मिस्र का विरुध्द भविष्यवाणी
1 दसवा साल का दसवा महिना को बारावा दिन खे यहोवा को यो वचन मरा पास आयो: 2 "हे इन्सान का बच्चा, अपनो मुडो मिस्र का राजा फिरोन का तरफ करीखे ओका तरफ सब मिस्र देश का विरुध्द भविष्यवाणी कर;" 3 यो बोल, परमेश्वर यहोवा यो बोलस हइ; हे मिस्र देश को राजो फिरोन, मी तरा विरुध्द हइ, हे बडा मगरमच्छ, तु जो अपनी नद्दी का बिच पड्यो र्हेस हइ, जेने बोल्यो हइ, मरी नद्दी मरी खुद की हइ, अरु मेने ही ओखे अपना लिये बनायो हइ. 4 मेने तरा जबडा मे आकडो डाल्यु, अरु तरी नद्दीहोन की मच्छीहोन खे तरी चामडा मे चिपकायु, अरु तरी चामडा मे चिपकी हुइ तरी नद्दी की सब मच्छीहोन साथ तोखे तरी नद्दी से निकाल्यु. 5 तब मी तोखे तरी नद्दीहोन की सब मच्छीहोन का साथ जंगल मे निकाली दियु, अरु तु मैदान मे पड्यो र्हिये; कोइ भी प्रकार से तोखे याद नी कर्यो जानको. मेने तोखे जगली जनवर अरु बद्दल चिडीहोन को खानो करी दियो हइ. 6 तब मिस्र का र्हेनवाला जानी लिये कि मी यहोवा आय. वे तो इस्राएल का कुल का लिये बोरु कि लकडी को टेक ठहर्यो थो. 7 जब उन्हे तोखे हाथ से पकड्यो ते तु टुटी गो हइ, अरु वे गिरी पड्या. उनको खंदो घायल हुइ गयो. जब उन्हे तरा पर टेक लगइ, तब तु टुटी गयो. अरु उनकी कमर की सब नसहोन चढी गइ. 8 यो कारण प्रभु यहोवा यो बोलस हइ: देख, मी तरा पर तलवार चलइखे, तरा इन्सान अरु जनवर, सभी को नाश कर्यु. 9 तब मिस्र देश उजाड ही उजाड हुइ गयो; अरु वे जानी लिये कि मी यहोवा आय.
तोने बोल्यो हइ, मरी नद्दी मरी अपनी ही हइ, अरु मे ने ही ओखे बनइ. 10 यो कारण देख, मी तरी अरु तरी नद्दीहोन का विरुध्द हइ अरु मिस्र देश खे मिग्दोल नगर से लि खे सवेने तक अरु कुश देश की सीमा तक उजाड ही उजाड करी दियु. 11 चालीस साल तक ओमे इन्सान को पाय तक नी पडनको; अरु ओमे कोइ नी रेनको. 12 चालीस साल तक मी मिस्र देश खे उजड्या हुया देशहोन का बिच उजाडी खे रख्यु; अरु ओका नगर उजड्या हुया नगरहोन का बिच खण्डहर ही रीये. मी मिस्रीहोन खे राष्ट्र-राष्ट्र मे भिन्न-भिन्न देशहोन मे तितर-बितर करी दियु. 13 "परमेश्वर यहोवा यो बोलस हइ: चालीस साल का बितना पर मी मिस्रीहोन खे वे जातहोन का बिच से जमा कर्यु, जेमे वे तितर-बितर हुया हइ; 14 अरु मी मिस्रीहोन खे उनखे उनकी जन्म-भूमि मे, पत्रोस देश मे वापस लायु, अरु वहा उनखे दोबारा स्थापित कर्यु. वहा वे मिस्र देश मे एक छोटो सो राज्य का रुप मे रेन लगी जाये. 15 उ सब राज्य मे छोटो हुये, अरु फिर अपनो माथो अरु जातहोन का उपर नी उठाये; क्योकि मी मिस्रीहोन खे असो घटायु कि वे राष्ट्र-राष्ट्र पर फिर कभी शासन नी करन का. 16 वे येत्ता कमजोर हुये कि इस्राएल उनका पर कभी भरोसो नी करन को. जब कभी वे मद्दत का लिये उनका तरफ देख्ये, तब उनखे मिस्रीहोन को न्यायीपन याद हुइ जाये. तब इस्राएलीहोन समजी जाये कि मी यहोवा प्रभु आय."
राजो नबूकदनेस्सर मिस्र खे पराजित कर्ये
17 फिर सत्ताविसवा साल का पहला महीना का पहला दिन खे यहोवा को यो वचन मरा पास आयो: 18 "हे इन्सान का बच्चा, बेबीलोन को राजो नबूकदनेस्सर ने सोर का कुल मे अपनी सेना से बडो मेहनत करवायो; हर एक को माथो गंजो हुइ गयो, अरु हर एक का खदाहोन का चमडा छिली गया; तेभी ओखे सोर ने नी ते यो बडो मेहनत की मजदुरी दी नी ओकी सेना खे दी." 19 यो कारण परमेश्वर यहोवा यो बोलस हइ: देख, मी बेबीलोन का राजा नबूकदनेस्सर खे मिस्र देश दियु, अरु उ ओकी भीड खे ली जाये, अरु ओकी धन सम्पत्ती खे लुटीखे अपनो करी लिये; आखरी मे या मजदुरी ओकी सेना खे मिल्ये. 20 मेने उनका मेहनत का बदला मे उनखे मिस्र देश यो कारण दियो हइ कि वे दुनीयाहोन ने मरा लिये काम कर्यो थो, परमेश्वर यहोवा की या वाणी हइ. 21 "उय टेम मी इस्राएल का कुल को एक सींग लायु, अरु उनका बिच तरो मुडो खोल्यु. तब तु जानी लिये कि मी यहोवा आय."