यहेज्केल 45

देश की जमीन मे परमेश्वर को भाग

1 "जब तुम चिट्टी डालीखे देश खे बाट्यो, तब देश मे से एक भाग पवित्र जानीखे यहोवा खे अर्पण करनु; ओकी लम्बइ पच्चीस हजार बास की अरु चौडइ दस हजार बास की हुनु, उ भाग अपना चारी तरफ की सीमा तक पवित्र ठहर्ये." 2 ओमे से पवित्र जगाह का लिये डाय सौ मीटर लम्बी अरु डाय सौ मीटर चौडी चौकोन जमीन हुनु, अरु ओका चारी तरफ पच्चीस मीटर चौडी भुमी छुट्टी पडी रिह्ये. 3 उ पवित्र भाग मे तुम साडे बारा किलोमीटर लम्बी अरु पाच किलोमीटर चौडी एक भाग अलग करी देनु. या अलग कऱ्यो हुये चौडी जमिन के गिनु, अरु ओमे हि पवित्र जगा बनानु, जो परमपवित्र ठयरे. 4 जो याजक पवित्र जगा की सेवा कर्ये अरु यहोवा की सेवा करन खे नजीक आये, उ उनका ही लिये हुये; वहा उनका घरहोन का लिये जगा हुनु अरु पवित्र जगा का लिये पवित्र ठहर्यो. 5 फिर साडे बारा मिटर लम्बो, अरु पाच मिटर चौडो एक भाग अलग करी देनु. या अलग कऱ्यो हुयो चौडो एक भाग, भवन कि सेवा करनवाला लेवि कि बीस खोलीहोन का लिये हुये. 6 "फिर नगर का लये, अर्पण कर्या हुयो पवित्र भाग का नजीक तुम पाच हजार बास चौडी अरु पच्चीस हजार बास लम्बी, विशेष जमीन ठहरानु; उ इस्राएल का सब घराना का लिये हुये."

प्रधान का लिये जमीन

7 प्रधान का निज भाग पवित्र अर्पण कर्यो हुयो भाग अरु नगर की विशेष जमिन का दोइ तरफ मनजे दोइ का पश्चिम अरु पुर्व दिशाहोन मे दोइ भागहोन का सामने हुये; अरु ओकी लम्बइ पश्चिम से लेकर पुर्व तक वे दोइ भागहोन मे से कोइ भी एक का जसो हुये. 8 इस्राएल का देश में प्रधान की या ही निज जमीन हुये. म्हरो ठहर्यो हुयो प्रधान मरी प्रजा पर फिर अन्धेर नी कर्ये; पन इस्राएल का घराना खे उनका कुल का अनुसार देश मिल्ये.

प्रधान का लिये नियम

9 परमेश्वर यहोवा यो बोलस हइ : हे इस्राएल का प्रधानहोन! बस करो, शोषण अरु अत्याचार खे दुर करो, अरु न्याय अरु धर्म का काम कर्या करो; मरी प्रजा का दुनीयाहोन खे निकालनु छोडी दे, परमेश्वर यहोवा की या वाणी हइ. 10 तुम्हारा पास सच्चो तराजु, सच्चो गिनन को माप, अरु सच्चो रिये.✝45:10 लैव्यव्यवस्था 19:36 11 एपा अरु बत दोइ ही एक माप का हुये, मनजे दोइ मे होमेर को दसवो अंश समाये; दोइ को माप होमेर का हिसाब से हुये. 12 शेखेल बीस गेरा को हुये; अरु तुम्हारो मानो बीस, पच्चीस, या पन्द्रह शेखेल को हुये.*45:12 लगभग 11.5 ग्राम चादी को तुकडो 13 तुम्हारी उठइ हुइ भेट या हुये, मनजे गहु को होमेर से एपा को छठवो भाग, अरु जौ को होमेर मे से एपा को छठवो भाग देनु. 14 तेल को नियत भाग कोर मे से बत को दसवो भाग हुये; कोर तो दस तब मनजे एक होमेर का बराबर हइ, क्योकी होमेर दस बत को होस हइ*45:14 चार सौ पचास लिटर एक कोर-माप होता है, जो एक होमेर के बराबर है. होमेर दस बत का होता है.. 15 इस्राएल की अच्छी-अच्छी चराइहोन से दो-दो सौ मेडो बकरीहोन मे से एक मेडो या बकरी दियो जाये. ये सब चीजहोन अन्नबलि, होमबलि अरु मेलबलि का लिये दियो जाये जेकासे उनका लये प्रायश्चित कर्यो जाये, परमेश्वर यहोवा की या वाणी हइ. 16 इस्राएल का प्रधान का लिये देश का सब दुनीया यो भेट दिये. 17 तीवार, नयो चाद का दिनहोन, आराम दिनहोन अरु इस्राएल का कुल का सब नियत टेमहोन मे होमबलि, अन्नबलि, अरु पेयबलि देनु प्रधान ही को काम हुये. इस्राएल का कुल का लिये प्रायश्चित करन खे वा पापबलि, अन्नबलि, होमबलि, अरु मेलबलि तयार करनु.

तीवार✝45:18 निर्गमन 12:1-20; लैव्यव्यवस्था 23:33-43

18 "परमेश्वर यहोवा यो बोलस हइ : पहला महिना का पहला दिन खे तु एक निर्दोष बछडो लिखे पवित्र जगाह खे पवित्र करनु." 19 या पापबलि का खुन मे से याजक कुछ लिखे भवन का चौकुट का खम्बाहोन, अरु वेदी की कुर्सी का चारी कोनाहोन, अरु अंदर अंगन का फाटक का खम्बाहोन पर लगानु. 20 फिर भुल से नासमजी से जिन्हे पाप कर्यो हुये उनका लिये महिना का सातवा दिन खे भी यो ही करनु; यो प्रकार से भवन का लिये प्रायश्चित करनु. 21 पहला महिना का चौदावा दिन खे तुम्हारी तिवार हुइ कर्ये, वा सात दिन को तीवार हुये अरु ओमे अखमीरी रोटी खइ जाये.✝45:21 निर्गमन 12:1-20; गिनती 28:16-25 22 उ दिन प्रधान अपना अरु प्रजा का सब दुनीयाहोन को हमेशा एक बछडो पापबलि का लिये तयार करनु. 23 तीवार का सात ही दिन उ यहोवा का लिये होमबलि तयार करनु, मनजे हर एक दिन सात सात निर्दोष बछडो अरु सात सात निर्दोष मेडो अरु हरदिन एक एक बकरो पापबलि का लिये तयार करनु. 24 हर एक बछडो अरु मेडा का साथ उ एपा भर अन्नबलि, अरु एपा पिछ्ये हीन भर तेल तयार करनु. 25 सातवा महिना का पन्द्रावा दिन से लिखे सात दिन तक मनजे तीवार का दिनहोन मे वा पापबलि, होमबलि, अन्नबलि, अरु तेल या विधि का अनुसार कर्यो करनु.✝45:25 लैव्यव्यवस्था 23:33-36; गिनती 29:12-38