यहेज्केल 30

परमेश्वर मिस्र खे दण्ड दिये

1 फिर यहोवा को यो वचन मरा पास आयो: 2 "हे इन्सान का बच्चा, भविष्यवाणी करीखे बोल, परमेश्वर यहोवा यो बोलस हइ: दु:ख कर! अरु बोल, हाय उ दिन का लिये. 3 क्योकि उ दिन अर्थात यहोवा को दिन नजीक हइ; उ बद्दलहोन को दिन, अरु राष्ट्रहोन को दण्ड को टेम हुये. 4 मिस्र मे तलवार चल्ये, अरु जब मिस्र मे दुनीया मर्या जैइखे गिर्ये, तब कूश मे भी संकट पड्ये, दुनीया मिस्र खे लुटी ली जाये, अरु उनकी नीव उलटइ दी जाये. 5 कूश, पूत, लूद अरु कूब देशहोन को अरु उ देश का र्हेनवाला भी जो साथ मे सामील हइ, तलवार से मार्या जाये." 6 "प्रभु यहोवा यो बोलस हइ: मिस्र खे संभालन वाला भी गिरी जाये, अरु जो मिस्र पर घमण्ड करस हइ, वे भी जमीन पर धराशायी हुइ जाये. प्रभु यहोवा यो बोलस हइ: मिग्दोल नगर से सवेने नगर तक सब मिस्र देश का रेनवाला तलवार से मार्या जाये." 7 उजाड जमिन का बिच वे उजाड हुइ जाये अरु नगर खण्डरहोन का बिच खण्डर पड्या ऱ्हिये. 8 जब मी मिस्र मे अंगार लगायु अरु ओका सब सहायक खतम हुइ जाये, तब वे जानी लीये कि मी यहोवा आय. 9 उ टेम मरा सामने से दुत जहाजहोन पर चढीखे बिना डर को निकल्ये अरु कूश देश का दुनीयाहोन खे डराये; अरु उनका पर असो संकट पड्ये जसो कि मिस्र को दण्ड को टेम; क्योकि देख, उ दिन आस हइ! 10 "परमेश्वर यहोवा यो बोलस हइ: मी बेबीलोन को राजो नबूकदनेस्सर का हाथ से मिस्र की भीड-भाड खे खतम करी दियु." 11 उ अपनी प्रजा का साथ, जो सब राष्ट्रहोन मे भयानक हइ, उ देश को नाश करन खे पहुचायो जाये; अरु वे मिस्र का विरुध्द तलवार चलइखे देश खे लाशहोन से भरी दिये. 12 मी नद्दीहोन खे सुखइ डाल्यु, अरु देश खे बुरा दुनीयाहोन का हाथ मे करी दियु; अरु मी परदेशिहोन का द्वारा देश खे, अरु जो कुछ ओमे हइ, ओखे उजाडी दियु; मी यहोवा ने ही यो बोल्यो हइ. 13 "परमेश्वर यहोवा यो बोलस हइ: मी नोप मे से मुर्तीहोन खे खतम करी दियु अरु ओमे की मुर्तीहोन को नामो इशान मिटय दियु; फिर कोइ राजकुमार मिस्र देश मे नी उठे; अरु मी मिस्र देश मे डर लायु. 14 मी पत्रोस नगर खे उजाडी दियु, अरु सोअन मे अंगार लगायु, अरु झोनो नगर खे दण्ड दियु. 15 सीन नगर मिस्र देश को गढ हइ, ओका पर मी अपनी क्रोध की अंगार भडकायु; अरु नो नगर कि बडी अबादी खे खतम करी दियु. 16 मी मिस्र मे अंगार लगायु; अरु सीन नगर कापतो उठ्ये. अरु नो नगर खे फाड्यो जाये अरु मेम्फिस नगर का विरोधी दिन दहाडे उठे. 17 आवेन अरु पीवेसेत का जवानहोन तलवार से गिर्ये, अरु यो नगर गुलाम बनी जाये. 18 जब मी मिस्रीहोन को राज्य को अंत करी दियु, अरु जब ओको घमणड चूर-चूर हुइ जाये, तब तहपन्हेस नगर मे दिन को प्रकाश अंधारा मे बदली जाये, पुरो मिस्र देश बद्दल से झकइ जाये; अरु ओकी सब बेटिहोन गुलाम बनी खे चली जाये. 19 यो प्रकार मी मिस्रीहोन खे दण्ड दियु. अब वे जानी लिये कि मी यहोवा आय."

मिस्र का राजा की तोडन की शक्ति

20 फिर ग्याहरा साल का पहलीला महीना का सातवा दिन खे यहोवा को यो वचन मरा पास आयो. 21 "हे इन्सान का बच्चा, मे ने मिस्र को राजो फोरौन का हाथ तोडी दिया हइ; अरु देख, नी ते उ जोड्यो गयो, नी ओका पर लेप लगइ खे पट्टी चडइ गइ ओका बाधना से तलवार पकडन का योग्य हुइ सक्ये. 22 येकालिये प्रभु यहोवा यो बोलस हइ: देख; मी मिस्र का राजा का विरुध्द हइ, अरु ओकी अच्छी अरु टुट्या दोइ हाथहोन खे तोड्यु; अरु तलवार खे ओका हाथ से गिरायु. 23 मी मिस्रीहोन खे राष्ट्रो-राष्ट्रो मे तितर-बितर कर्यु, अरु देश-देश मे फयलय दियु. 24 मी बेबीलोन को राजा का हाथहोन खे बली करीखे अपनी तलवार ओका हाथ मे दियु; पर फिरोन का हाथहोन खे तोडी दियु, अरु उ ओका सामने असो चिल्लाहे जसो मरन आलो घायल चिल्लास हइ. 25 मी बेबीलोन का राजा का हाथहोन खे मजबूत कर्यु, अरु फिरोन का हाथहोन ढिला पडी जाये, अब वे जान्ये कि मी यहोवा आय. जब मी बेबीलोन का राजा का हाथ मे अपनी तलवार दियु, तब उ ओखे मिस्र देश मे चलाये. 26 अरु मी मिस्रिहोन खे राष्ट्र-राष्ट्र मे तितर-बितर कर्यु अरु देश-देश मे फयलय दियु. तब वे जान्ये कि मी यहोवा आय."