1 ओने मरा से बोल्यो "हे इन्सान का बच्चा, जो तोखे मिल्यो हइ ओखे खइ ले; अर्थात या किताब खे खइ ले, तब जइखे इस्राएल का कुल से बात कर." 2 येकालिये मे ने मुडो खोल्यो अरु ओने वा किताब मेखे खलइ दी. 3 तब ओने मरा से बोल्यो,"हे इन्सान का बच्चा, या किताब जो मेने तोखे देउस हइ ओखे पचाइ ले, अरु अपनो पेट भरी ले." आखीर: मे ने ओखे खइ ली; अरु मरा मुडा मे वा मोहुअरुस का जसी मीठ्ठी लगी. 4 फिर ओने मरा से बोल्यो, "हे इन्सान का बच्चा, तु इस्राएल का कुल का पास जैइखे उनखे मरा वचन सुना." 5 क्योकी मी तोखे कोइ अनोखी बोली या कठीन भाषा बोलन आलाहोन का पास नी भेजी रो हइ; बल्की इस्राएल-कुल का पास भेजी रो हइ. 6 तोखे असा दुनियाहोन का पास नी भेजी रो हइ जो अनोखी बोली बोलस हइ या कठीन भाषा बोलनआला दुनिया हइ, जिनकी भाषा तु नी समजे. अगर मि तोखे असा दुनियाहोन का पास ही भेजतो, ते निस्सदेह वे तरी बात सुनता. 7 परन्तु इस्राएल का कुलहोन तरी सुनना से इन्कार कर्ये; वे मरी भी सुनना से मना करस हइ; क्योंकी इस्राएल को पुरो कुल हठी अरु कठोर मन का हइ. 8 देख, मी तरा मुडा का सामने, अरु तरा माथा के उनका माथा का सामने, कठोर बनय दियुस हइ. 9 मेने तरा माथा खे चकमक पत्थर से भी जादा कठोर बनइ दियो हइ. वे विद्रोही कुल का बच्चा हइ. तु उनका से नी डरनु अरु नी उदास होनु. 10 फिर ओने मरा से बोल्यो, "हे इन्सान का बच्चा, जेत्ता वचन मी तरा से बोल्यु, वे सब दिल मे रखनु अरु कान से सुननो. 11 अरु वे बन्दिहोन का पास जैइखे, जो तरा दुनिया हइ, उनका से बात करनु अरु बोलनु, ‘प्रभु यहोवा यो बोलस हइ;’ चाहे वे सुन्ये या नी सुनका." 12 तब आत्मा ने मेखे उपर उठायो, अरु मे ने अपना पिच्छे बडा घडघडाहट का साथ एक आवाज सुन्यो : "जब यहोवा को तेज अपनी जगह से उठ्यो जहा पर उ खडो थो." 13 ये जीवधारिहोन का पंखहोन अरु उनका चक्काहोन को आवाज थो, जो पंख आपस मे टकरइ रा था, अरु उनका बाजु मे चक्का था, जो चलनका टेम घडघडाहट की आवाज करी रा था. 14 तब आत्मा मेखे उठइ खे लि गयो, अरु मरी आत्मा कठिन दु:ख से भरतो हुयो मी चली गयो, अरु प्रभु को हाथ मरा पर प्रबल थो. 15 अरु मी वे बन्दीहोन का पास आयो जो कबार नद्दी का किनारा पर तेलाबीब नगर मे रेता था. अरु वाहा मी सात दिन तक उनका बिच दु:खी हुइ खे बठ्यो रियो.

16 सात दिन का बितना का बाद यहोवा को यो वचन मरा पास पहुच्यो 17 "हे इन्सान का बच्चा, मेने तोखे इस्राएल का कुल का लिये पहरेदार नियुक्त कर्यो हइ; तु मरा मुडा कि बात सुनीखे, उनखे मरा तरफ से चेतावनी देनु." 18 जब मि एक दुष्ट से बोल्यु तु निच्छय हि मर्ये, अरु तु ओको प्राण बचान का लिये चेतावनी नी देनु, या ओका बुरा काम खे छोड असो नी बोलनको ते, उ दुष्ट अदमी अपना पाप का कारण मरी जाये, अरू मी भी असो कऱ्यु पर मी तोखे ओका खुन को दोषी ठहरायु. 19 पर अगर तुम उ दुष्ट अदमी खे चेतावनी देस हइ अरु उ अपनी दुष्टता या बुरा कामहोन खे नी छोडतो तब तो उ अपना आप में मर्ये, पर तुम अपना आप खे बचइ लिये. 20 "यो प्रकार, जब कोइ अच्छो अदमी अपना अच्छा पन खे छोडीखे बुरो काम करन लग्ये अरु मि ओका सामने बाधा पैदा कर्यु, ते उ मरी जाये. क्योकी तुमने ओखे चेतावनी नी दी, येकालिये उ अपना पाप मे मरी जाये, अरु जो अच्छा काम ओने कर्या हुये, वे याद नी कर्यो जाये, अरु मी तोखे ओका खुन को जिम्मेदार ठहरायु. 21 पर अगर तुम उ अच्छो अदमी खे पाप नी करन की चेतावनी देस हइ अरु उ पाप नी करस हइ, तब उ सच्ची मे जिन्दो रिये, क्योकी ओने चेतावनी पर ध्यान दियो अरु तुम अपना आप खे बचइ लिये."

22 फिर यहोवा का हात मरा पर प्रकट हुइ, अरु ओने मरा से बोल्यो, "उठीखे मैदान मे जा अरु वाहा मी तराह से बात कर्यु." 23 येकालिये मी उठ्यो अरु बाहेर मैदान मे गयो, मेने देख्यो कि यहोवा कि महिमा वहा थी; यो महिमा ठिक वसी हि थी, जसो कबार नद्दी का किनारा पर, ओसो हि दिख्यो तब मी अपना मुडा का बल गिरी गो. 24 तब आत्मा ने मरा मे समइ खे अरु मेखे मरा पाय पर खडो करी दियो, फिर उ मरा से बोलन लग्यो, "जा अपना घर का अंदर दरवाजो बंद करिखे बठी जा. 25 हे इन्सान का बच्चा देख, वे दुनिया तोखे वे रस्सी से बांध्ये, अरु तु बाहर दुनिया का बिच नी जॆइ सक्ये." 26 मी तरा जीभ खे तरा तालु से चिपकइ दियु, ताकी तु चुप रिये अरु उनखे डाटी नी सक्ये, क्योकी वे एक विद्रोही दुनिया हइ. 27 परतु जब मी तराह से बात कर्यु, ते मी तरा मुडा खे खोली दियु अरु तु उनका से बोल्ये, प्रभु यहोवा यो बोलस हइ, जो कोइ सुननो चाहे, उ सुन, अरु जो कोइ सुननो नी चाहे, उ नी सुननो; क्योकी वे एक विद्रोही दुनिया हइ.