1 यहोवा को यो वचन मरा पास आयो. 2 "हे इन्सान का बच्चा, यरुशलेम खे ओका सब घृणित काम बतय दे," 3 अरु उनका से बोल, हे यरुशलेम, प्रभु यहोवा मरा से यो बोलस हइ: तुम्हारा पुरखा अरु तुमारो जन्म कनानिहोन का देश मे हुयो हइ; तुम्हारो बाप एक एमोरी अरु तुम्हारी माय एक हित्ती होती. 4 तुम्हारा जन्म का टेम नी ते तुम्हारी नाडी काटी गइ, अरु नी ही तुमखे पाणी से धोलायो गयो, नी ते तुमखे नमक से रगड्यो गयो थो, अरु नी ही तुमखे कपडा मे लपट्यो गयो थो. 5 तुम्हारा लिये इनमे से कोइ काम करन का लिये कोइ दया नी करी, क्युकी जनम का दिन से ही तोखे तुच्छ समझी गया. बल्की तोखे बाहेर खुला मे फेकी दियो गयो क्युकी जनम का दिन से ही तोखे तुच्छ समझी गया. 6 जब मी तरा पास से निकल्यो, अरु तुमखे अपना खुन मे लोडाते हुये देख्यो, अब मेने तरा से बोल्यो, हे लहु मी लोडाती हुइ जिन्दी रि; हा, तराह से ही मेने बोल्यो, "जिन्दी रेह!" 7 फिर मेने तुमखे खेत का झाड का जसो बडायो, अरु तु बढते बडी हुइ गइ अरु बहोत ही सुन्दर हुइ गइ; अरु जवान हुइ गइ. अरु तरा बाल लंबा हुइ गया, फिर भी तरा आंग पर कोइ कपडा नी था. 8 "मी फिर तरा पास से जैइ रो थो, अरु तोखे देख्यो, की तु प्रेम करन का लायक हुइ गइ थी, येकालिये मेने अपनो कपडो तरा आंग मे झाकी दियो; अरु कसम खइ खे तरा से वचन बाध्यो, अरु तु मरी हुइ गइ, प्रभु यहोवा की या वाणी हइ." 9 तब मेने तोखे पाणी से आंग धोलाय खे तरा पर लग्यो खुन खे धोयो अरु तरा आंग पर तेल लगायो. 10 फिर मे ने तोखे बुन्यो हुया कपडा पेनाया अरु अच्छा चमडा का जुता पेराया; अरु तोखे सुन्दे रेशम को कपडो ओढायो. 11 तब मेने तरो सिंगार कर्यो, अरु तरा हाथ मे चुडीहोन अरु गल्ला मे हार पेरायो. 12 फिर मे ने तरा नाक मे नत्थ अरु तरा कानहोन मे कानका पेराया, अरु तरा माथा पर सुंदर मुकुट धर्यो. 13 तरा गहेना सोन्ना चांदी का अरु तरा कपडा सुती, रेशम अरु बुन्या कपडा का बन्या; अरु तु मैदा, मोहुरुस अरु तेल मे बनायो खानो खाती थी; अरु तु बहुत सुंदर हुइ गइ अरु रानी बनन का योग्य हुइ गइ. 14 अरु तरी सुन्दरता का कारण तु हर जात जात मे प्रसिध्द हुइ गइ, मेने तोखे जो शोभा दि हइ, ओने तरी सुन्दरता खे परिपूर्ण करी दियो, प्रभु यहोवा को यो वचन हइ. 15 परंतु तोने अपनी सुन्दरता पर भरोसो करीखे अपनी प्रसिध्दि को उपयोग एक वेश्या बनना मे कर्यो, जो भी तरा पास से गुजर्यो, तुमने ओका सात कुकर्म कर्यो, अरु तुम्हारी सुन्दरता ने ओखे मोही लियो. 16 तोने अपना कपडा लिखे रंग-बिरंगी उँच्ची जगा बनइ ली हइ, अरु उनका पर व्यभिचार कर्यो, असो कुकर्म कर्यो जो नी कभी हुयो अरु नी हुये. 17 तोने मरा दिया हुया वे सुंदर गहनाहोन खे भी लिया, जो सोन्ना अरु चांदी से बन्या था, अरु तोने अपना लिये अदमीहोन की मुर्तिहोन बनइ ली अरु वे मुर्तिहोन का साथ कुकर्म करन लगी. 18 अरु अपना हात से बुन्या हुया कपडा लिखे उनखे पेराया, अरु मरो तेल अरु मरो धुप उनका सामने चढायो. 19 जो खानो मेने तोखे दियो थो, अर्थात मैदो, तेल, अरु मोहरुस मी तोखे खलातो थो, वे सब तोने उनका सामने एक सुगंधित धुप का रुप मे चढाया, प्रभु यहोवा को यो वचन हइ कि असो ही हुयो. 20 फिर तोने अपना बेटा-बेटीहोन लिखे जिनखे तोने मरा लिये जन्म दियो, वे मुर्तिहोन का सामने उनकी बली चढइ. का तरा ये व्यभिचार असी छोटी बात थी? 21 तोने मरा बच्चाहोन खे ये मुर्तिहोन का सामने बली चडय दि. 22 तोने अपना सब घृणित कामहोन करना मे अरु व्यभिचार करना मे अपना बचपन का दिन खे कभी याद नी कर्यो, जब की तु बीना कपडा की खुन मे लोडाती थी.

23 "तरी वे सब बुराइ का पिछे का हुयो? हाय तरा पर हाय! प्रभु यहोवा को यो वचन हइ." 24 तोने अपना लिये एक गुम्मट बनय लियो, अरु हर एक खुली जगा मे एक उच्ची पुजा कि जगा बनय ली; 25 हर एक गल्ली का कोना पर भी तोने अपनो उच्ची जगा बनयखे अपनी सुन्दरता घृणित करी दी, अरु हर एक यात्री खे बुलयखे व्यभिचार करती थी. यो प्रकार तु बडी व्यभीचरनी बनी गइ. 26 तोने अपना पडोसी मिस्री दुन्याहोन से भी व्यभीचार कर्यो अरु मखे गुस्सा दिलान का लिये अपनो व्यभिचार बडाती गइ. 27 यो कारण मेने अपनो हाथ तरा विरुध्द बडैखे, तरो रोज को खानो कम करी दियो, अरु तरा सात की पलिश्ती बइहोन जो तरा महापाप का चाल से लाजस हइ, उनकी इच्छा पर मे ने तोखे छोडी दी हइ. 28 फिर भी तरो मन नी भर्यो, येकालिये तोने अश्शूरी दुनियाहोन से भी व्यभिचार कर्यो, अरु उनका साथ व्यभिचार करना पर भी तरो मन नी भर्यो. 29 फिर तु लेन देन का देश मे व्यभिचार करते कसदीहोन का देश तक पहुँची, अरु वहा भी तरो मन नी भर्यो. 30 प्रभु यहोवा को यो वचन हइ, कि तरो दिल कसो चंचल हइ की तु यो काम करस हइ, जो बेशरम वेश्या को ही काम हइ. 31 जब तोने हर गल्ली का कोना पर अपनो घर बनास हइ अरु हर चौक मे एक उच्ची जगह बनैइ हइ, का येमे तु वेश्या का जसी नी रुखी? क्योकि तु असी कमइ पर हस्स हइ. 32 तु व्यभिचारी करन वाली लुगेन हुये! तु अपना अदमी का बदला दुसरा अदमीहोन खे ग्रहण करस हइ. 33 सब वेश्याहोन खे तो पैसा मिलस हइ, पर तोने अपना सब दोस्तहोन खे खुद पैसा दिखे, अरु उनखे लालच बतैखे बुलाया हइ कि वे चारी तरफ से अइखे तरा से व्यभिचार कर्ये. 34 यो प्रकार तरो व्यभिचार अन्य वेश्याहोन से उलटो हइ. तरा पिच्छे कोइ व्यभिचार नी चले, अरु कोइ से पैसा नी लेवे, पर तु ही उनखे पैसा देस हइ, यो ही कारण तु अलग ठहरी.

35 "यो कारण हे वेश्या यहोवा को वचन सुन." 36 प्रभु यहोवा यो बोलस हइ, तोने जो व्यभिचार मे अति निर्लज्ज हुइके, अपनी देह अपना दोस्तहोन खे बताये, अरु अपनी मुर्तिहोन से घृणित काम कर्यो, अरु अपना बच्चाहोन को खुन बहायो अरु उनकी बली चढैइ हइ. 37 यो कारण देख मी तरा सब दोस्तहोन खे जो तरा प्रेमी हइ. अरु जेत्ता से तोने प्रेम कर्यो, अरु जेत्ता से तोने बुरास रख्यो, वे सब खे चारी तरफ से तरा विरुध्द जमा करीखे उनके तरो आग बिना कपडा करीके बातयु, अरु वे तरो तन देखे. 38 तब मी तोखे असो दंण्ड दियु, जो व्यभिचारिणिहोन अरु खुन बहानवाली लुगेनहोन के दियो जास; अरु क्रोध अरु जलन का सात तरो खुन बोहायु. 39 यो प्रकार मी तोखे उनका वश मे करी दियु, अरु वे तरा गुम्मटहोन के झाकी दिये, अरु तेरे उच्ची जगहहोन खे नष्ट करी दिये. वे तरा कपडा जबर जसती उतारी अरु तरा अच्छा गहेनाहोन लुटी लिये अरु तोखे बिना कपडा की छोडी दिये. 40 तब तरा विरुध्द एक सभा बुलय खे वे तोखे पत्थर से मार्ये, अरु अपनी तलवारहोन से तरा आरपार छेदिये. 41 तब वे अंगार लगय खे तरा घरहोन खे जलय दिये, अरु तोखे भोत सी बइहोन का सामने दंण्ड दिये, अरु मी तरो व्यभिचार बंद कऱ्यु अरु तु फिर पराया इन्सानहोन के व्यभिचार का लिये पैआ नी दिये. 42 जब मी तरा पर पुरी जलजलाहट प्रकट करी चुक्यु, तब तरा पर मरी गुस्सा शांत हुय जाये,अरु फिर नि रिसियायु. 43 तो ने अपना बचपन का दिन याद नी रख्या, या सब बातहोन का वजेसे मेके चिडायो, यो कारन मी तरो चालचलन तरा माथा पर डाल्यु, अरु तु अपना सब पिछे का बेकार कामहोन से अरु जादा महापाप नी करे, प्रभु यहोवा की वाणी हइ.

44 देख सब कयनात बोलन वाला तरा बारे मे या कहावत बोले, जसी माय वसी बेटी. 45 तरी माय जो अपना अदमी अरु बच्चाहोन से घृणा करती थी, तु भी ठीक ओकी बेटी ठहरी; अरु तरी बहिन जो अपना अपना अदमी अरु बच्चाहोन से घृणा करती थी, तु भी ठिक उनकी बहीन निकली. तरी माय हित्तीन अरु बाप एमोरी था. 46 तरी बडी बहिन शोमरोन हइ, जो अपनी बेटीहोन का साथ उत्तर दिशा कि तरप र्हेस हइ, अरु तरी छोटी बहिन, जो तरी दक्षिन दिशा कि तरफ र्हेस हइ वा बेटिहोन समेत सदोम नगर मे हइ. 47 तु उनका जसी चाल नी चली, अरु नी उनका से घृणित कामहोन ही से सन्तुष्ट हुये, या तो भोत छोटी बात ठहरी, पन तरो सब चालचलन उन से भी जादा बिगडी गयो. 48 प्रभु यहोवा की या वाणी हइ, मरी जिवन की कसम, तरी बहन सदोम ने अपनी बेटिहोन का सात अरू तरी बेटीहोन का जसो काम नी कऱ्यो. 49 देख तरी बहिन सदोम को अर्धम यो थो, कि वा अपनी बेटिहोन सहित घमण्ड करती, पेट भरी खे खाती अरु सुख चैन से र्हेती थी; गरिब अरु जरुरतमंद की मद्दत नी करती थी. 50 अत: वा गर्व करीके मरा सामने बेकार काम करन लगी, अरु यो देखीके मेने उनके दुर करी दियो. 51 फिर शोमरोन ने तरा पापहोन का आधो भी पाप नी कर्या, तोने तो ओकासे बडी खे घृणित कामहोन कर्या, अरु अपना घोर घृणित कामहोन का वजेसे तरी तुलना मे तरी बहीन निर्दोश ठहरी हइ. 52 येकालिये तो ने अपनी बहिनहोन को न्याय कर्यो, यो कारण लज्जित हुये, क्योकि तो ने उनका से बडीखे घृणित पाप कर्या हइ; यो कारण वे तराह से कम दोषी ठहर्ये येकालिये तु या बात से सरम कर अरु सरमाती रे, क्योकि तो ने अपनी बहिनहोन खे कम दोषी ठहरइ हइ.

53 "जब मी उनके यानिकि बेटिहोन का सात सदोम अरु शोमरोन के गुलामी से वापस लायु, तब उनका बिच ही तरा बन्दी के भी वापस लायु." 54 जिस से तरो अपमान हुय जाये, अरु अपना सब कामहोन खे देखी खे सरमाये, क्योकि तु उनकी शान्ति हि की कारण हुइ हइ. 55 तरी बहिनहोन सदोम अरु शोमरोन अपनी अपनी बइहोन का साथ अपनी दशा मे फिर पोचे, अरु तु भी अपनी बेटिहोन का साथ अपनी पहली दशा मे फिर अय जाये. 56 जब तक तरी बुरैइ प्रकट नी हुइ थी, अर्थात जो टेम तक तु आसपास का दुनियाहोन का साथ अरामी अरु पलिश्ती बइहोन की जो अब चारी तरफ से तोखे तुच्छ जानस हइ, अरु नामधराइ करती थी. 57 वे अपना घमण्ड का दिनहोन मे तो अपनी बहिन सदोम को नाम भी नी लेती थी. 58 परन्तु अब तोखे अपना बडापाप अरु घृणित कामहोन को भार खूद खे ही उठानु पड्यो हइ, यहोवा की या वाणी हइ.

59 " प्रभु यहोवा यो बोलस हइ: मी तर साथ असो ही बर्ताव कर्यु, जसो तोने कर्यो हइ, क्योकि तो ने तो वचन तोडीखे कसम खे तुच्छ जान्यो हइ. 60 तेभी मी अपना बचपन का दिन की अपनो वाचा याद कर्यु, अरु तरा साथ हमेशा को वचन बाध्यु. 61 जब तु अपनी बहीनहोन खे अर्थात अपनी छोटी अरु बडी बहिनहोन के ग्रहन करे. तब तु अपनो चालचलन याद करीके लज्जित हुये; अरु मी उनके तरी बेटीहोन ठहरय दियु; परंतु या तरा वचन का जसो नी करु. 62 मी तरा सात अपनो वचन स्थिर कर्यु, अरु तब तु जानी लिये कि मि यहोवा आय. 63 जेकासे तु याद करिखे लज्जीत हुये,अरु शरम का मारे कभी फिर मुंडो नि खोले. यो उ टेम हुये, जब मी तरा सब कामहोन खे झाक्यु. प्रभु यहोवा को यो वचन हइ."