधिकार से मरो का लाभ हुये?" 33 याकुब ने बोल्यो, "मरासे अभी कसम खा," आखरी ओने ओकासे कसम खैइ, अरु अपना बडोहोन को अधिकार याकुब का हाथ बेची डाल्यो. *25:33 इब्रा 12:16 34 येका पर याकुब ने एसाव खे रोटी अरु बनी हुय मसूर की दाल दी; अरु ओने खायो पियो, तब उठी खे चली गयो, यो प्रकार एसाव ने अपना पहलौठे को अधिकार तुच्छ जान्यो.