यहेज्केल 19

दु:ख को गानो

1 इस्राएल का प्रधानहोन का विषय मे तु यो दु:ख गीत गानु: 2 ओ इस्राएल का प्रधाहोन तुम्हारी माय एक शेरनी थी. वा शेर का बिच बठी करती थी अरु अपना बच्चाहोन खे जवान शेरहोन का बिच पालती पोसती थी. 3 ओने अपना बच्चाहोन मे से एक खे पाल्यो अरु उ जवान शेर हुइ गयो, अरु उ शिकार पकडनु सिखी गयो; उ इंसान खे खान आलो बनी गयो. 4 का दुनीयाहोन ने ओकी चर्चा सुनी, अरु ओखे अपना खोदा हुया गंडा मे फसायो, अरु ओका नाक मे नथ डाली खे मिस्र देश मे ली गया. 5 जब शेरनी ने देख्यो की ओकी आशा पुरी नी हुइ, अरु ओकी उम्मीद जाती री, ते ओने अपना एक अरु बच्चा खे लियो अरु ओखे एक ताकतवर शेर बनायो. 6 तब उ जवान शेर हुइ खे शेरहोन का बिच चलन फिरन लग्यो, अरु उ भी शिकार पकडन लग्यो; अरु उ एक इंसान खे खानआलो बनी गयो. 7 ओने किलाहोन खे बिगाडी दिया, ओने किल्ला अरु नगर खे उजाड्यो. जब भी उ गरजतो थो ते देश का दुनीयाहोन डरी जाता था. 8 तब ओका चारी तरफ का का दुनीयाहोन ओका खिलाफ हुइ गया. उन्हे ओका लिये जाल बिछायो, अरु उ उनका द्वारा खोद्या गया गंडा मे फसी गयो. 9 तब उन्हे ओके फसयके पिजरा मे पकड्यो अरु बेबीलोन का राजा का पास ली आया, अरु किल्ला मे बन्द करी दियो, जेकासे ओको गरजनो इस्राएल का पहाड पर कभी सुनइ नी दियो. 10 "तरी माय पाणी का किनारा मे लगाया गया अंगुर की बाडी मे अंगुर की एक बेल की जसी थी; भरपुर पाणी मिलन का कारण वा डगान अरु फुलहोन से भरी थी." 11 ओकी बडी-बडी डगानहोन राजा का राज-दण्ड बनान का योग्य थी.

वा येत्ती उच्ची थी, की आकाश खे छुन लगी.

अपनी उच्चइ अरु डगानहोन का कारण

भोत लम्बी थी. 12 पर ओखे गुस्सा से भरीखे उखाडी खे भुमी पर फेंकी दियो गयो. अरु ओका फल पूर्वी हवा ने ओखे सुखइ दिया, ओका फल गिरी गया; ओकी मजबुत डगानहोन सुकी गइ अरु अंगार ने जलइ खे खतम करी दी. 13 अब बंजर सुखा प्रदेश मे लगइ गइ हइ, एक सुखी अरु प्यासी जमिन पर. 14 ओकी एक मुख्य डगान से अंगार फैली अरु ओका फलहोन खे जलइ खे खतम करी दिया.

ओमे अरु कोइ मजबुत डगान नी बच्ची

जो शासन करन आलाहोन का लिये राजदंड का लिये उपयुक्त हुये.

"यो एक दु:ख को गानो हइ अरु आगे भी दु:ख को गानो ऱ्हिये."